Comment le seigneur de Humevesne plaidoie davant Pantagruel
Lors commença le seigneur de Humevesne ainsi que s'ensuit :
« Monsieur et Messieurs, si l'iniquité des hommes estoit aussi facilement veue en jugement categoricque comme on congnoist mousches en laict, le monde, quatre beufz, ne seroit tant mangé de ratz comme il est, et seroient aureilles maintes sur terre qui en ont esté rongées trop laschement : car, — combien que tout ce que a dit partie adverse soit de dumet bien vray quand à la lettre et histoire du factum, — toutesfoys, Messieurs, la finesse, la tricherie, les petitz hanicrochemens sont cachez soubz le pot aux roses.
« Doibs je endurer que, à l'heure que je mange, au pair, ma souppe, sans mal penser ny mal dire, l'on me vienne ratisser et tabuster le cerveau, me sonnant l'antiquaille et disant :
Qui boit en mangeant sa souppe
Quand il est mort, il n'y voit goutte ?
« Et, saincte Dame, combien avons nous veu de gros cappitaines en plein camp de bataille, alors qu'on donnoit les horions du pain benist de la confrarie, pour plus honnestement se deliner, jouer du luc, sonner du cul et faire les petiz saulx en plate forme !
« Mais maintenant le monde est tout detravé de louchetz des balles de Lucestre : l'un se desbauche, l'aultre cinq, quatre et deux, et, si la court n'y donne ordre, il fera aussi mal glener ceste année qu'il feist, ou bien fera des goubeletz. Si une pauvre personne va aux estuves pour se faire enluminer le museau de bouzes de vache ou acheter bottes de hyver, et de sergeans passans, ou bien ceulx du guet, reçeuvent la decoction d'un clystere ou la matiere fecale d'une celle persée sur leurs tintamarres, en doibt l'on pourtant roigner les testons et fricasser les escutz elles de boys ?
« Aulcunes foys nous pensons l'un, mais Dieu faict l'aultre, et, quand le soleil est couché, toutes bestes sont à l'ombre. Je n'en veulx estre creu si je ne le prouve hugrement par gens de plain jour.
« L'an trente et six, j'avoys achapté un courtault d'Alemaigne, hault et court, d'assez bonne laine et tainct en grene comme asseuroyent les orfevres, toutesfoys le notaire y mist du cetera. Je ne suis poinct clerc pour prendre la lune avecques les dentz, mais, au pot de beurre où l'on selloit les instrumens vulcanicques, le bruyt estoit que le bœuf salé faisoit trouver le vin sans chandelle, et feust il caiché au fond d'un sac de charbonnier, houzé et bardé avecques le chanfrain et hoguines requises à bien fricasser rusterie, c'est teste de mouton. Et c'est bien ce qu'on dict en proverbe qu'il faict bon veoir vaches noires en boys bruslé quand on jouist de ses amours. J'en fis consulter la matiere à Messieurs les clercs, et pour resolution conclurent en frisesomorum qu'il n'est tel que faucher l'esté en cave bien garnie de papier et d'ancre, de plumes et ganivet de Lyon sur le Rosne, tarabin tarebas : car, incontinent que un harnoys sent les aulx, la rouille luy mangeve le foye, et puis l'on ne faict que rebecquer torty colli, fleuretant le dormir d'après disner. Et voylà qui faict le sel tant cher.
« Messieurs, ne croyez que, au temps que ladicte bonne femme englua la poche cuilliere pour le record du sergeant mieulx apanager et que la fressure boudinalle tergiversa par les bourses des usuriers, il n'y eust rien meilleur à soy garder des canibales que prendre une liasse d'oignons, lyée de trois cens naveaulx, et quelque peu d'une fraize de veau, du meilleur alloy que ayent les alchimistes, et bien luter et calciner ses pantoufles, mouflin, mouflart, avecques belle saulce de raballe, et soy mucer en quelque petit trou de taulpe, salvant tousjours les lardons.
