Comment Panurge, Carpalim, Eusthenes, Epistemon, compaignons de Pantagruel, desconfirent six cens soixante chevaliers bien subtilement
Ainsi qu'il disoit cela, ilz adviserent six cens soixante chevaliers, montez à l'advantage sus chevaulx legiers, qui acouroyent là veoir quelle navire c'estoit qui estoit de nouveau abordée au port, et couroyent à bride avallée pour les prendre s'ilz eussent peu.
Lors dist Pantagruel :
« Enfans, retirez vous en la navire. Voyez cy de noz ennemys qui accourent, mais je vous les tueray icy comme bestes, et feussent ilz dix foys autant. Cependent retirez vous, et en prenez vostre passetemps ».
Adonc respondit Panurge :
« Non, Seigneur, il n'est de raison que ainsi faciez ; mais au contraire retirez vous en la navire, et vous et les aultres, car tout seul les desconfiray icy, mais il ne fauldra pas tarder. Avancez, vous ».
A quoy dirent les aultres :
« C'est bien dict, Seigneur, retirez vous, et nous ayderons icy à Panurge, et vous congnoistrez que nous sçavons faire ».
Adonc Pantagruel dist :
« Or je le veulx bien ; mais, au cas que feussiez plus foybles, je ne vous fauldray ».
Alors Panurge tira deux grandes cordes de la nef et les atacha au tour qui estoit sur le tillac et les mist en terre et en fist un long circuyt, l'un plus loing, l'aultre dedans cestuy là, et dist à Epistemon :
« Entrez dedans la navire, et, quand je vous sonneray, tournez le tour sus le tillac diligentement en ramenant à vous ces deux chordes ».
Puis dist à Eusthenes et à Carpalim :
« Enfans, attendez icy, et vous offrez es ennemys franchement et obtemperez à eux, et faictes semblant de vous rendre. Mais advisez que ne entrez au cerne de ces chordes ; retirez vous tousjours hors ».
Et incontinent entra dedans la navire, et print un fais de paille et une botte de pouldre de canon, et espandit par le cerne des chordes, et avec une migraine de feu se tint auprès.
Soubdain arriverent à grande force les chevaliers, et les premiers chocquerent jusques auprès de la navire, et, parce que le rivage glissoit, tumberent, eux et leurs chevaulx, jusques au nombre de quarante et quatre. Quoy voyans, les aultres approcherent, pensans que on leur eust resisté à l'arrivée. Mais Panurge leur dist :
« Messieurs, je croy que vous soyez faict mal ; pardonnez le nous, car ce n'est de nous, mais c'est de la lubricité de l'eau de mer, qui est tousjours unctueuse. Nous nous rendons à vostre bon plaisir ».
Autant en dirent ses deux compaignons et Epistemon, qui estoit sur le tillact.
Ce pendent Panurge s'esloignoit, et, voyant que tous estoyent dedans le cerne des chordes et que ses deux compaignons s'en estoyent esloignez, faisans place à tous ces chevaliers, qui à foulle alloyent pour veoir la nef et qui estoit dedans, soubdain crya à Epistemon :
« Tire ! tire ! »
Lors Epistemon commença tirer au tour, et les deux chordes se empestrerent entre les chevaulx et les ruoyent par terre bien aysement avecques les chevaucheurs ; mais eulx, ce voyant, tirerent à l'espée et les vouloyent desfaire, dont Panurge met le feu en la trainée, et les fist tous là brusler comme Ames dannées. Hommes et chevaulx, nul n'en eschappa, excepté un qui estoit monté sur un cheval Turq, qui le gaigna à fouyr ; mais, quand Carpalim l'apperceut, il courut après en telle hastiveté et allaigresse qui le attrappa en moins de cent pas, et, saultant sur la crouppe de son cheval, l'embrassa par derriere et l'amena à la naviere.
Ceste deffaicte parachevée, Pantagruel feut bien joyeux et loua merveilleusement l'industrie de ses compaignons, et les fist refraichir et bien repaistre sur le rivaige joyeusement et boire d'autant le ventre contre terre, et leur prisonnier avecques eulx familiairement, sinon que le pauvre diable n'estoit point asseuré que Pantagruel ne le devorast tout entier, ce qu'il eust faict, tant avoit la gorge large, aussi facillement que feriez un grain de dragée, et ne luy eust monté en sa bouche en plus q'un grain de millet en la gueulle d'un asne.
Comment Pantagruel et ses compaignons estoient fachez de manger de la chair salée, et comme Carpalim alla chasser pour avoir de la venaison
Ainsi comme ilz bancquetoyent, Carpalim dist :
« Et, ventre sainct Quenet, ne mangerons nous jamais de venaison ? Ceste chair sallée me altere tout. Je vous voys apporter icy une cuysse de ces chevaulx que avons faict brusler ; elle sera assez bien rostie ».
Tout ainsi qu'il se levoit pour ce faire, apperceut à l'orée du boys un beau grand chevreul qui estoit yssu du fort, voyant le feu de Panurge, à mon advis.
Incontinent courut après de telle roiddeur qu'il sembloit que feust un carreau d'arbaleste et l'attrapa en un moment, et en courant print de ses mains en l'air :
Quatre grandes otardes,
Sept bitars,
Vingt et six perdrys grises,
Trente et deux rouges,
Seize faisans,
Neuf beccasses,
Dix et neuf herons,
Trente et deux pigeons ramiers,
Et tua de ses pieds dix ou douze, que levraulx, que lapins, qui jà estoyent hors de piege,
Dix huyt rasles parez ensemble,
Quinze sanglerons,
Deux blereaux,
Troys grands renards.
