Vers 5771 à 6228

Tantost mes sire Yvains s'an torne ;
Que el chastel plus ne sejorne,
Et s'an a devant lui menees
Les cheitives desprisonees,
Que li sire li a bailliees
Povres et mal apareilliees ;
Mes or sont riches, ce lor sanble.
Fors del chastel totes ansanble
Devant lui deus et deus s'an issent.
Je ne cuit pas, qu'eles feïssent
Tel joie, come eles li font,
De celui, qui fist tot le mont,
S'il fust venuz de ciel an terre.
Merci et pes li vont requerre
Totes les janz, qui dit li orent
Tant de honte, come il plus porent,
Si le vont einsi conveant ;
Et il dit, qu'il n'an set neant.
„Je ne sai,“ fet il, „que vos dites,
Et si vos an claim trestoz quites ;
Qu'onques chose, que a mal taingne,
Ne deïstes, don moi sovaingne.“
Cil sont mout lié de ce, qu'il öent,
Et sa corteisie mout loent,
Si le comandent a De tuit,
Quant grant piece l'orent conduit.
Et les dameiseles li ront
Congié demandé, si s'an vont.
Au partir totes li anclinent
Et si li orent et destinent,
Que Des li doint joie et santé
Et venir a sa volanté,
An quel leu que il onques aut.
Et cil respont, que Des les saut,
Cui la demore mout enuie.
„Alez !“ fet il ; „Des vos conduie
An voz païs sainnes et liees !“
Maintenant se sont avoiiees,
Si s'an vont grant joie menant. —
Et mes sire Yvains maintenant
De l'autre part se rachemine.
D'errer a grant esploit ne fine
Trestoz les jorz de la semainne,
Si con la pucele l'an mainne,
Qui la voie mout bien savoit
Et le recet, ou ele avoit
Leissiee la deseritee
Desheitiee et desconfortee.
Mes quant ele oï la novele
De la venue a la pucele
Et del Chevalier au Lion,
Ne fu joie se cele non,
Que ele an ot dedanz son cuer :
Car or cuide ele, que sa suer
De son heritage li lest
Une partie, se li plest.
Malade ot geü longuemant
La pucele et novelemant
Estoit de son mal relevee,
Qui duremant l'avoit grevee,
Si que bien paroit a sa chiere.
A l'ancontre tote premiere
Lor est alee sanz demore,
Si les salue et les enore
De quanquë ele set et puet.
De la joie parler n'estuet,
Qui fu la nuit a l'ostel feite.
Ja parole n'an iert retreite ;
Que trop i avroit a conter.
Tot vos trespas jusqu'au monter
De l'andemain, qu'il s'an partirent.
Puis errerent tant, que il virent
Le chastel, ou li rois Artus
Ot sejorné quinzainne ou plus.
Et la dameisele i estoit,
Qui sa seror deseritoit ;
Qu'ele avoit puis mout pres tenue
La cort, s'atandoit la venue
Sa seror, qui vient et aproche.
Mes mout petit au cuer li toche ;
Qu'ele ne cuide, qu'ele truisse
Nul chevalier, qui sofrir puisse
Mon seignor Gauvain an estor,
Ne il n'i avoit mes qu'un jor
De la quarantainne a venir.
L'eritage sole a tenir
Eüst desresnié quitemant
Par reison et par jugemant,
Se cil seus jorz fust trespassez.
Mes plus i a a feire assez,
Qu'ele ne cuide ne ne croit. —
An un ostel bas et estroit
Fors del chastel cele nuit jurent,
Ou nules janz ne les conurent ;
Car se il el chastel jeüssent,
Totes les janz les coneüssent,
Et de ce n'avoient il soing.
L'andemain a mout grant besoing
A l'aube aparissant s'an issent,
Si se reponent et tapissent,
Tant que li jorz fu clers et granz.

Jorz avoit passez, ne sai quanz,
Que mes sire Gauvains s'estoit
Destornez, si qu'an ne savoit
A cort de lui nule novele
Fors que solemant la pucele,
Por cui il se devoit conbatre.
Pres a trois liues ou a quatre
S'estoit de la cort trestornez
Et vint a cort si atornez,
Que reconoistre ne le porent
Cil, qui a toz jorz veü l'orent,
As armes, que il aporta.
La dameisele, qui tort a
Vers sa seror trop an apert,
Veant toz l'a a cort ofert,
Que par lui desresnier voldroit
La querele, ou ele n'a droit,
Et dit au roi : „Sire ! ore passe.