« Et, si le dez ne vous veult aultrement ambezars, ternes du gros bout, guare d'az, mettez la dame au coing du lict, fringuez la, toureloura la la, et bevez à oultrance, depiscando grenoillibus, à tout beaulx houseaulx coturnicques : ce sera pour les petitz oysons de mue, qui s'esbatent au jeu de foucquet, attendant battre le metal et chauffer la cyre aux bavars de godale.
« Bien vray est il que les quatre beufz desquelz est question avoyent quelque peu la memoire courte : toutesfoys, pour sçavoir la game, ilz n'en craignoyent courmaran ny quanard de Savoye, et les bonnes gens de ma terre en avoyent bonne esperance, disant : « Ces enfans deviendront grands en algorisme ; ce nous sera une rubrique de droict. » Nous ne pouvons faillir à prendre le loup, faisans nos hayes dessus le moulin à vent, duquel a esté parlé par partie adverse. Mais le grand diole y eut envie et mist les Allemans par le derriere, qui firent diables de humer : « Her, tringue, tringue ! » de doublet en case, car il n'y a nulle apparence de dire que à Paris sur Petit Pont geline de feurre, et fussent ilz aussi huppez que duppes de marays, sinon vrayement qu'on sçacrifiast les pompetes au moret fraichement esmoulu de lettres versalles ou coursives, ce m'est tout un, pourveu que la tranchefille n'y engendre les vers.
« Et, posé le cas que au coublement des chiens courans les marmouzelles eussent corné prinse devant que le notaire eust baillé sa relation par art cabalisticque, il ne s'ensuit (saulve meilleur jugement de la court) que six arpens de pré à la grand laize feissent troys bottes de fine ancre sans souffler au bassin, consideré que aux funerailles du roy Charles l'on avoit en plain marché la toyson pour deux et ar, j'entens, par mon serment, de laine.
« Et je voy ordinairement en toutes bonnes cornemuses que, quand l'on va à la pipée, faisant troys tours de balay par la cheminée et insinuant sa nomination, l'on ne faict que bander aux reins et soufler au cul, si d'adventure il est trop chault et, quille luy bille,
Incontinent les lettres veues,
Les vaches luy furent rendues.
« Et en fut donné pareil arrest à la Martingalle l'an dix et sept pour le maulgouvert de Louzefougerouse, à quoy il plaira à la Court d'avoir esguard.
« Je ne dy vrayement qu'on ne puisse par equité desposseder en juste tiltre ceulx qui de l'eaue beniste beuvroyent, comme on faict d'un rançon de tisserant, dont on faict les suppositoires à ceulx qui ne voulent resigner, sinon à beau jeu bel argent.
« Tunc, Messieurs, quid juris pro minoribus ? Car l'usance comme de la loy Salicque est telle que le premier boute feu qui escornifle la vache, qui mousche en plein chant de musicque sans solfier les poinctz des savatiers, doibt, en temps de godemarre, sublimer la penurie de son membre par la mousse cuillie alors qu'on se morfond à la messe de minuict, pour bailler l'estrapade à ces vins blancs d'Anjou qui font la jambette, collet à collet, à la mode de Bretaigne.
« Concluent comme dessus, avecques despens, dommaiges et interestz. »
Après que le seigneur de Humevesne eut achevé, Pantagruel dist au seigneur de Baisecul :
« Mon amy, voulez vous rien replicquer ? »
A quoy respondit Baisecul :
« Non, Monsieur, car je n'en ay dict que la vérité, et, pour Dieu, donnons fin à nostre different, car nous ne sommes icy sans grand frais. »
Comment Pantagruel donna sentence sus le different des deux seigneurs
Alors Pantagruel se leve et assemble tous les presidens, conseilliers et docteurs là assistans, et leur dist :
« Or, ça, Messieurs, vous avez ouy, vive vocis oraculo, le different dont est question. Que vous en semble ? »
A quoy respondirent :
« Nous l'avons veritablement ouy, mais nous n'y avons entendu, au diable, la cause. Par ce, nous vous prions una voce et supplions par grace que vueilliez donner la sentence telle que verrez, et ex nunc prout ex tunc nous l'avons aggreable et ratifions de nos pleins consentemens.
