De l'enfance de Pantagruel
Je trouve par les anciens historiographes et poetes que plusieurs sont nez en ce monde en façons bien estranges, que seroient trop longues à racompter. Lisez le .vij. livre de Pline, si avés loysir ; mais vous n'en ouystes jamais d'une si merveilleuse comme fut celle de Pantagruel, car c'estoit chose difficille à croyre comme il creut en corps et en force en peu de temps, et n'estoit rien Hercules qui, estant au berseau, tua les deux serpens, car lesdictz serpens estoyent bien petitz et fragiles ; mais Pantagruel, estant encores au berseau, feist cas bien espouventables.
Je laisse icy à dire comment à chascun de ses repas il humoit le laict de quatre mille six cens vaches et comment, pour luy faire un paeslon à cuire sa bouillie, furent occupez tous les pesliers de Saumur en Anjou, de Villedieu en Normandie, de Bramont en Lorraine, et luy bailloit on ladicte bouillie en un grand timbre, qui est encores de present à Bourges près du palays ; mais les dentz luy estoient desjà tant crues et fortifiées qu'il en rompit, dudict tymbre, un grand morceau, comme tres bien apparoist.
Certain jour, vers le matin, que on le vouloit faire tetter une de ses vaches (car de nourrisses il n'en eut jamais aultrement, comme dict l'hystoire), il se deffit des liens qui le tenoyent au berceau un des bras, et vous prent ladicte vache par dessoubz le jarret et luy mangea les deux tetins et la moytié du ventre, avecques le foye et les roignons, et l'eust toute devorée, n'eust esté qu'elle cryoit horriblement comme si les loups la tenoient aux jambes, auquel cry le monde arriva, et osterent ladicte vache à Pantagruel ; mais ilz ne sceurent si bien faire que le jarret ne luy en demourast comme il le tenoit et le mangeoit très bien comme vous feriez d'une saulcisse, et, quand on luy voulut oster l'os, il l'avalla bien tost comme un cormaran feroit un petit poisson, et après commença à dire : « Bon ! bon ! bon ! » car il ne sçavoit encores bien parler, voulant donner à entendre que il avoit trouvé fort bon et qu'il n'en failloit plus que autant. Ce que voyans ceulx qui le servoyent, le lierent à gros cables comme sont ceulx que l'on faict à Tain pour le voyage du sel de Lyon, ou comme sont ceulx de la grand nauf Françoyse qui est au port de Grace en Normandie.
Mais, quelque foys que un grand ours, que nourrissoit son pere, eschappa et luy venoit lescher le visage, car les nourrisses ne luy avoyent bien à point torché les babines, il se deffist desdictz cables aussi facilement comme Sanson d'entre les Philistins, et vous print Monsieur de l'Ours, et le mist en pieces comme un poulet, et vous en fist une bonne gorge chaulde pour ce repas.
Par quoy craignant Gargantua qu'il se gastast, fist faire quatre grosses chaines de fer pour le lyer, et fist faire des arboutans à son berceau bien afustez. Et de ces chaines en avez une à La Rochelle, que l'on leve au soir entre les deux grosses tours du havre ; l'aultre est à Lyon, l'aultre à Angiers, et la quarte fut emportée des diables pour lier Lucifer, qui se deschainoit en ce temps là à cause d'une colicque qui le tormentoit extraordinairement pour avoir mangé l'ame d'un sergeant en fricassée à son desjeuner. Dont povez bien croire ce que dict Nicolas de Lyra, sur le passaige du Psaultier où il est escript : « Et Og regem Basan », que ledict Og, estant encores petit, estoit tant fort et robuste qu'il le failloit lyer de chaisnes de fer en son berceau. Et ainsi demoura coy et pacificque, car il ne pouvoit rompre tant facilement lesdictes chaisnes, mesmement qu'il n'avoit pas espace au berceau de donner la secousse des bras.
Mais voicy que arriva un jour d'une grande feste que son pere Gargantua faisoit un beau banquet à tous les princes de sa court. Je croy bien que tous les officiers de sa court estoyent tant occupés au service du festin que l'on ne se soucyoit du pauvre Pantagruel, et demouroit ainsi à reculorum. Que fist il ?
