Vers 649 à 1242

Que que il parloient einsi,
Li rois fors de la chanbre issi,
Ou il ot fet longue demore ;
Que dormi ot jusqu'a cele ore.
Et li baron, quant il le virent,
Tuit an piez contre lui saillirent,
Et il toz rasseoir les fist.
Delez la reïne s'assist,
Et la reïne maintenant
Les noveles Calogrenant
Li reconta tot mot a mot ;
Que bien et bel conter li sot.
Li rois les oï volantiers
Et fist trois seiremanz antiers
L'ame Uterpandragon son pere,
Et la son fil et la sa mere,
Qu'il iroit veoir la fontainne,
Ja ainz ne passeroit quinzainne,
Et la tanpeste et la mervoille,
Si que il i vandra la voille
Mon seignor saint Jehan Batiste,
Et s'i prandra la nuit son giste,
Et dit que avuec lui iront
Tuit cil, qui aler i voldront.
De ce, que li rois devisa,
Tote la corz miauz l'an prisa ;
Car mout i voloient aler
Li baron et li bacheler.
Mes qui qu'an soit liez et joianz,
Mes sire Yvains an fu dolanz,
Qu'il i cuidoit aler toz seus,
S'an fu dolanz et angoisseus
Del roi, qui aler i devoit.
Por ce solemant li grevoit,
Qu'il savoit bien, que la bataille
Avroit mes sire Kes sanz faille
Ainz que il, — s'il la requeroit,
Ja veee ne li seroit, —
Ou mes sire Gauvains meïmes
Espoir la demanderoit primes.
Se nus de cez deus la requiert,
Ja contredite ne li iert.
Mes il ne les atandra mie,
Qu'il n'a soing de lor conpaignie,
Einçois ira toz seus son vuel
Ou a sa joie ou a son duel ;
Et qui que remaingne a sejor,
Il viaut estre jusqu'a tierz jor
An Broceliande et querra,
Se il puet, tant qu'il trovera
L'estroit santier tot boissoneus,
— Que trop an est cusançoneus, —
Et la lande et la meison fort
Et le solaz et le deport
De la cortoise dameisele,
Qui tant est avenanz et bele,
Et le prodome avuec sa fille,
Qui an enor feire s'essille,
Tant est frans et de buene part.
Puis verra les tors an l'essart
Et le grant vilain, qui les garde.
Li veoirs li demore et tarde
Del vilain, qui tant par est lez,
Granz et hideus et contrefez
Et noirs a guise de ferron.
Puis verra, s'il puet, le perron
Et la fontainne et le bacin
Et les oisiaus dessor le pin,
Si fera plovoir et vanter.
Mes il ne s'an quiert ja vanter,
Ne ja son vuel nus nel savra
Jusqu'a tant que il an avra
Grant honte ou grant enor eüe,
Puis si soit la chose seüe.

Mes sire Yvains de la cort s'anble
Si qu'a nul home ne s'assanble,
Mes seus vers son ostel s'an va.
Tote sa mesniee trova,
Si comanda metre sa sele
Et un suen escuiier apele,
Cui il ne celoit nule rien.
„Di va !“ fet il, „aprés moi vien
La fors et mes armes m'aporte !
Je m'an istrai par cele porte
Sor mon palefroi tot le pas.
Garde, ne demorer tu pas ;
Qu'il me covient mout loing errer.
Et mon cheval fai bien ferrer,
Si l'amainne tost aprés moi,
Puis ramanras mon palefroi.
Mes garde bien, je te comant,
S'est nus, qui de moi te demant,
Que ja novele ne l'an dies.
Se tu de rien an moi te fies,
Ja mar t'i fiëroies mes.“
„Sire !“ fet il, „il an iert pes ;
Que ja par moi nus nel savra.
Alez ! que je vos siurai ja.“

Mes sire Yvains maintenant monte,
Qui vangera, s'il puet, la honte
Son cosin, ainz que il retort.
Li escuiiers as armes cort
Et au cheval, si monta sus ;
Que de demore n'i ot plus,
Qu'il n'i failloit ne fers ne clos.
Son seignor siut toz les esclos
Tant que il le vit desçandu ;
Qu'il l'avoit un po atandu
Loing del chemin an un destor.
Tot son hernois et son ator
Ot aporté, si l'atorna.
Mes sire Yvains ne sejorna,
Puis qu'armez fu, ne tant ne quant,
Einçois erra chascun jor tant
Par montaingnes et par valees
Et par forez longues et lees,
Par leus estranges et sauvages,
Et passa mainz felons passages
Et maint peril et maint destroit,
Tant qu'il vint au santier tot droit,
Plain de ronces et d'oscurté,
Et lors fu il a seürté ;
Qu'il ne pooit mes esgarer.