Jusqu'a po sera none basse
Et li derriiens jorz est hui,
Si veez bien, comant je sui
Garnie a mon droit maintenir.
Se ma suer deüst revenir,
N'i eüst mes que demorer.
De an puisse je aorer,
Quant ele ne vient ne repeire.
Bien i pert, que miauz ne puet feire,
Si s'est por neant traveilliee.
Et j'ai esté apareilliee
Toz les jorz jusqu'au derriien
A desresnier ce, qui est mien.
Tot ai desresnié sanz bataille,
S'est or mes droiz, que je m'an aille
Tenir mon heritage an pes ;
Que je n'an respondroie mes
A ma seror tant, con je vive,
Si vivra dolante et cheitive.“
Et li rois, qui mout bien savoit,
Que la pucele tort avoit
Vers sa seror trop desleal,
Li dit : „Amie ! an cort real
Doit an atandre, par ma foi,
Tant con la justise le roi
Siet et atant por droiturier.
N'i a rien del corjon ploiier ;
Qu'ancor vandra trestot a tans
Vostre suer, si come je pans.“
Ainz que li rois eüst ce dit,
Le Chevalier au Lion vit
Et la pucele delez lui.
Seul a seul venoient andui ;
Car del lion anblé se furent ;
Si fu remés la, ou il jurent.

Li rois la pucele a veüe,
Si ne l'a pas desconeüe,
Et mout li plot et abeli,
Quant il la voit ; car devers li
De la querele se tenoit
Por ce, que au droit antandoit.
De la joie, que il an ot,
Li dist au plus tost que il pot :
„Ore avant, bele ! Des vos saut !“
Quant l'autre l'ot, tote tressaut,
Si se trestorne, si la voit
Et le chevalier, qu'ele avoit
Amené por son droit conquerre,
Si devint plus noire que terre.
Mout fu bel de toz apelee
La pucele, et ele est alee
Devant le roi la, ou il sist.
Quant devant lui fu, si li dist :
„Des saut le roi et sa mesniee !
Rois ! s'or puet estre desresniee
Ma droiture ne ma querele
Par un chevalier, donc l'iert ele
Par cestui, la soe merci,
Qui m'a seüe an jusque ci ;
S'eüst il mout aillors a feire,
Li frans chevaliers de bon' eire ;
Mes de moi li prist tes pitiez,
Qu'il a arriere dos gitiez
Toz ses afeires por le mien.
Or feroit corteisie et bien
Ma dame, ma tres chiere suer,
Que j'aim autant come mon cuer,
S'ele de mon droit me leissoit,
Tant qu'antre moi et li pes soit ;
Que je ne demant rien del suen.“
„Ne gié“, fet ele, „rien del tuen ;
Que tu n'as rien ne ja n'avras.
Ja tant preechier ne savras,
Que rien an porz por preechier.
Tote an porras de duel sechier.“
Et l'autre respont maintenant,
Qui assez savoit d'avenant
Et mout estoit sage et cortoise.
„Certes“, fet ele, „mout me poise,
Que por nos deus se conbatront
Dui si prodome con cist sont,
S'est la querele mout petite.
Mes je ne la puis clamer quite ;
Que trop grant mestier an avroie.
Por ce plus buen gre vos savroie,
Se vos me randiiez mon droit.“
„Certes, qui or te respondroit“,
Fet l'autre, „mout seroit musarde.
Maus feus et male flame m'arde,
Se je te doing, don miauz te vives !
Einçois assanbleront les rives
De Sainne et sera prime none,
Se la bataille nel te done.“
„Des et li droiz, que je i ai,
An cui je me fi et fiai
Toz tans jusqu'au jor, qui est hui,
An soit an aïe a celui,
Qui par aumosne et par franchise
Se porofre de mon servise,
Si ne set il, qui je me sui,
Ne ne me conoist ne je lui.“

Tant ont parlé qu'a tant remainnent
Les paroles, et si amainnent
Les chevaliers anmi la cort.
Et toz li pueples i acort,
Si come a tel afeire suelent
Corre les janz, qui veoir vuelent
Cos de bataille et d'escremie.
Mes ne s'antreconoissent mie
Cil, qui conbatre se voloient,
Qui mout antramer se soloient.
Et or don ne s'antraimment il ?