Qu'il fist, mes bonnes gens ? Escoutez.
Il essaya de rompre les chaisnes du berceau avecques les bras, mais il ne peut, car elles estoyent trop fortes. Adonc il trepigna tant des piedz qu'il rompit le bout de son berceau, qui toutesfoys estoit d'une grosse poste de sept empans en quarré, et, ainsi qu'il eut mys les piedz dehors, il se avalla le mieulx qu'il peut, en sorte que il touchoit les piedz en terre ; et alors avecques grande puissance se leva, emportant son berceau sur l'eschine ainsi lyé, comme une tortue qui monte contre une muraille, et à le veoir sembloit que ce feust une grande carracque de cinq cens tonneaulx qui feust debout. En ce point entra en la salle où l'on banquetoit, et hardiment, qu'il espoventa bien l'assistance ; mais, par autant qu'il avoit les bras lyez dedans, il ne povoit rien prendre à manger, mais en grande peine se enclinoit pour prendre à tout la langue quelque lippée. Quoy voyant, son pere entendit bien que l'on l'avoit laissé sans luy bailler à repaistre et commanda qu'il fut deslyé desdictes chesnes, par le conseil des princes et seigneurs assistans, ensemble aussi que les medicins de Gargantua disoyent que, si l'on le tenoit ainsi au berseau, qu'il seroit toute sa vie subject à la gravelle.
Lors qu'il feust deschainé, l'on le fist asseoir, et repeut fort bien, et mist son dict berceau en plus de cinq cens mille pieces d'un coup de poing qu'il frappa au millieu par despit, avec protestation de jamais n'y retourner.
Des faictz du noble Pantagruel en son jeune eage
Ainsi croissoit Pantagruel de jour en jour et prouffitoit à veue d'œil, dont son pere s'esjouyssoit par affection naturelle, et luy feist faire, comme il estoit petit, une arbaleste pour s'esbatre après les oysillons, qu'on appelle de present la grand arbaleste de Chantelle ; puis l'envoya à l'eschole pour apprendre et passer son jeune eage.
De faict, vint à Poictiers pour estudier, et proffita beaucoup ; auquel lieu, voyant que les escoliers estoyent aulcunes foys de loysir et ne sçavoient à quoy passer temps, il en eut compassion ; et un jour print d'un grand rochier qu'on nomme Passelourdin une grosse roche, ayant environ de douze toizes en quarré et d'espesseur quatorze pans, et la mist sur quatre pilliers au millieu d'un champ bien à son ayse, affin que lesdictz escoliers, quand ilz ne sçauroyent aultre chose faire, passassent le temps à monter sur ladicte pierre et là banqueter à force flacons, jambons et pastez, et escripre leurs noms dessus avec un cousteau, et de present l'appelle on la Pierre levée. Et en memoire de ce n'est aujourd'huy passé aulcun en la matricule de ladicte université de Poictiers, sinon qu'il ait beu en la fontaine Caballine de Croustelles, passé à Passelourdin et monté sur la Pierre levée.
En après, lisant les belles chronicques de ses ancestres, trouva que Geoffroy de Lusignan, dict Geoffroy à la grand dent, grand pere du beau cousin de la seur aisnée de la tante du gendre de l'oncle de la bruz de sa belle mere, estoit enterré à Maillezays, dont print un jour campos pour le visiter comme homme de bien. Et, partant de Poictiers avecques aulcuns de ses compaignons, passerent par Legugé, visitant le noble Ardillon, abbé, par Lusignan, par Sansay, par Celles, par Colonges, par Fontenay le Conte, saluant le docte Tiraqueau, et de là arriverent à Maillezays où visita le sepulchre dudict Geoffroy à la grand dent, dont il eut quelque peu de frayeur, voyant sa pourtraicture, car il y est en image comme d'un homme furieux, tirant à demy son grand malchus de la guaine, et demandoit la cause de ce. Les chanoines dudict lieu luy dirent que n'estoit aultre cause sinon que
Pictoribus atque poetis, etc.,
c'est-à-dire que les painctres et les poetes ont liberté de paindre à leur plaisir ce qu'ilz veullent. Mais il ne se contenta de leur responce, et dist :
« Il n'est ainsi painct sans cause, et me doubte que à sa mort on luy a faict quelque tord, duquel il demande vengeance à ses parens. Je m'en enquesteray plus à plein et en feray ce que de raison ».
