Vers 6229 à 6818

Mes sire Yvains parla einçois,
Qui mout estoit preuz et cortois.
Mes au parler nel reconut
Ses buens amis ; car ce li nut,
Qu'il avoit la parole basse
Et la voiz roe et foible et quasse ;
Que toz li sans li fu meüz
Des cos, qu'il avoit receüz.
„Sire !“, fet il, „la nuiz aproche.
Ja ne cuit, blasme ne reproche
I aiiens, se nuiz nos depart.
Mes tant di de la moie part,
Que mout vos dot et mout vos pris,
N'onques an ma vie n'anpris
Bataille, don tant me dossisse,
Ne chevalier, cui tant vossisse
Conoistre, ne cuidai veoir.
Bien savez voz cos asseoir
Et bien les savez anploiier.
Ains ne sot tant de cos paiier
Chevaliers, que je coneüsse.
Ja mon vuel tant n'an receüsse,
Con vos m'an avez hui presté ;
Tot m'ont vostre cop antesté.“
„Par foi !“, fet mes sire Gauvains,
„N'estes si estonez ne vains,
Que je autant ou plus ne soie.
Et se je vos reconoissoie,
Espoir ne vos greveroit rien.
Se je vos ai presté del mien,
Bien m'an avez randu le conte
Et del chatel et de la monte ;
Que larges estiiez del randre
Plus, que je n'estoie del prandre.
Mes, comant que la chose praingne,
Quant vos plest, que je vos apraingne,
Par quel non je sui apelez,
Ja mes nons ne vos iert celez ;
Gauvains ai non, fiz le roi Lot.“
Tantost con mes sire Yvains l'ot,
Si s'esbaïst et espert toz,
Par mautalant et par corroz
Flatist a la terre s'espee,
Qui tote estoit ansanglantee,
Et son escu tot depecié,
Si desçant del cheval a pié
Et dit : „Ha, las ! Quel mescheance !
Par trop leide mesconoissance
Ceste bataille feite avomes,
Qu'antreconeü ne nos somes ;
Que ja, se je vos coneüsse,
A vos conbatuz ne me fusse,
Ainz me clamasse recreant
Devant le cop, ce vos creant.“
„Comant ?“ fet mes sire Gauvains,
„Qui estes vos ?“ — „Je sui Yvains,
Qui plus vos aim qu'ome del monde,
Tant come il dure a la reonde :
Que vos m'avez amé toz jorz
Et enoré an totes corz.
Mes je vos vuel de cest afeire
Tel amande et tel enor feire,
Qu'outreemant outrez m'otroi.“
„Ice feriiez vos por moi ?“
Fet mes sire Gauvains, li douz ;
„Certes, trop seroie ore estouz,
Se je ceste amande an prenoie.
Ja certes ceste enors n'iert moie,
Ainz iert vostre, je la vos les.“
„Ha ! biaus sire, nel dites mes !
Que ce ne porroit avenir.
Je ne me puis mes sostenir,
Si sui atainz et sormenez.“
„Certes, de neant vos penez !“
Fet ses amis et ses conpainz ;
„Mes je sui conquis et atainz,
Ne je n'an di rien por losange ;
Qu'il n'a el monde si estrange,
Cui je autretant n'an deïsse,
Einçois que plus des cos sofrisse.“
Einsi parlant est desçanduz,
S'a li uns a l'autre tanduz
Les braz au col, si s'antrebeisent,
Ne de ce mie ne se teisent,
Que chascuns outrez ne se claint.
La tançons onques ne remaint,
Tant que li rois et li baron
Vienent corant tot anviron,
Ses voient antreconjoïr ;
Et mout desirrent a oïr,
Que ce puet estre, et qui cil sont,
Qui si grant joie s'antrefont.
„Seignor !“, fet li rois, „dites nos,
Qui si tost a mis antre vos
Ceste amistié et ceste acorde ?