Qui que le doie conparer,
Ne finera tant que il voie
Le pin, qui la fontainne onbroie,
Et le perron et la tormante,
Qui gresle et pluet et tone et vante.
La nuit ot, ce poez savoir,
Tel ostel, come il vost avoir ;
Car plus de bien et plus d'enor
Trova assez el vavassor,
Qu'an ne li ot conté ne dit ;
Et an la pucele revit
De san et de biauté çant tanz,
Que n'ot conté Calogrenanz ;
Qu'an ne puet pas dire la some
De buene dame et de prodome.
Des qu'il s'atorne a grant bonté,
Ja n'iert tot dit ne tot conté ;
Que langue ne porroit retreire
Tant d'enor, con prodon set feire.
Mes sire Yvains cele nuit ot
Mout buen ostel et mout li plot,
Et vint es essarz l'andemain,
Si vit les tors et le vilain,
Qui la voie li anseigna ;
Mes plus de çant foiz se seigna
De la mervoille, que il ot,
Comant Nature feire sot
Oevre si leide et si vilainne.
Puis erra jusqu'a la fontainne,
Si vit quanquë il vost veoir.
Sanz arester et sanz seoir
Versa sor le perron de plain
De l'eve le bacin tot plain ;
Et maintenant vanta et plut
Et fist tel tans, con feire dut.
Et quant Des redona le bel,
Sor le pin vindrent li oisel
Et firent joie merveilleuse
Sor la fontainne perilleuse.
Ainz que la joie fust remese,
Vint, d'ire plus ardanz que brese,
Li chevaliers a si grant bruit,
Con s'il chaçast un cerf de ruit,
Et maintenant qu'il s'antrevirent,
S'antrevindrent et sanblant firent,
Qu'il s'antrehaïssent de mort.
Chascuns ot lance roide et fort,
Si s'antredonent si granz cos,
Qu'andeus les escuz de lor cos
Percent, et li hauberc deslicent,
Les lances fandent et esclicent,
Et li tronçon volent an haut.
Li uns l'autre a l'espee assaut,
Si ont au chaple des espees
Les guiges des escuz coupees
Et les escuz dehachiez toz
Et par dessus et par dessoz,
Si que les pieces an depandent,
N'il ne s'an cuevrent ne deffandent ;
Car si les ont harigotez,
Qu'a delivre sor les costez
Et sor les braz et sor les hanches
Se fierent des espees blanches.
Felenessemant s'antrespruevent,
N'onques d'un estal ne se muevent
Ne plus que feïssent dui gres.
Ains dui chevalier si angrés
Ne furent de lor mort haster.
N'ont cure de lor cos gaster ;
Qu'au miauz qu'il pueent les anploient.
Li hiaumë anbuingnent et ploient,
Et des haubers les mailles volent
Si que del sanc assez se tolent ;
Car d'aus meïsmes sont si chaut
Li hauberc, que li suens ne vaut
A chascun gueires plus d'un froc.
Anz el vis se fierent d'estoc,
S'est mervoille, comant tant dure
Bataille si fiere et si dure ;
Mes andui sont de si grant cuer,
Que li uns por l'autre a nul fuer
De terre un pié ne guerpiroit,
Se jusqu'a mort ne l'anpiroit.
Et de ce firent mout que preu,
Qu'onques lor chevaus an nul leu
Ne navrerent ne anpirierent ;
Qu'il ne vostrent ne ne deignierent ;
Mes toz jorz a cheval se tindrent,
Que nule foiz a pié ne vindrent ;
S'an fu la bataille plus bele.
An la fin son hiaume escartele
Au chevalier mes sire Yvains.
Del cop fu estordiz et vains
Li chevaliers, si s'esmaia ;
Qu'ains si felon cop n'essaia ;
Qu'il li ot dessoz le chapel
Le chief fandu jusqu'au cervel,
Si que del cervel et del sanc
Taint la maille del hauberc blanc,
Don si tres grant dolor santi,
Qu'a po li cuers ne li manti.
S'adonc foi, n'ot mie tort ;
Qu'il se santi navrez a mort ;
Car riens ne li valut deffanse.
Si tost s'an fuit, come il s'apanse,
Vers son chastel toz esleissiez,
Et li ponz li fu abeissiez
Et la porte overte a bandon ;
Et mes sire Yvains de randon,
Quanqu'il puet, aprés esperone.