Puys retourna non à Poictiers, mais voulut visiter les aultres universitez de France, dont, passant à La Rochelle, se mist sur mer et vint à Bourdeaulx, on quel lieu ne trouva grand excercice, sinon des guabarriers jouans aux luettes sur la grave.
De là vint à Thoulouse, où aprint fort bien à dancer et à jouer de l'espée à deux mains comme est l'usance des escholiers de ladicte université ; mais il n'y demoura gueres quand il vit qu'ilz faisoyent brusler leurs regens tout vifz comme harans soretz, disant : « Jà Dieu ne plaise que ainsi je meure, car je suis de ma nature assez alteré sans mé chauffer davantaige ! »
Puis vint à Montpellier où il trouva fort bon vins de Mirevaulx et joyeuse compagnie, et se cuida mettre à estudier en medicine ; mais il considera que l'estat estoit fascheux par trop et melancholicque, et que les medicins sentoyent les clisteres comme vieulx diables.
Pour tant vouloit estudier en loix ; mais, voyant que là n'estoient que troys teigneux et un pelé de legistes audict lieu, s'en partit, et au chemin fist le Pont du Guard et l'Amphitheatre de Nimes en moins de troys heures, qui toutesfoys semble œuvre plus
divin que humain ; et vint en Avignon où il ne fut troys jours
qu'il ne devint amoureux : car les femmes y jouent voluntiers du
serre cropyere parce que c'est terre papale.
Ce que voyant, son pedagogue, nommé Epistemon, l'en tira et le mena à Valence au Daulphiné ; mais il vit qu'il n'y avoit grand exercice et que les marroufles de la vile batoyent les escholiers, dont eut despit, et, un beau dimanche que tout le monde dansoit publiquement, un escholier se voulut mettre en dance, ce que ne permirent lesdictz marroufles. Quoy voyant, Pantagruel leur bailla à tous la chasse jusques au bort du Rosne, et les vouloit faire tous noyer ; mais ilz se musserent contre terre comme taulpes bien demye lieue soubz le Rosne. Le pertuys encores y apparoist.
Après il s'en partit, et à troys pas et un sault vint à Angiers, où il se trouvoit fort bien et y eust demeuré quelque espace, n'eust esté que la peste les en chassa.
Ainsi vint à Bourges, où estudia bien longtemps et proffita beaucoup en la faculté des loix, et disoit aulcunesfois que les livres des loix luy sembloyent une belle robbe d'or, triumphante et precieuse à merveilles, qui feust brodée de merde :
« Car, disoit il, au monde n'y a livres tant beaulx, tant aornés, tant elegans comme sont les textes des Pandectes ; mais la brodure d'iceulx, c'est assavoir la Glose de Accurse, est tant salle, tant infame et punaise, que ce n'est que ordure et villenie ».
Partant de Bourges, vint à Orleans, et là trouva force rustres d'escholiers qui luy firent grand chere à sa venue, et en peu de temps aprint avecque eulx à jouer à la paulme si bien qu'il en estoit maistre, car les estudians dudict lieu en font bel exercice, et le menoyent aulcunesfoys es Isles pour s'esbatre au jeu du Pouss'avant, et, au regard de se rompre fort la teste à estudier, il ne le faisoit mie de peur que la veue luy diminuast, mesmement que un quidam des regens disoit souvent en ses lectures qu'il n'y a chose tant contraire à la veue comme est la maladie des yeulx.
Et, quelque jour que l'on passa licentié en loix quelc'un des escholliers de sa congnoissance, qui de science n'en avoit gueres plus que sa portée, mais en recompense sçavoit fort bien danser et jouer à la paulme, il fist le blason et divise des licentiez en ladicte université, disant :
Un esteuf en la braguette,
En la main une raquette,
Une loy en la cornette,
Une basse dance au talon,
Vous voylà passé coquillon.