— Eh bien, Messieurs, dist Pantagruel, puisqu'il vous plaist, je le feray ; mais je ne trouve le cas tant difficile que vous le faictes. Votre paraphe Caton, la loy Frater, la loy Gallus, la loy Quinque pedum, la loy Vinum, la loy Si dominus, la loy Mater, la loy Mulier bona, la loy Si quis, la loy Pomponius, la loy Fundi, la loy Emptor, la loy Pretor, la loy Venditor et tant d'aultres, sont bien plus difficiles en mon oppinion. »
Et, apres ce dict, il se pourmena un tour ou deux par la sale, pensant bien profundement, comme l'on povoit estimer, car il gehaignoyt comme un asne qu'on sangle trop fort, pensant qu'il failloit à un chascun faire droict, sans varier ny accepter personne ; puis retourna s'asseoir et commença pronuncer la sentence comme s'ensuyt :
« Veu, entendu et bien calculé le different d'entre les seigneurs de Baisecul et Humevesne, la Court leur dict :
« Que, considerée l'orripilation de la ratepenade declinent bravement du solstice estival pour mugueter les billesvesées qui ont eu mat du pyon par les males vexations des lucifuges qui sont au climat dia Rhomès d'un matagot à cheval bendant une arbaleste au reins, le demandeur eut juste cause de callafater le gallion que la bonne femme boursouffloit, un pied chaussé et l'aultre nud, le remboursant bas et roidde en sa conscience d'aultaut de baguenaudes comme y a de poil en dix huit vaches, et autant pour le brodeur.
« Semblablement est declairé innocent du cas privilegié des gringuenaudes qu'on pensoit qu'il eust encouru de ce qu'il ne pouvoit baudement fianter, par la decision d'une paire de gands, parfumés de petarrades à la chandelle de noix, comme on use en son pays de Mirebaloys, laschant la bouline avecques les bouletz de bronze, dont les housse pailleurs pastissoyent conestablement ses legumaiges interbastez du Loyrre à tout les sonnettes d'esparvier faictes à poinct de Hongrie que son beau frere portoit memoriallement en un penier limitrophe, brodé de gueulles à troys chevrons ballebrenez de canabasserie, au caignard angulaire dont on tire au papeguay vermiforme avecques la vistempenarde.
« Mais, en ce qu'il met sus au defendeur qu'il fut rataconneur, tyrofageux et goildronneur de mommye, que n'a esté en brimbalant trouvé vray, comme bien l'a debastu ledict defendeur, la court le condemne en troys verrassées de caillebottes assimentées, prelorelitantées et gaudepisées comme est la coustume du pays, envers ledict defendeur, payables à la my d'oust, en may ;
« Mais ledict defendeur sera tenu de fournir de foin et d'estoupes à l'embouchement des chasse trapes gutturales, emburelucocquées de guilverdons, bien grabelez à rouelle.
« Et amis comme devant, sans despens, et pour cause ».
Laquelle sentence pronuncée, les deux parties departirent toutes deux contentes de l'arrest qui fust quasi chose increable : car venu n'estoyt despuys les grandes pluyes et n'adviendra de treze jubilez que deux parties, contendentes en jugement contradictoires, soient egualement contentez d'un arrest diffinitif.
Au regard des conseilliers et aultres docteurs qui là assistoyent, ilz demeurerent en ecstase esvanoys bien troys heures, et tous ravys en admiration de la prudence de Pantagruel plus que humaine, laquelle avoyent congneu clerement en la decision de ce jugement tant difficile et espineux, et y feussent encores, sinon qu'on apporta force vinaigre et eaue rose pour leur faire revenir le sens et entendement acoustumé, dont Dieu soit loué partout.