Si con girfauz grue randone,
Qui de loing muet, et tant l'aproche,
Tenir la cuide, mes n'i toche :
Einsi fuit cil, et cil le chace
Si pres, a po qu'il ne l'anbrace,
Et si ne le par puet ataindre,
Si est si pres, que il l'ot plaindre
De la destresce que il sant ;
Mes toz jorz au foïr antant.
Et cil del chacier s'esvertue ;
Qu'il crient sa painne avoir perdue,
Se mort ou vif ne le detient ;
Que des ranposnes li sovient,
Que mes sire Kes li ot dites.
N'iert pas de la promesse quites,
Que son cosin avoit promise,
Ne creüz n'iert an nule guise,
S'ansaingnes veraies n'an porte.
A esperon jusqu'a la porte
De son chastel l'an a mené,
Si sont anz anbedui antré,
N'ome ne fame ne troverent
Es rues, par ou il passerent,
Et vindrent anbedui d'eslés
Jusqu'a la porte del palés.

La porte fu mout haute et lee,
Si avoit si estroite antree,
Que dui home ne dui cheval
Sanz anconbrier et sanz grant mal
N'i poïssent ansanble antrer,
N'anmi la porte antrancontrer ;
Car ele estoit autressi feite,
Con l'arbaleste, qui agueite
Le rat, quant il vient au forfet ;
Et l'espee est an son aguet
Dessus, qui tret et fiert et prant ;
Qu'ele eschape lués et desçant,
Que riens nule adoise a la clef,
Ja n'i tochera si soef.
Einsi dessoz la porte estoient
Dui trebuchet, qui sostenoient
Amont une porte colant
De fer, esmolue et tranchant.
Se riens sor cel angin montoit,
La porte d'amont desçandoit,
S'estoit pris et detranchiez toz,
Cui la porte ateignoit dessoz.
Et tot anmi a droit conpas
Estoit si estroiz li trespas,
Con se fust uns santiers batuz.
El droit chemin s'est anbatuz
Li chevaliers mout sagemant,
Et mes sire Yvains folemant
Hurte grant aleüre aprés,
Si le vint ateignant si pres,
Qu'a l'arçon deriere le tint.
Et de ce mout bien li avint,
Qu'il se fu avant estanduz.
Toz eüst esté porfanduz,
Se ceste avanture ne fust ;
Que li chevaus marcha le fust,
Qui tenoit la porte de fer.
Aussi con deables d'anfer
Desçant la porte contreval,
S'ataint la sele et le cheval
Deriere et tranche tot parmi ;
Mes ne tocha, la De merci,
Mon seignor Yvain fors que tant,
Qu'au res del dos li vint reant,
Si qu'anbedeus les esperons
Li trancha au res des talons.
Et il cheï toz esmaiiez,
Et cil, qui iere a mort plaiiez,
Li eschapa an tel meniere.
Une autel porte avoit deriere
Come cele devant estoit.
Li chevaliers, qui s'an fuioit,
Par cele porte s'an foi,
Et la porte aprés lui cheï.
Einsi fu mes sire Yvains pris :
Mout angoisseus et antrepris
Remest dedanz la sale anclos,
Qui tote estoit celee a clos
Dorez, et paintes les meisieres
De buene oevre et de colors chieres ;
Mes de rien si grant duel n'avoit
Con de ce, que il ne savoit,
Quel part cil an estoit alez.
D'une chanbrete iluec delez
Oï ovrir un huis estroit,
Que que il iere an cel destroit ;
S'an issi une dameisele
Sole, mout avenanz et bele,
Et l'uis aprés li referma.
Quant mon seignor Yvain trova,
Si s'esmaia mout de premiers.
„Certes“, fet ele, „chevaliers !
Je criem que mal soiiez venuz.
Se vos estes ceanz veüz,
Vos i seroiz toz depeciez ;
Car mes sire est a mort bleciez,
Et bien sai que vos l'avez mort.
Ma dame an fet un duel si fort,
Et ses janz anviron li crïent,
Que por po de duel ne s'ocïent,
Si vos sevent il bien ceanz !
Mes antre aus est li diaus si granz,
Que il n'i pueent ore antandre.
S'il vos vuelent ocirre ou prandre,
A ce ne pueent il faillir,
Quant il vos vandront assaillir.“
Et mes sire Yvains li respont :
„Ja, se De plest, ne m'ocirront,
Ne ja par aus pris ne serai.“
„Non“, fet ele ; „car j'an ferai
Avuec vos ma puissance tote.
N'est mie prodon, qui trop dote.
Por ce cuit, que prodon soiiez,
Que n'estes pas trop esmaiiez.
Et sachiez bien, se je pooie,
Servise et enor vos feroie ;
Que vos le feïstes ja moi.
