Vers 1 à 648

Artus, li buens rois de Bretaingne,
La cui proesce nos ansaingne,
Que nos soiiens preu et cortois,
Tint cort si riche come rois
A cele feste, qui tant coste,
Qu'an doit clamer la pantecoste.
Li rois fu a Carduel an Gales.
Aprés mangier parmi cez sales
Li chevalier s'atropelerent
La, ou dames les apelerent
Ou dameiseles ou puceles.
Li un recontoient noveles,
Li autre parloient d'amors,
Des angoisses et des dolors
Et des granz biens, qu'an ont sovant
Li deciple de son covant,
Qui lors estoit riches et buens.
Mes ore i a mout po des suens ;
Que a bien pres l'ont tuit leissiee,
S'an est amors mout abeissiee ;
Car cil, qui soloient amer,
Se feisoient cortois clamer
Et preu et large et enorable.
Ore est amors tornee a fable
Por ce que cil, qui rien n'an santent,
Dïent qu'il aimment, mes il mantent,
Et cil fable et mançonge an font,
Qui s'an vantent et droit n'i ont.
Mes por parler de çaus, qui furent,
Leissons çaus, qui an vie durent !
Qu'ancor vaut miauz, ce m'est avis,
Uns cortois morz qu'uns vilains vis.
Por ce me plest a reconter
Chose, qui face a escouter,
Del roi, qui fu de tel tesmoing,
Qu'an an parole pres et loing ;
Si m'acort de tant as Bretons,
Que toz jorz mes vivra ses nons ;
Et par lui sont ramanteü
Li buen chevalier esleü,
Qui an enor se traveillierent.
Mes cel jor mout s'esmerveillierent
Del roi, qui d'antre aus se leva,
S'i ot de tes, cui mout greva
Et qui mout grant parole an firent
Por ce, que onques mes nel virent
A si grant feste an chanbre antrer
Por dormir ne por reposer ;
Mes cel jor einsi li avint,
Que la reïne le detint,
Si demora tant delez li,
Qu'il s'oblia et andormi.
A l'uis de la chanbre defors
Fu Dodiniaus et Sagremors
Et Kes et mes sire Gauvains,
Et si i fu mes sire Yvains,
Et avuec aus Calogrenanz,
Uns chevaliers mout avenanz,
Qui lor ot comancié un conte,
Non de s'enor, mes de sa honte.
Que que il son conte contoit,
Et la reïne l'escoutoit,
Si s'est de lez le roi levee
Et vint sor aus si a anblee,
Qu'ainz que nus la poïst veoir,
Se fu leissiee antre aus cheoir, . . .
Fors que Calogrenanz sanz plus
Sailli an piez contre li sus.
Et Kes, qui mout fu ranposneus,
Fel et poignanz et afiteus,
Li dist : „Par De, Calogrenant !
Mout vos voi or preu et saillant,
Et certes mout m'est bel, que vos
Estes li plus cortois de nos ;
Et bien sai, que vos le cuidiez,
Tant estes vos de san vuidiez ;
S'est droiz que ma dame le cuit,
Que vos aiiez plus que nos tuit
De corteisie et de proesce.
Ja le leissames por peresce,
Espoir, que nos ne nos levames,
Ou por ce, que nos ne deignames !
Par ma foi ! sire, non feïmes,
Mes por ce, que nos ne veïmes
Ma dame, ainz fustes vos levez.“
„Certes, Kes ! ja fussiez crevez“,
Fet la reïne, „au mien cuidier,
Se ne vos poïssiez vuidier
Del venin, don vos estes plains.
Enuieus estes et vilains
De ranposner voz conpaignons.“
„Dame ! se nos ne gaeignons“,
Fet Kes, „an vostre conpaignie,
Gardez que nos n'i perdons mie !
Je ne cuit avoir chose dite,
Qui me doie estre a mal escrite,
Et je vos pri, teisiez vos an !
Il n'a corteisie ne san
An plet d'oiseuse maintenir.
Cist plez ne doit avant venir,
Ne l'an nel doit plus haut monter ;
Mes feites nos avant conter
Ce qu'il avoit ancomancié ;
Que ci ne doit avoir tancié.“
A ceste parole s'apont
Calogrenanz et si respont :
„Sire !“, fet il, „de la tançon
N'ai je mie grant cusançon ;
Petit m'an est et po la pris.