„Oïl“ vos respong et „nenil.“
Et l'un et l'autre proverai,
Si que reison i troverai.
Por voir, mes sire Gauvains aimme
Yvain et conpaignon le claimme,
Et Yvains lui, ou que il soit.
Neïs ci, s'il le conoissoit,
Feroit il ja de lui grant feste
Et si metroit por lui sa teste,
Et cil la soe aussi por lui,
Einçois qu'an li feïst enui.
N'est ce amors antiere et fine ?
Oïl, certes. Et la haïne,
Don ne rest ele tote aperte ?
Oïl ; que ce est chose certe,
Que li uns a l'autre sanz dote
Voldroit avoir la teste rote,
Ou tant avoir fet li voldroit
De honte, que pis an vaudroit.
Par foi ! c'est mervoille provee,
Qu'an a an un veissel trovee
Amor et Haïne mortel.
Des ! meïsmes an un ostel
Comant puet estre li repeires
A deus choses, qui sont contreires ?
An un ostel, si con moi sanble,
Ne pueent eles estre ansanble ;
Que ne porroit pas remenoir
L'une avuec l'autre an un menoir,
Que noise et tançon n'i eüst,
Puis que l'une l'autre i seüst.
Mes an un chas a plusors manbres ;
Que il i a loges et chanbres.
Einsi puet bien estre la chose :
Espoir Amors s'estoit anclose
An aucune chanbre celee,
Et Haïne s'an iere alee
Es loges par devers la voie,
Por ce que viaut, que l'an la voie.
Ore est Haïne mout an coche ;
Qu'ele esperone et point et broche
Sor Amor, quanquë ele puet,
Et Amors onques ne se muet.
Ha ! Amors, ou es tu reposte ?
Car t'an is ! si verras, quel oste
Ont sor toi amené et mis
Li anemi a tes amis.
Li anemi sont cil meïsme,
Qui s'antraimment d'Amor saintisme ;
Qu'Amors, qui n'est fausse ne fainte,
Est precïeuse chose et sainte.
Ci est Amors avugle tote,
Et Haïne ne revoit gote ;
Qu'Amors deffandre lor deüst,
Se ele les reconeüst,
Que li uns l'autre n'adesast
Ne feïst rien, qui li pesast.
Por ce est Amors avuglee
Et desconfite et desjuglee,
Que çaus, qui tot sont suen a droit,
Ne reconoist, et si les voit.
Et Haïne dire ne set,
Por quoi li uns d'aus l'autre het,
Ses viaut feire mesler a tort,
Si het li uns l'autre de mort.
N'aimme pas, ce poez savoir,
L'ome, qui le voldroit avoir
Honi et qui sa mort desirre.
Comant ? Viaut donc Yvains ocirre
Mon seignor Gauvain, son ami ?
Oïl, et il lui autressi.
Si voldroit mes sire Gauvains
Yvain ocirre de ses mains
Ou feire pis, que je ne di ?
Nenil, ce vos jur et afi.
Li uns ne voldroit avoir fet
A l'autre ne honte ne let
Por quanque Des a fet por home
Ne por tot l'anpire de Rome.
Ore ai je manti leidemant ;
Que l'an voit bien apertemant,
Que li uns viaut anvaïr l'autre
Lance levee sor le fautre,
Et li uns l'autre viaut blecier
Por lui leidir et anpirier,
Que ja de rien ne s'an feindra.
Or dites : De cui se pleindra
Cil, qui des cos avra le pis,
Quant li uns l'autre avra conquis ?
Car, s'il font tant, qu'il s'antrevaingnent,
Grant peor ai, qu'il ne maintaingnent
Tant la bataille et la meslee,
Qu'ele iert de l'une part outree.
Porra Yvains par reison dire,
Se la soe partie est pire,
Que cil li et fet let ne honte,
Qui antre ses amis le conte,
N'ains ne l'apela par son non
Se ami et conpaignon non ?
Ou, s'il avient par avanture,
Que cil li reface leidure,
Ou de que que soit le sormaint,
Avra il droit, se il se plaint ?
Nenil ; qu'il ne savra de cui. —
Antresloignié se sont andui,
Por ce qu'il ne s'antreconoissent.
A l'assanbler lor lances froissent,
Qui grosses ierent et de fresne.
Li uns l'autre de rien n'aresne ;
Car s'il antraresnié se fussent,
Autre assanblee feite eüssent.