Frappant doncques le chevreul de son malcus à travers la teste, le tua, et, l'apportant, recueillit ses levraulx, rasles et sanglerons, et de tant loing que peust estre ouy s'escria, disant :
« Panurge, mon amy, vinaigre ! vinaigre ! »
D'ont pensoit le bon Pantagruel que le cueur luy fist mal et commandat qu'on lui apprestat du vinaigre. Mais Panurge entendit bien qu'il y avoit levrault au croc ; de faict, monstra au noble Pantagruel comment il portoit à son col un beau chevreul et toute sa ceincture brodée de levraulx.
Soubdain Epistemon fist, au nom des neuf Muses, neuf belles broches de boys à l'anticque ; Eusthenes aydoit à escorcher, et Panurge mist deux selles d'armes des chevaliers en tel ordre qu'elles servirent de landiers, et firent roustisseur leur prisonnier, et au feu où brusloyent les chevaliers firent roustir leur venaison.
Et après, grand chere à force vinaigre. Au diable l'un qui se faignoit ; c'estoit triumphe de les veoir bauffrer.
Lors dist Pantagruel :
Pleust à Dieu que chascun de vous eust deux paires de sonnettes de sacre au menton et que je eusse au mien les grosses horologes de Renes, de Poictiers, de Tours et de Cambray, pour veoir l'aubade que nous donnerions au remuement de noz badiguoinces.
— Mais, dist Panurge, il vault mieulx penser de nostre affaire un peu, et par quel moyen nous pourrons venir au dessus de noz ennemys.
— C'est bien advisé », dist Pantagruel.
Pour tant demanda à leur prisonnier :
« Mon amy, dys nous icy la verité, et ne nous mens en rien, si tu ne veulx estre escorché tout vif, car c'est moy qui mange les petiz enfans. Conte nous entierement l'ordre, le nombre et la forteresse de l'armée.
A quoy respondit le prisonnier :
« Seigneur, sachez pour la verité que en l'armée sont : troys cens geans, tous armez de pierre de taille, grands à merveilles, toutesfoys non tant du tout que vous, excepté un qui est leur chef et a nom Loup Garou, et est tout armé d'enclumes Cyclopicques ; cent soixante et troys mille pietons, tous armés de peaulx de lutins, gens fortz et courageux ; unze mille quatre cens hommes d'armes ; troys mille six cens doubles canons et d'espingarderie sans nombre ; quatre vingtz quatorze mille pionniers ; cent cinquante mille putains, belles comme deesses...
— Voylà pour moy, dist Panurge...
— Dont les aulcunes sont Amazones, les aultres lyonnoyses, les aultres parisiannes, tourangelles, angevines, poictevines, normandes, allemandes ; de tous pays et toutes langues y en a.
— Voire mais, (dist Pantagruel), le roy y est il ?
— Ouy, Sire, dist le prisonnier ; il y est en personne, et nous le nommons Anarche, roy des Dypsodes, qui vault autant à dire comme gens allerez, car vous ne veistes oncques gens tant alterez ny beuvans plus voluntiers, et a sa tente en la garde des geans.
— C'est assez, dist Pantagruel. Sus, enfans, estez vous deliberez d'y venir avecques moy ? »
A quoy respondit Panurge :
« Dieu confonde qui vous laissera. J'ay jà pensé comment je vous les rendray tous mors comme porcs, qu'il n'en eschappera au diable le jarret ; mais je me soucie quelque peu d'un cas.
— Et qui est ce ? dist Pantagruel.
— C'est, (dist Panurge), comment je pourray avanger à braquemarder toutes les putains qui y sont en ceste après disnée, qu'il n'en eschappe pas une, que je ne taboure en forme commune.
— Ha, ha, ha, dist Pantagruel. »
Et Carpalim dist :
« Au diable de Biterne ! Par Dieu, j'en embourreray quelque une !
— Et je, dist Eusthenes, quoy, qui ne dressay oncques puis que bougeasmes de Rouen, au moins que l'aguille montast jusques sur lés dix ou unze heures, voire encores que l'aye dur et fort comme cent diables.
— Vrayement, dist Panurge, tu en auras des plus grasses et des plus refaictes.
— Comment, (dist Epistemon), tout le monde chevauchera et je meneray l'asne. Le diable emport qui en fera rien. Nous userons du droict de guerre : Qui potest capere capiat.
— Non, non, dist Panurge, mais atache ton asne à un croc et chevauche comme le monde ».
Et le bon Pantagruel ryoit à tout, puis leur dist :
« Vous comptez sans vostre hoste. J'ay grand peur que, devant qu'il soit nuyct, ne vous voye en estat que ne aurez grande envie d'arresser, et qu'on vous chevauchera à grand coup de picque et de lance.
— Baste, dist Epistemon, je vous les rends à roustir ou boillir, à fricasser ou mettre en paste. Ilz ne sont en si grand nombre comme avoit Xercès, car il avoit trente cens mille combatans, si croyez Herodote et Troge Pompone, et toutesfoys Themistocles à peu de gens les desconfit. Ne vous souciez, pour Dieu.
— Merde, merde, dist Panurge. Ma seulle braguette espoussetera tous les hommes, et sainct Balletrou, qui dedans y repose, decrottera toutes les femmes.
— Sus doncques, enfans, dict Pantagruel ; commençons à marcher.