Se vos avez vers moi mespris,
Je n'i avrai ja nul domage :
A miauz vaillant et a plus sage,
Mes sire Kes ! que je ne sui,
Avez vos dit sovant enui ;
Que bien an estes costumiers.
Toz jorz doit puïr li fumiers
Et taons poindre et maloz bruire,
Enuieus enuiier et nuire.
Mes je n'an conterai hui mes,
Se ma dame m'an leisse an pes,
Et je li pri, qu'ele s'an teise,
Que ja chose, qui me despleise,
Ne me comant, soe merci.“
„Dame ! trestuit cil, qui sont ci“,
Fet Kes, „buen gre vos an savront ;
Que volantiers l'escouteront ;
Ne n'an feites ja rien por moi !
Mes foi, que vos devez le roi,
Le vostre seignor et le mien,
Comandez li, si feroiz bien“.
„Calogrenanz !“, fet la reïne,
„Ne vos chaille de l'anhatine
Mon seignor Ke, le seneschal !
Costumiers est de dire mal
Si qu'an ne l'an puet chastiier.
Comander vos vuel et priier,
Que ja n'an aiiez au cuer ire,
Ne por lui ne leissiez a dire
Chose, qui nos pleise a oïr,
Se de m'amor volez joïr,
Mes comanciez tot de rechief !“
„Certes, dame ! ce m'est mout grief,
Que vos me comandez a feire ;
Ainz me leissasse un des iauz treire,
Se correcier ne vos dotasse,
Que hui mes nule rien contasse ;
Mes je ferai ce qu'il vos siet,
Comant que il onques me griet.
Des qu'il vos plest, ore antandez !
Cuer et oroilles me randez !
Car parole oïe est perdue,
S'ele n'est de cuer antandue.
De tes i a, que ce, qu'il öent,
N'antandent pas et si le loent ;
Et cil n'an ont mes que l'oïe,
Des que li cuers n'i antant mie.
As oroilles vient la parole
Aussi come li vanz, qui vole ;
Mes n'i areste ne demore,
Ainz s'an part an mout petit d'ore,
Se li cuers n'est si esveilliez,
Qu'au prandre soit apareilliez ;
Que cil la puet an son venir
Prandre et anclorre et retenir.
Les oroilles sont voie et doiz,
Par ou s'an vient au cuer la voiz ;
Et li cuers prant dedanz le vantre
La voiz, qui par l'oroille i antre.
Et qui or me voldra antandre,
Cuer et oroilles me doit randre ;
Car ne vuel pas parler de songe,
Ne de fable ne de mançonge,
Don maint autre vos ont servi,
Ainz vos dirai ce, que je vi.

Il avint, pres a de set anz,
Que je seus come païsanz
Aloie querant avantures,
Armez de totes armeüres
Si come chevaliers doit estre,
Et trovai un chemin a destre
Parmi une forest espesse.
Mout i ot voie felenesse,
De ronces et d'espines plainne ;
A quelqu'enui, a quelque painne,
Ting cele voie et cel santier.
A bien pres tot le jor antier
M'an alai chevauchant einsi
Tant que de la forest issi,
Et ce fu an Broceliande.
De la forest an une lande
Antrai et vi une bretesche
A demie liue galesche :
Se tant i ot, plus n'i ot pas.
Cele part ving plus que le pas
Et vi le baille et le fossé
Tot anviron parfont et le,
Et sor le pont an piez estoit
Cil, cui la forteresce estoit,
Sor son poing un ostor müé.
Ne l'oi mie bien salüé,
Quant il me vint a l'estrier prandre,
Si me comanda a desçandre.
Je desçandi ; il n'i ot el,
Que mestier avoie d'ostel ;
Et il me dist tot maintenant
Plus de çant foiz an un tenant,
Que beneoite fust la voie,
Par ou leanz venuz estoie.
A tant an la cort an antrames,
Le pont et la porte passames.
Anmi la cort au vavassor,
Cui Des doint et joie et enor
Tant come il fist moi cele nuit,
Pandoit une table ; je cuit
Qu'il n'i avoit ne fer ne fust
Ne rien, qui de cuivre ne fust.