Que tel haïne et tel descorde
I a hui tote jor eüe !“
„Sire ! ne vos iert pas teüe“,
Fet mes sire Gauvains, ses niés,
„La mescheance et li meschiés,
Don ceste bataille a esté.
Des que ci estes aresté
Por l'oïr et por le savoir,
Bien iert, qui vos an dira voir.
Gié Gauvains, qui vostre niés sui,
Mon conpaignon ne reconui,
Mon seignor Yvain, qui est ci,
Tant que il, la soe merci,
Si con De plot, mon non anquist.
Li uns a l'autre son non dist,
Lors si nos antreconeümes,
Quant bien antrebatu nos fumes.
Bien nos somes antrebatu :
Se nos nos fussiens conbatu
Ancore un po plus longuemant,
Il m'an alast trop malemant.
Car, par mon chief, il m'eüst mort
Par sa proesce et par le tort
Celi, qui m'avoit an chanp mis.
Mes or vuel miauz, que mes amis
M'et outré d'armes que tüé.“
Lors a trestot le sanc müé
Mes sire Yvains et si li dit :
„Biaus sire chiers ! se Des m'aït,
Trop avez grant tort de ce dire.
Mes bien sache li rois, mes sire,
Que je sui de ceste bataille
Outrez et recreanz sanz faille !“
„Mes gié.“ — „Mes gié“, fet cil et cil.
Tant sont andui franc et jantil,
Que la victoire et la corone
Li uns a l'autre otroie et done,
Ne cil ne cil ne la viaut prandre ;
Ainz fet chascuns par force antandre
Au roi et a totes les janz,
Qu'il est outrez et recreanz.
Mes li rois la tançon depiece,
Quant oïz les ot une piece ;
Car li oïrs mout li seoit
Et ce avuec, que il veoit,
Qu'il s'estoient antracolé,
S'avoit li uns l'autre afolé
Et anpirié an plusors leus.
„Seignor !“, fet il, „antre vos deus
A grant amor. Bien le mostrez,
Quant chascuns dit, qu'il est outrez.
Mes or vos an metez sor moi !
Et je l'atornerai, ce croi,
Si bien, qu'a enor vos sera,
Et toz siecles m'an loera.“
Lors ont andui acreanté,
Que il feront sa volanté
Tot einsi come il le dira.
Et li rois dit, qu'il partira
A bien et a foi la querele.
„Ou est“, fet il, „la dameisele,
Qui sa seror a fors botee
De sa terre et deseritee
Par force et par male merci ?“
„Sire !“, fet ele, „je sui ci.“
„La estes vos ? Venez donc ça !
Bien le savoie grant pieç'a,
Que vos la deseritiiez.
Ses droiz ne sera mes noiiez ;
Que coneü m'avez le voir.
Sa partie par estovoir
Vos covient tote clamer quite.“
„Sire !“, fet ele, „se j'ai dite
Une response nice et fole,
Ne me devez prandre a parole.
Por De ! sire, ne me grevez !
Vos estes rois, si vos devez
De tort garder et de mesprandre.“
„Por ce“, fet li rois, „vuel je randre
A vostre seror sa droiture ;
Que je n'oi onques de tort cure.
Et vos avez bien antandu,
Qu'an ma merci se sont randu
Vostre chevaliers et li suens.
Je ne dirai pas toz voz buens ;
Car vostre torz est coneüz.
Chascuns dit, qu'il est chanpcheüz,
Tant viaut li uns l'autre enorer.
A ce n'ai je que demorer :
Des que la chose est sor moi mise,
Ou vos feroiz a ma devise
Tot, quanque je deviserai
Sanz feire tort, ou je dirai,
Que mes niés est d'armes conquis.