Une foiz a la cort le roi
M'anvoia ma dame an message.
Espoir si ne fui pas si sage,
Si cortoise ne de tel estre,
Come pucele deüst estre ;
Mes onques chevalier n'i ot,
Qu'a moi deignast parler un mot,
Fors vos tot seul, qui estes ci ;
Mes vos, la vostre grant merci,
M'i enorastes et servistes.
De l'enor, que la me feïstes,
Vos randrai ci le guerredon.
Bien sai, comant vos avez non,
Et reconeü vos ai bien :
Fiz estes au roi Uriien
Et avez non mes sire Yvains.
Or soiiez seürs et certains,
Que ja, se croire me volez,
Ne seroiz pris ne afolez.
Et cest mien anelet prandroiz
Et, s'il vos plest, sel me randroiz,
Quant je vos avrai delivré.“
Lors li a l'anelet livré,
Si li dist qu'il avoit tel force,
Come a dessor le fust l'escorce,
Qui le cuevre, qu'an n'an voit point ;
Mes il covient que l'an l'anpoint,
Si qu'el poing soit la pierre anclose,
Puis n'a garde de nule chose
Cil, qui l'anel an son doi a ;
Que ja veoir ne le porra
Nus hon, tant et les iauz overz,
Ne que le fust, qui est coverz
De l'escorce, qui sor lui nest.
Ice mon seignor Yvain plest,
Et quant ele li ot ce dit,
Sel mena seoir an un lit
Covert d'une coute si riche,
Qu'ains n'ot tel li dus d'Osteriche,
Et li dist que, se il voloit,
A mangier li aporteroit ;
Et il dist que li estoit bel.
La dameisele cort isnel
A sa chanbre et revint mout tost,
S'aporta un chapon an rost
Et un gastel et une nape
Et vin, qui fu de buene grape,
Plain pot d'un blanc henap covert,
Si li a a mangier ofert.
Et cil, cui il estoit mestiers,
Manja et but mout volantiers.

Quant il ot mangié et beü,
Par leanz furent esmeü
Li chevalier, qui le queroient ;
Que lor seignor vangier voloient,
Qui ja estoit an biere mis.
Et cele li a dit : „Amis !
Oëz, qu'il vos quierent ja tuit ?
Mout i a grant noise et grant bruit.
Mes qui que vaingne ne qui voise,
Ne vos movez ja por la noise :
Que vos n'i seroiz ja trovez,
Se de cest lit ne vos movez.
Ja verroiz plainne ceste sale
De jant mout enuieuse et male,
Qui trover vos i cuideront,
Et si cuit qu'il aporteront
Par ci le cors, por metre an terre ;
Si vos comanceront a querre
Et dessoz bans et dessoz liz.
Ce seroit solaz et deliz
A home, qui peor n'avroit,
Quant jant si avugle verroit ;
Qu'il seront tuit si avuglé,
Si desconfit, si desjuglé,
Que il esrageront tuit d'ire.
Je ne vos sai or plus que dire,
Ne je n'i os plus demorer.
Mes De puisse je aorer,
Qui m'a doné le leu et l'eise
De feire chose, qui vos pleise ;
Que mout grant talant an avoie.“
Lors s'est arriers mise a la voie,
Et, quant ele s'an est tornee,
Fu tote la janz aünee,
Qui de deus parz as portes vindrent
Et bastons et espees tindrent,
S'i ot mout grant fole et grant presse
De jant felenesse et angresse,
Et virent del cheval tranchié
Devant la porte la meitié.
Lors cuidoient bien estre cert,
Quant li huis seroient overt,
Que dedanz celui troveroient,
Que il por ocirre queroient.
Puis firent treire amont les portes,
Par quoi maintes janz furent mortes ;
Mes il n'i ot a celui triege
Tandu ne trebuchet ne piege,
Ainz i antrerent tuit de front.
Et l'autre meitié trovee ont
Del cheval mort delez le suel ;
Mes onques antre aus n'orent oel,
Don mon seignor Yvain veïssent,
Que mout volantiers oceïssent.
Et il les veoit esragier
Et forsener et correcier.
Et disoient : „Ce que puet estre ?
Que ceanz n'a huis ne fenestre,
Par ou riens nule s'an alast,
Se ce n'iere oisiaus, qui volast,
Ou escuriaus ou cisemus,
Ou beste aussi petite ou plus ;
Que les fenestres sont ferrees
Et les portes furent fermees,
Des que mes sire an issi fors.
Morz ou vis est ceanz li cors ;
Que la fors ne remest il mie.