Sor cele table d'un martel,
Qui panduz iere a un postel,
Feri li vavassors trois cos.
Cil qui amont ierent anclos
Oïrent la voiz et le son,
S'issirent fors de la meison
Et vindrent an la cort aval.
Li un seisirent mon cheval,
Que li buens vavassors tenoit ;
Et je vi que vers moi venoit
Une pucele bele et jante.
An li esgarder mis m'antante :
Ele fu longue et gresle et droite.
De moi desarmer fu adroite ;
Qu'ele le fist et bien et bel.
Puis m'afubla un cort mantel,
Ver d'escarlate peonace,
Et tuit nos guerpirent la place,
Que avuec moi ne avuec li
Ne remest nus, ce m'abeli ;
Que plus n'i queroie veoir.
Et ele me mena seoir
El plus bel praelet del monde,
Clos de bas mur a la reonde.
La la trovai si afeitiee,
Si bien parlant et anseigniee,
De tel sanblant et de tel estre,
Que mout m'i delitoit a estre,
Ne ja mes por nul estovoir
Ne m'an queïsse removoir ;
Mes tant me fist la nuit de guerre
Li vavassors, qu'il me vint querre,
Quant de soper fu tans et ore.
N'i poi plus feire de demore,
Si fis lués son comandemant.
Del soper vos dirai briemant,
Qu'il fu del tot a ma devise,
Des que devant moi fu assise
La pucele, qui s'i assist.
Aprés soper itant me dist
Li vavassors, qu'il ne savoit
Le terme, puis que il avoit
Herbergié chevalier errant,
Qui avanture alast querant,
S'an avoit il maint herbergié.
Aprés ce me pria, que gié
Par son ostel m'an revenisse
An guerredon, se je poïsse.
Et je li dis : „Volantiers, sire !“,
Que honte fust de l'escondire.
Petit por mon oste feïsse,
Se cest don li escondeïsse.

Mout fui bien la nuit ostelez,
Et mes chevaus fu anselez,
Lués que l'an pot le jor veoir ;
Car j'an oi mout proiié le soir ;
Si fu bien feite ma proiiere.
Mon buen oste et sa fille chiere
Au saint Esperit comandai,
A trestoz congié demandai,
Si m'an alai lués que je poi.
L'ostel gueires esloignié n'oi,
Quant je trovai an uns essarz
Tors sauvages et espaarz,
Qui s'antreconbatoient tuit
Et demenoient si grant bruit
Et tel fierté et tel orguel,
Se le voir conter vos an vuel,
Que de peor me tres arriere ;
Que nule beste n'est tant fiere
Ne plus orguelleuse de tor.
Un vilain, qui ressanbloit mor,
Grant et hideus a desmesure,
(Einsi tres leide creature,
Qu'an ne porroit dire de boche),
Vi je seoir sor une çoche,
Une grant maçue an sa main.
Je m'aprochai vers le vilain,
Si vi qu'il ot grosse la teste
Plus que roncins ne autre beste,
Chevos meschiez et front pelé,
S'ot plus de deus espanz de le,
Oroilles mossues et granz,
Autés come a uns olifanz,
Les sorciz granz et le vis plat,
Iauz de çuëte et nes de chat,
Boche fandue come los,
Danz de sangler, aguz et ros,
Barbe noire, grenons tortiz,
Et le manton aers au piz,
Longue eschine, torte et boçue.
Apoiiez fu sor sa maçue,
Vestuz de robe si estrange,
Qu'il n'i avoit ne lin ne lange,
Ainz ot a son col atachiez
Deus cuirs de novel escorchiez
De deus toriaus ou de deus bués.
An piez sailli li vilains lués
Qu'il me vit vers lui aprochier.
Ne sai, s'il me voloit tochier,
Ne ne sai, qu'il voloit anprandre,
Mes je me garni de deffandre,
Tant que je vi, que il s'estut
An piez toz coiz, si ne se mut,
Et fu montez dessor un tronc,
S'ot bien dis et set piez de lonc ;
Si m'esgarda et mot ne dist,
Ne plus qu'une beste feïst ;
Et je cuidai que il n'eüst
Reison ne parler ne seüst.