Lors si vaudroit a vostre oés pis ;
Mes jel dirai contre mon cuer.“
Si nel deïst il a nul fuer ;
Mes il le dist por essaiier,
S'il la porroit tant esmaiier,
Qu'ele randist a sa seror
Son heritage par peor ;
Qu'il s'est aparceüz mout bien,
Que ele ne l'an randist rien
Por quanque dire li seüst,
Se force ou crieme n'i eüst.
Por ce qu'ele le dote et crient,
Li dit : „Biaus sire ! or me covient
Que je face vostre talant,
Mes mout an ai le cuer dolant.
Et jel ferai, que qu'il me griet,
S'avra ma suer ce, qui li siet.
De sa part de mon heritage
Li doing vos meïsme an ostage
Por ce, que plus seüre an soit.“
„Revestez l'an tot ore androit !“
Fet li rois, „et ele an devaingne
Vostre fame et de vos la taingne !
Si l'amez come vostre fame,
Et ele vos come sa dame
Et come sa seror germainne !“
Einsi li rois la chose mainne
Tant que de sa terre est seisie
La pucele, si l'an mercie.
Et li rois dit a son neveu,
Au chevalier vaillant et preu,
Que ses armes oster se lest,
Et mes sire Yvains, se lui plest,
Se relest les soes tolir ;
Car bien s'an pueent mes sofrir.
Lors se desarment li vassal,
Si se departent par igal ;
Et que que il se desarmoient,
Le lion corant venir voient,
Qui son seignor querant aloit.
Tot maintenant que il le voit,
Si comance grant joie a feire.
Lors veïssiez janz arriers treire :
Trestoz li plus hardiz s'an fuit.
„Estez“, fet mes sire Yvains, „tuit !
Por quoi fuiiez ? Nus ne vos chace.
Ne dotez ja, que mal vos face
Li lions, que venir veez !
De ce, s'il vos plest, me creez,
Qu'il est a moi et je a lui,
Si somes conpaignon andui.“
Lors sorent trestuit cil de voir,
Qui orent oï mantevoir
Les avantures au lion,
De lui et de son conpaignon,
Qu'onques ne fu autre que cist,
Qui le felon jaiant ocist.
Et mes sire Gauvains li dit :
„Sire conpainz ! se Des m'aït,
Mout m'avez hui avileni !
Mauveisemant vos ai meri
Le servise, que me feïstes
Del jaiant, que vos oceïstes
Por mes neveuz et por ma niece.
A vos ai je pansé grant piece,
Et por ce estoie angoisseus,
Que l'an disoit, qu'antre nos deus
Avoit amor et acointance.
Mout i ai pansé sanz dotance ;
Mes apanser ne me savoie,
N'onques oï parler n'avoie
De chevalier, que je seüsse,
An terre, ou je esté eüsse,
Que li Chevaliers au Lion
Fust nus apelez par son non.“
Desarmé sont einsi parlant,
Et li lions ne vint pas lant
Vers son seignor la, ou il sist.
Quant devant lui fu, si li fist
Grant joie come beste mue.
An anfermerie et an mue
Les an covient andeus mener ;
Car a lor plaies ressener
Ont mestier de mire et d'antret.
Devant lui mener les an fet
Li rois, qui mout chiers les avoit.
Un cirurgiien, qui savoit
De plaies garir plus que nus,
Lor fet mander li rois Artus.
Et cil del garir se pena
Tant que lor plaies ressena
Au miauz et au plus tost qu'il pot. —
Quant anbedeus gariz les ot,
Mes sire Yvains, qui sanz retor
Avoit son cuer mis an amor,
Vit bien, que durer ne porroit,
Mes por amor an fin morroit,
Se sa dame n'avoit merci
De lui ; qu'il se moroit por li.
Et pansa, qu'il se partiroit
Toz seus de cort et si iroit
A sa fontainne guerroiier,
Et s'i feroit tant foudroiier
Et tant vanter et tant plovoir,
Que par force et par estovoir
Li covandroit feire a lui pes,
Ou il ne fineroit ja mes
De la fontainne tormanter
Et de plovoir et de vanter.