La sele assez plus que demie
Est ça dedanz, ce veons bien,
Ne de lui ne veomes rien
Fors que les esperons tranchiez,
Qui li cheïrent de ses piez.
Or del cerchier par toz cez angles,
Si leissomes ester cez jangles !
Qu'ancore est il ceanz, ce cuit,
Ou nos somes anchanté tuit,
Ou tolu le nos ont maufé.“
Einsi trestuit d'ire eschaufé
Parmi la sale le queroient
Et parmi les paroiz feroient
Et parmi liz et parmi bans ;
Mes des cos fu quites et frans
Li liz, ou il s'estoit couchiez,
Qu'il n'i fu feruz ne tochiez ;
Mes assez ferirent antor
Et mout randirent grant estor
Par tot leanz de lor bastons,
Come avugles, qui a tastons
Vet aucune chose cerchant. —
Que qu'il aloient reverchant
Dessoz liz et dessoz eschames,
Vint une des plus beles dames,
Qu'onques veïst riens terriiene.
De si tres bele crestiiene
Ne fu onques plez ne parole.
Mes de duel feire estoit si fole,
Qu'a po qu'ele ne s'ocioit.
A la foiiee s'escrioit
Si haut, qu'ele ne pooit plus,
Et recheoit pasmee jus.
Et quant ele estoit relevee,
Aussi come fame desvee
Se comançoit a descirer
Et ses chevos a detirer.
Ses chevos tire et ront ses dras,
Si se repasme a chascun pas,
Ne riens ne la puet conforter ;
Que son seignor an voit porter
Devant li an la biere mort,
Don ja ne cuide avoir confort ;
Por ce crioit a haute voiz.
L'eve beneoite et la croiz
Et li cierge aloient devant
Avuec les dames d'un covant,
Et li texte et li ançansier
Et li clerc, qui sont despansier
De feire la haute despanse,
A quoi la cheitive ame panse.

Mes sire Yvains oï les criz
Et le duel, qui ja n'iert descriz ;
Que nus ne le porroit descrivre,
Ne tes ne fu escriz an livre.
Et la processions passa,
Mes anmi la sale amassa
Antor la biere uns granz toauz ;
Que li sans chauz, clers et vermauz
Rissi au mort parmi la plaie.
Et ce fu provance veraie,
Qu'ancore estoit leanz sanz faille
Cil, qui feite avoit la bataille,
Et qui l'avoit mort et conquis.
Lors ont par tot cerchié et quis
Et reverchié et remüé
Tant que tuit furent tressüé
Et de l'angoisse et del tooil,
Qu'il orent por le sanc vermoil,
Qui devant aus fu degotez ;
Si fu mout feruz et botez
Mes sire Yvains la, ou il jut,
N'onques por ce ne se remut.
Et les janz plus et plus desvoient
Por les plaies, qui escrevoient,
Si se mervoillent, por quoi saingnent,
Ne ne sevent, a quoi s'an praingnent.
Et dit chascuns et cist et cist :
„Antre nos est cil, qui l'ocist,
Ne nos ne le veomes mie.
Ce est mervoille et deablie.“
Por ce tel duel par demenoit
La dame, qu'ele forsenoit
Et crioit come fors del san :
„Ha ! Des ! don ne trovera l'an
L'omecide, le traïtor,
Qui m'a ocis mon buen seignor ?
Buen ? Voire le meillor des buens !
Voirs Des, li torz an sera tuens,
S'einsi le leisses eschaper.
Autrui que toi n'an sai blasmer ;
Que tu le m'anbles a veüe.
Ains tes force ne fu veüe
Ne si lez torz, con tu me fes,
Que nes veoir tu ne me les
Celui, qui est si pres de moi.
Bien puis dire, quant je nel voi,
Que antre nos s'est ceanz mis
Ou fantosmes ou anemis,
S'an sui anfantosmee tote.
Ou il est coarz, si me dote :
Coarz est il, quant il me crient.
De grant coardise li vient,
Quant devant moi mostrer ne s'ose.
Ha ! fantosmes, coarde chose !
Por qu'ies vers moi acoardie,
Quant vers mon seignor fus hardie ?
Chose vainne, chose faillie,
Que ne t'ai ore an ma baillie !
Que ne te puis ore tenir !
Mes ce comant pot avenir,
Que tu mon seignor oceïs,
S'an traïson ne le feïs ?
Ja voir par toi conquis ne fust
Mes sire, se veü t'eüst ;
Qu'el monde son paroil n'avoit,
Ne Des ne hon ne l'i savoit,
N'il n'an i a mes nul de tes.
Certes, se tu fusses mortés,
N'osasses mon seignor atandre ;
Qu'a lui ne se pooit nus prandre.“