Totes voies tant m'anhardi,
Que je li dis : „Va, car me di,
Se tu es buene chose ou non !“
Et il me dist : „Je sui uns hon.“
„Ques hon ies tu ?“ — „Tes con tu voiz.
Je ne sui autre nule foiz.“
„Que fes tu ci ?“ — „Je m'i estois,
Si gart cez bestes par cest bois.“
„Gardes ? Por saint Pere de Rome !
Ja ne conoissent eles home.
Ne cuit qu'an plain ne an boschage
Puisse an garder beste sauvage,
N'an autre leu por nule chose,
S'ele n'est liiée ou anclose.“
„Je gart si cestes et justis,
Que ja n'istront de cest porpris.“
„Et tu comant ? Di m'an le voir !“
„N'i a celi, qui s'ost movoir,
Des qu'eles me voient venir.
Car quant j'an puis une tenir,
Si la destraing par les deus corz
As poinz, que j'ai et durs et forz,
Que les autres de peor tranblent
Et tot anviron moi s'assanblent
Aussi con por merci criër :
Ne nus ne s'i porroit fiër
Fors moi, s'antre eles s'estoit mis,
Que maintenant ne fust ocis.
Einsi sui de mes bestes sire :
Et tu me redevroies dire,
Ques hon tu ies et que tu quiers.“
„Je sui, ce voiz, uns chevaliers,
Qui quier ce, que trover ne puis ;
Assez ai quis et rien ne truis.“
„Et que voldroies tu trover ?“
„Avantures por esprover
Ma proesce et mon hardemant.
Or te pri et quier et demant,
Se tu sez, que tu me consoille
Ou d'avanture ou de mervoille.“
„A ce“, fet il, „faudras tu bien :
D'‚avanture‘ ne sai je rien,
N'onques mes n'an oï parler.
Mes se tu voloies aler
Ci pres jusqu'a une fontainne,
N'an revandroies pas sanz painne,
Se tu li randoies son droit.
Ci pres troveras ore androit
Un santier, qui la te manra.
Tote la droite voie va,
Se bien viaus tes pas anploiier ;
Que tost porroies desvoiier,
Qu'il i a d'autres voies mout.
La fontainne verras, qui bout,
S'est ele plus froide que marbres.
Onbre li fet li plus biaus arbres,
Qu'onques poïst feire Nature.
An toz tans la fuelle li dure,
Qu'il ne la pert por nul iver,
Et s'i pant uns bacins de fer
A une si longue chaainne,
Qui dure jusqu'an la fontainne.
Lez la fontainne troveras
Un perron tel, con tu verras,
(Je ne te sai a dire, quel,
Que je n'an vi onques nul tel),
Et d'autre part une chapele
Petite, mes ele est mout bele.
S'au bacin viaus de l'eve prandre
Et dessor le perron espandre,
La verras une tel tanpeste,
Qu'an cest bois ne remandra beste,
Chevriaus ne dains ne cers ne pors,
Nes li oisel s'an istront fors ;
Car tu verras si foudroiier,
Vanter et arbres peçoiier,
Plovoir, toner et espartir,
Que, se tu t'an puez departir
Sanz grant enui et sanz pesance,
Tu seras de meillor cheance
Que chevaliers, qui i fust onques.“ —
Del vilain me parti adonques,
Qui bien m'ot la voie mostree.
Espoir si fu tierce passee
Et pot estre pres de midi,
Quant l'arbre et la chapele vi.
Bien sai de l'arbre (c'est la fins)
Que ce estoit li plus biaus pins,
Qui onques sor terre creüst.
Ne cuit qu'onques si fort pleüst,
Que d'eve i passast une gote,
Einçois coloit par dessus tote.
A l'arbre vi le bacin pandre
Del plus fin or, qui fust a vandre
Onques ancore an nule foire.
De la fontainne poez croire,
Qu'ele boloit come eve chaude.
Li perrons fu d'une esmeraude,
Perciez aussi come une boz,
S'i ot quatre rubiz dessoz
Plus flanboianz et plus vermauz,
Que n'est au matin li solauz,
Quant il apert an oriant.
Ja, que je sache, a esciant
Ne vos an mantirai de mot.