Maintenant que mes sire Yvains
Santi, qu'il fu gariz et sains,
Si s'an parti, que nus nel sot ;
Mes avuec lui son lion ot,
Qui onques an tote sa vie
Ne vost leissier sa conpaignie.
Puis errerent tant que il virent
La fontainne et plovoir i firent.
Ne cuidiez pas, que je vos mante,
Que si fu fiere la tormante,
Que nus n'an conteroit le disme :
Qu'il sanbloit, que jusqu'an abisme
Deüst fondre la forez tote.
La dame de son chastel dote,
Que il ne fonde toz ansanble ;
Li mur crollent et la torz tranble
Si que par po qu'ele ne verse.
Miauz vossist estre pris an Perse
Li plus hardiz antre les Turs,
Qu'il fust leanz antre les murs.
Tel peor ont, que il maudïent
Trestoz lor ancessors, et dïent :
„Maleoiz soit li premiers hon,
Qui fist an cest païs meison,
Et cil, qui cest chastel fonderent !
Qu'an tot le monde ne troverent
Leu, que l'an deüst tant haïr ;
Qu'uns seus hon nos puet anvaïr
Et tormanter et traveillier.“
„De ceste chose conseillier
Vos covient, dame !“, fet Lunete ;
„Ne troveroiz, qui s'antremete
De vos eidier a cest besoing,
Se l'an nel va querre mout loing.
Ja mes voir ne reposerons
An cest chastel, ne n'oserons
Les murs ne la porte passer.
Qui avroit toz fet amasser
Voz chevaliers por cest afeire,
Ne s'an oseroit avant treire
Toz li miaudres, bien le savez ;
S'est ore einsi, que vos n'avez,
Qui deffande vostre fontainne,
Si sanbleroiz fole et vilainne.
Mout bele enor i avroiz ja,
Quant sanz bataille s'an ira
Cil, qui si vos a assaillie.
Certes, vos estes mal baillie,
S'autremant de vos ne pansez.“
„Tu“, fet la dame, „qui tant sez,
Me di, comant j'an panserai,
Et je a ton los an ferai.“
„Dame ! certes, se je savoie.
Volantiers vos conseilleroie ;
Mes vos avriiez grant mestier
De plus resnable conseillier.
Por ce si ne m'an os mesler,
Et le plovoir et le vanter
Avuec les autres soferrai,
Tant, se De plest, que je verrai
An vostre cort aucun prodome,
Qui prandra le fes et la some
De ceste bataille sor lui ;
Mes je ne cuit, que ce soit hui,
Si vaudra mout pis a vostre oés.“
Et la dame li respont lués :
„Dameisele ! car parlez d'el !
Leissiez la jant de mon ostel ;
Qu'an aus n'ai je nule atandue,
Que ja par aus soit deffandue
La fontainne ne li perrons.
Mes, se De plest, ore i verrons
Vostre consoil et vostre san ;
Qu'au besoing, toz jorz le dit an,
Doit an son ami esprover.“
„Dame ! qui cuideroit trover
Celui, qui le jaiant ocist
Et les trois chevaliers conquist,
Il le feroit buen aler querre ;
Mes tant come il avra la guerre
Et l'ire et le mal cuer sa dame,
N'a il soz ciel home ne fame,
Cui il siuist, mien esciant,
Jusquë il li jurt et fiant,
Qu'il fera tote sa puissance
De racorder la mesestance,
Que sa dame a si grant a lui,
Qu'il an muert de duel et d'enui.“
Et la dame dit : „Je sui preste,
Ainz que vos antroiz an la queste,
Que je vos plevisse ma foi,
Et jurerai, s'il vient a moi,
Que je sanz guile et sanz feintise
Li ferai tot a sa devise
Sa pes, se je feire la puis.“
Et Lunete li respont puis :
„Dame ! de ce ne dotez rien,
Que vos ne li puissiez mout bien
Sa pes feire, se il vos siet ;
Mes del seiremant ne vos griet,
Que je le prandrai tote voie,
Ainz que je me mete a la voie.“
„Ce“, fet la dame, „ne me poise.“
Lunete, qui mout fu cortoise,
Li fist tot maintenant fors treire
Un mout precïeus santüeire,
Et la dame a genouz s'est mise.