Ja n'eüst a lor assanblee
Feru de lance ne d'espee :
Antrebeisier et acoler
S'alassent ainz que afoler ;
Qu'il s'antrafolent et mehaingnent.
Les espees rien n'i gaaingnent
Ne li hiaume ne li escu,
Qui anbuignié sont et fandu,
Et des espees li tranchant
Esgrunent et vont rebochant ;
Car il se donent mout granz flaz
Des tranchanz, non mie des plaz,
Et des pons redonent tes cos
Sor les nasés et sor les cos
Et sor les fronz et sor les joes,
Que totes sont perses et bloes
La, ou li sans quace dessoz.
Et les haubers ont si deroz
Et les escuz si depeciez,
N'i a celui, ne soit bleciez.
Et tant se painnent et travaillent,
A po qu'alainnes ne lor faillent ;
Si se conbatent une chaude,
Que jagonce ne esmeraude
N'ot sor les hiaumes atachiee,
Ne soit molue et esquachiee ;
Car des pons si granz cos se donent
Sor les hiaumes, que tuit s'estonent
Et par po qu'il ne s'escervelent.
Li oel des chiés lor estancelent ;
Qu'il ont les poinz quarrez et gros
Et forz les ners et durs les os,
Si se donent males groigniees
A ce qu'il tienent anpoigniees
Les espees, qui grant aïe
Lor font, quant il fierent a hie.

Quant grant piece se sont lassé,
Tant que li hiaume sont quassé
Et li hauberc tot desmaillié,
(Tant ont des espees maillié,)
Et li escu fandu et fret,
Un po se sont arriere tret ;
Si leissent reposer lor vainnes
Et si repranent lor alainnes.
Mes n'i font mie grant demore,
Ainz cort li uns a l'autre sore
Plus fieremant qu'ains mes ne firent.
Et tuit dïent, que mes ne virent
Deus chevaliers plus corageus.
„Ne se conbatent mie a jeus,
Einçois le font trestot a certes.
Les merites ne les dessertes
Ne lor an seront ja randues.“
Cez paroles ont antandues
Li dui ami, qui s'antrafolent,
S'antandent, que les janz parolent
Des deus serors antracorder ;
Mes la pes ne pueent trover
Devers l'ainznee an nule guise.
Et la mainsnee s'estoit mise
Sor ce, que li rois an diroit ;
Que ja rien n'an contrediroit.
Mes l'ainznee estoit si anrievre,
Que nes la reïne Guenievre
Et li chevalier et li rois
Et les dames et li borjois
Devers la mainsnee se tienent,
Et tuit le roi proiier an vienent,
Que maugré l'ainznee seror
Doint de la terre a la menor
La tierce partie ou la quarte,
Et les deus chevaliers departe,
Qui trop sont de grant vasselage.
Et trop i avroit grant domage,
Se li uns d'aus l'autre afoloit
Et point de s'enor li toloit.
Et li rois dit, que de la pes
Ne s'antremetroit il ja mes ;
Que l'ainznee suer n'an a cure,
Tant par est male creature.
Totes cez paroles oïrent
Li dui, qui des cos s'antranpirent,
Si qu'a toz est a grant mervoille,
Que la bataille est si paroille,
Que l'an ne set par nul avis,
Qui a le miauz ne qui le pis.
Et nes li dui, qui se conbatent,
Qui par martire enor achatent,
S'esmervoillent et esbaïssent ;
Que si par igal s'anvaïssent,
Qu'a grant mervoille chascun vient,
Qui est cil, qui se contretient
Ancontre lui si fieremant.
Tant se conbatent longuemant,
Que li jorz vers la nuit se tret,
Et si n'i a celui, qui n'et
Les braz las et le cors doillant,
Et li sanc tot chaut et boillant
Par mainz leus fors des cors lor bolent
Et par dessoz les haubers colent,
Ne n'est mervoille, s'il se vuelent
Reposer ; car formant se duelent.
Lors se reposent anbedui,
Et si panse chascuns par lui,
Qu'ore a il son paroil trové,
Conbien que il et demoré.
Longuemant einsi se reposent ;
Que rassanbler as armes n'osent.
N'ont plus de la bataille cure,
Que por la nuit, qui vient oscure,
Que por ce, que mout s'antredotent.
Cez deus choses an sus les botent
Et semonent, qu'an pes s'estoisent ;
Mes einçois que del chanp s'an voisent,
Se seront bien antracointié,
S'avra antre aus joie et pitié.