La mervoille a veoir me plot
De la tanpeste et de l'orage,
Don je ne me ting mie a sage ;
Que volantiers m'an repantisse
Tot maintenant, se je poïsse,
Quant je oi le perron crosé
De l'eve au bacin arosé.
Mes trop an i versai, ce dot ;
Que lors vi le ciel si derot,
Que de plus de quatorze parz
Me feroit es iauz li esparz,
Et les nues tot pesle mesle
Gitoient noif et pluie et gresle.
Tant fu li tans pesmes et forz,
Que çant foiz cuidai estre morz
Des foudres, qu'antor moi cheoient,
Et des arbres, qui depeçoient.
Sachiez que mout fui esmaiiez
Tant que li tans fu rapaiiez.
Mes Des tant me rasseüra,
Que li tans gueires ne dura
Et tuit li vant se reposerent :
Quant De ne plot, vanter n'oserent.
Et quant je vi l'er cler et pur,
De joie fui toz a sëur ;
Que joie, s'onques la conui,
Fet tost obliër grant enui.
Des que li tans fu trespassez,
Vi sor le pin tant amassez
Oisiaus (s'est, qui croire m'an vuelle),
Qu'il n'i paroit branche ne fuelle,
Que tot ne fust covert d'oisiaus,
S'an estoit li arbres plus biaus ;
Et trestuit li oisel chantoient
Si que mout bien s'antracordoient.
Mes divers chanz chantoit chascuns ;
Qu'onques ce, que chantoit li uns,
A l'autre chanter n'i oï.
De lor joie me resjoï,
S'escoutai tant qu'il orent fet
Lor servise trestot a tret ;
Qu'ains mes n'oï si bele joie,
Ne mes ne cuit, que nus hon l'oie,
Se il ne va oïr celi,
Qui tant me plot et abeli,
Que je m'an dui por fol tenir. —
Tant i fui, que j'oï venir
Chevaliers, ce me fu avis —
Bien cuidai que il fussent dis :
Tel noise et tel fraint demenoit
Uns seus chevaliers, qui venoit.
Quant je le vi tot seul venant,
Mon cheval restrains maintenant,
N'au monter demore ne fis ;
Et cil come mautalantis
Vint plus tost qu'uns alerions,
Fiers par sanblant come lions.
De si haut, come il pot criër,
Me comança a desfiër
Et dist : „Vassaus ! mout m'avez fet
Sanz desfiance honte et let.
Desfiër me deüssiez vos,
S'il eüst querele antre nos,
Ou au mains droiture requerre,
Ainz que vos me meüssiez guerre.
Mes se je puis, sire vassaus !
Sor vos retornera li maus
Del domage, qui est paranz ;
Anviron moi est li garanz
De mon bois, qui est abatuz.
Plaindre se doit, qui est batuz :
Et je me plaing, si ai reison,
Que vos m'avez de ma meison
Chacié a foudres et a pluie.
Fet m'avez chose, qui m'enuie,
Et dahez et, cui ce est bel ;
Qu'an mon bois et an mon chastel
M'avez feite tel anvaïe,
Que mestier ne m'eüst aïe
De jant ne d'armes ne de mur.
Onques n'i ot home a seür
An forteresce, qui i fust,
De dure pierre ne de fust.
Mes sachiez bien, que des or mes
N'avroiz de moi triues ne pes.“
A cest mot nos antrevenimes,
Les escuz anbraciez tenimes,
Si se covri chascuns del suen.
Li chevaliers ot cheval buen
Et lance roide, et fu sanz dote
Plus granz de moi la teste tote.
Einsi del tot a meschief fui,
Que je fui plus petiz de lui,
Et ses chevaus plus forz del mien.
Parmi le voir, ce sachiez bien,
M'an vois, por ma honte covrir.
Si grant cop, con je poi ferir,
Li donai, qu'onques ne m'an fains ;
El conble de l'escu l'atains,
S'i mis trestote ma puissance
Si qu'an pieces vola ma lance ;
Et la soe remest antiere,
Qu'ele n'estoit mie legiere,
Ainz pesoit plus au mien cuidier,
Que nule lance a chevalier ;
Qu'ains nule si grosse ne vi.
Et li chevaliers me feri
Si roidemant, que del cheval
Parmi la crope contre val
Me mist a la terre tot plat,
Si me leissa honteus et mat ;
Qu'onques puis ne me regarda.