Au jeu de verité l'a prise
Lunete mout cortoisemant.
A l'eschevir del seiremant
Rien de son preu n'i oblia
Cele, qui eschevi li a.
„Dame !“, fet el, „hauciez la main !
Je ne vuel pas, qu'aprés demain
M'an metoiz sus ne ce ne quoi ;
Que vos n'an feites rien por moi :
Por vos meïsme le feroiz.
Se il vos plest, si jureroiz
Por le Chevalier au Lion,
Que vos an buene antancion
Vos peneroiz tant qu'il savra,
Que l'amor de sa dame avra
Tot aussi bien, come il l'ot onques.“
La main destre leva adonques
La dame et dist : „Trestot einsi,
Con tu l'as dit, et je le di,
Einsi m'aït Des et li sainz,
Que ja mes cuers ne sera fainz,
Que je tot mon pooir n'an face.
L'amor li randrai et la grace,
Que il siaut a sa dame avoir,
Se j'an ai force ne pooir.“

Ore a bien Lunete esploitié ;
De rien n'avoit tel coveitié,
Con de ce, que ele avoit fet.
Et l'an li avoit ja fors tret
Un palefroi soef anblant.
A bele chiere, a lié sanblant
Monte Lunete, si s'an va,
Tant que dessoz le pin trova
Celui, qu'ele ne cuidoit pas
Trover a si petit de pas ;
Ainz cuidoit, qu'il li covenist
Mout querre, ainz qu'a lui parvenist.
Par le lion l'a coneü,
Tantost come ele l'a veü,
Si vient vers lui grant aleüre
Et desçant a la terre dure.
Et mes sire Yvains la conut
De si loing come il l'aparçut,
Si la salue, et ele lui
Et dit : „Sire ! mout liee sui,
Quant je vos ai trové si pres.“
Et mes sire Yvains dit aprés :
„Comant ? Me queriiez vos donques ?“
„Oïl, sire ! et si ne fui onques
Si liee, des que je fui nee ;
Que j'ai ma dame a ce menee,
S'ele parjurer ne se viaut,
Que tot aussi come ele siaut,
Iert vostre dame et vos ses sire ;
Par verité le vos os dire.“
Mes sire Yvains formant s'esjot
De la novele, que il ot,
Qu'il ne cuidoit ja mes oïr.
Ne pot mie assez conjoïr
Celi, qui ce li a porquis.
Les iauz li beise et puis le vis,
Et dit : „Certes, ma douce amie !
Ce ne vos porroie je mie
Guerredoner an nule guise.
A vos feire enor et servise
Criem, que pooirs et tans me faille.“
„Sire !“, fet ele, „ne vos chaille,
Ne ja n'an soiiez an espans !
Qu'assez avroiz pooir et tans
A bien feire moi et autrui.
Se je ai fet ce, que je dui,
Si m'an doit an tel gre savoir,
Con celui, qui autrui avoir
Anprunte et puis si le repaie.
Ancor ne cuit, que je vos aie
Randu ce, que je vos devoie.“
„Si avez fet, se Des me voie,
A plus de cinc çanz mile droiz.
Ore an irons, quant vos voldroiz.
Mes avez li vos dit de moi,
Qui je sui ?“ — „Naie, par ma foi !
Ne ne set, comant avez non
Se Chevaliers au Lion non.“

Einsi parlant s'an vont adés,
Et li lions toz jorz aprés,
Tant qu'au chastel vindrent tuit troi.
