Ballade des pendus
L'Epitaphe en forme de ballade que feit Villon pour luy & ſes compagnons, s'attendant eſtre pendu auec eux.
Freres humains, qui après nous viuez,
N'ayez les cuers contre nous endurcis,
Car, ſe pitié de nous poures auez,
Dieu en aura plus toſt de vous mercis.
Vous nous voiez cy atachez cinq, ſix :
Quant de la chair, que trop auons nourrie,
Elle eſt pieça deuorée & pourrie,
Et nous, les os, deuenons cendre & pouldre.
De noſtre mal perſonne ne s'en rie,
Mais priez Dieu que tous nous vueille abſouldre !
Se freres vous clamons, pas n'en deuez
Auoir deſdaing, quoy que fuſmes occis
Par iuſtice. Toutesfois, vous ſçauez
Que tous hommes n'ont pas bon ſens aſſis ;
Excuſez nous — puis que ſommes tranſſis —
Enuers le filz de la Vierge Marie,
Que ſa grace ne ſoit pour nous tarie,
Nous preſeruant de l'infernale fouldre.
Nous ſommes mors, ame ne nous harie ;
Mais priez Dieu que tous nous vueille abſouldre !
La pluye nous a buez & lauez,
Et le ſoleil deſechez & noircis ;
Pies, corbeaulx, nous ont les yeux cauez,
Et arraché la barbe & les ſourcilz.
Iamais, nul temps, nous ne ſommes aſſis ;
Puis çà, puis là, comme le vent varie,
A ſon plaiſir ſans ceſſer nous charie,
Plus becquetez d'oiſeaulx que dez à couldre.
Ne ſoiez donc de noſtre confrairie,
Mais priez Dieu que tous nous vueille abſouldre !
Envoi
Prince Iheſus, qui ſur tous a maiſtrie,
Garde qu'Enfer n'ait de nous ſeigneurie :
A luy n'ayons que faire ne que ſouldre.
Hommes, icy n'a point de mocquerie,
Mais priez Dieu que tous nous vueille abſouldre !