Mon cheval prist et moi leissa,
Si se mist arriere a la voie.
Et gié, qui mon roi ne savoie,
Remés angoisseus et pansis.
Delez la fontainne m'assis
Un petit, si me reposai.
Le chevalier siure n'osai,
Que folie feire dotasse ;
Et se je bien siure l'osasse,
Ne soi je, que il se devint.
An la fin volantez me vint,
Qu'a mon oste covant tandroie
Et que par lui m'an revandroie.
Einsi me plot, einsi le fis ;
Mes mes armes totes jus mis,
Por aler plus legieremant,
Si m'an reving honteusemant.
Quant je ving la nuit a l'ostel,
Trovai mon oste tot autel,
Aussi lié et aussi cortois,
Come j'avoie fet einçois.
Onques de rien ne m'aparçui
Ne de sa fille ne de lui,
Que mains volantiers me veïssent
Ne que mains d'enor me feïssent,
Qu'il avoient fet l'autre nuit.
Grant enor me porterent tuit,
Les lor merciz, an la meison,
Et disoient, qu'onques mes hon
N'iere eschapez, que il seüssent
Ne qu'il oï dire l'eüssent,
De la, don j'estoie venuz,
Que n'i fust morz ou retenuz.
Einsi alai, einsi reving,
Au revenir por fol me ting ;
Si vos ai conté come fos
Ce qu'onques mes conter ne vos.“

„Par mon chief !“, dist mes sire Yvains,
„Vos estes mes cosins germains,
Si nos devons mout antramer ;
Mes de ce vos puis fol clamer,
Quant vos le m'avez tant celé.
Se je vos ai ‚fol‘ apelé,
Je vos pri qu'il ne vos an poist ;
Car, se je puis et il me loist,
J'irai vostre honte vangier.“
„Bien pert qu'il est aprés mangier,“
Fet Kes, qui teire ne se pot.
„Plus a paroles an plain pot
De vin, qu'an un mui de cervoise.
L'an dit que chaz saous s'anvoise.
Aprés mangier sanz remuër
Va chascuns Noradin tuër,
Et vos iroiz vangier Forré !
Sont vostre panel anborré
Et voz chauces de fer froiiees
Et voz banieres desploiiees ?
Or tost, por De, mes sire Yvain !
Movroiz vos anuit ou demain ?
Feites le nos savoir, biaus sire,
Quant vos iroiz a cest martire ;
Que nos vos voldrons convoiier.
N'i avra prevost ne voiier,
Qui volantiers ne vos convoit.
Et je vos pri, comant qu'il soit,
N'an alez pas sanz noz congiez ;
Et se vos anquenuit songiez
Mauvés songe, si remanez !“
„Deable ! Estes vos forsenez,
Mes sire Kes !“, fet la reïne,
„Que vostre langue onques ne fine ?
La vostre langue soit honie,
Que tant i a d'escamonie !
Certes, vostre langue vos het ;
Que tot le pis, que ele set,
Dit a chascun, qui que il soit.
Langue, qui onques ne recroit
De mal dire, soit maleoite !
La vostre langue si esploite,
Qu'ele vos fet par tot haïr.
Miauz ne vos puet ele traïr.
Bien sachiez : je l'apeleroie
De traïson, s'ele estoit moie.
Home, qu'an ne puet chastiier,
Devroit an au mostier liier
Come desvé devant les prosnes.“
„Certes, dame ! de ses ranposnes“,
Fet mes sire Yvains, „ne me chaut.
Tant puet et tant set et tant vaut
Mes sire Kes an totes corz,
Qu'il n'i iert ja muëz ne sorz.
Bien set ancontre vilenie
Respondre san et corteisie,
Si ne fist onques autremant.
Or savez vos bien, se je mant ;
Mes je n'ai cure de tancier
Ne de folie ancomancier ;
Que cil ne fet pas la meslee,
Qui fiert la premiere colee,
Ainz la fet cil, qui se revange.
Bien tanceroit a un estrange,
Qui ranposne son conpaignon.
Ne vuel pas sanbler le gaignon,
Qui se hericë et regringne,
Quant autre mastins le rechingne.“