Ains ne distrent ne ce ne quoi
El chastel n'a home n'a fame,
Tant qu'il vindrent devant la dame.
Et la dame mout s'esjoï
Tantost con la novele oï
De la pucele, qui venoit,
Et de ce, que ele amenoit
Le lion et le chevalier,
Qu'ele voloit mout acointier
Et mout conoistre et mout veoir.
A ses piez s'est leissiez cheoir
Mes sire Yvains trestoz armez,
Et Lunete, qui fu delez,
Li dit : „Dame ! relevez l'an
Et metez painne et force et san
A la pes querre et au pardon,
Que nus ne li puet se vos non
An tot le monde porchacier !“
Lors le fet la dame drecier
Et dit : „Mes pooirs est toz suens !
Ses volantez feire et ses buens
Voldroie mout, que je poïsse.“
„Certes, dame ! ja nel deïsse“,
Fet Lunete, „se ne fust voirs.
Toz an est vostre li pooirs
Assez plus, que dit ne vos ai ;
Mes des or mes vos an dirai
La verité, si la savroiz :
Ains n'eüstes ne ja n'avroiz
Si buen ami come cestui.
Des, qui viaut, qu'antre vos et lui
Et buene pes et buene amor,
Tel, qui ja ne faille a nul jor,
Le m'a hui fet si pres trover.
Ja a la verité prover
Ne covient autre reison dire :
Dame ! pardonez li vostre ire !
Que il n'a dame autre que vos.
C'est mes sire Yvains, vostre espos.“

A cest mot la dame tressaut
Et dit : „Se Damedés me saut,
Bien m'avez au hoquerel prise !
Celui, qui ne m'aimme ne prise,
Me feras amer maugré mien.
Ore as tu esploitié mout bien,
Or m'as tu mout a gre servie !
Miauz vossisse tote ma vie
Vanz et orages andurer !
Et se ne fust de parjurer
Trop leide chose et trop vilainne,
Ja mes a moi por nule painne
Pes ne acorde ne trovast.
Toz jorz mes el cors me covast,
Si con li feus cove an la çandre,
Ce, don je ne vuel or reprandre,
Ne ne me chaut del recorder,
Puis qu'a lui m'estuet acorder.“

Mes sire Yvains ot et antant,
Que ses afeires bien li prant,
Qu'il avra sa pes et s'acorde,
Et dit : „Dame ! misericorde
Doit an de pecheor avoir.
Conparé ai mon fol savoir,
Et je le dui bien conparer.
Folie me fist demorer,
Si m'an rant coupable et forfet.
Et mout grant hardemant ai fet,
Quant devant vos osai venir ;
Mes s'or me volez retenir,
Ja mes ne vos mesferai rien.“
„Certes“, fet ele, „je vuel bien,
Por ce, que parjure seroie,
Se tot mon pooir n'an feisoie
De pes feire antre vos et moi.
S'il vos plest, je la vos otroi.“
„Dame !“, fet il, „cinc çanz merciz !
Einsi m'aït sainz Esperiz,
Que Des an cest siecle mortel
Ne me porroit lié feire d'el !“

Ore a mes sire Yvains sa pes,
Si poez croire, qu'onques mes
Ne fu de rien nule si liez,
Comant qu'il et esté iriez.
Mout an est a buen chief venuz ;
Qu'il est amez et chier tenuz
De sa dame, et ele de lui.
Ne li sovient de nul enui ;
Que par la joie les oblie,
Qu'il a de sa tres chiere amie.
Et Lunete rest mout a eise :
Ne li faut chose, qui li pleise,
Des qu'ele a feite pes sanz fin
De mon seignor Yvain, le fin,
Et de s'amie chiere et fine.

Del Chevalier au Lion fine
Crestiiens son romanz einsi ;
Qu'onques plus conter n'an oï,
Ne ja plus n'an orroiz conter,
S'an n'i viaut mançonge ajoster.