Comment Pantagruel rencontra un Limosin qui contrefaisoit le langaige Françoys
Quelque jour, je ne sçay quand, Pantagruel se pourmenoit après soupper avecques ses compaignons par la porte dont l'on va à Paris. Là rencontra un escholier tout jolliet qui venoit par icelluy chemin, et, après qu'ilz se furent saluez, luy demanda :
« Mon amy d'ont viens tu à ceste heure ? »
L'escholier luy respondit :
« De l'alme, inclyte et celebre academie que l'on vocite Lutece.
— Qu'est ce à dire, dist Pantagruel à un de ses gens ?
— C'est (respondit il) de Paris.
— Tu viens doncques de Paris, dist il ? Et à quoy passez vous le temps, vous aultres messieurs estudiens, audict Paris ? » Respondit l'escolier :
« Nous transfretons la Sequane au dilucule et crepuscule, nous deambulons par les compites et quadrivies de l'urbe ; nous despumons la verbocination Latiale et, comme verisimiles amorabonds, captons la benevolence de l'omnijuge, omniforme et omnigene sexe feminin. Certaines diecules nous invisons les lupanares, et en ecstase venereique inculcons nos veretres es penitissimes recesses des pudendes de ces meritricules amicabilissimes, puis cauponizons es tabernes meritoires de la Pomme de Pin, du Castel, de la Magdaleine et de la Mulle, belles spatules vervecines perforaminées de petrosil, et si, par forte fortune, y a rarité ou penurie de pecune en nos marsupies et soyent exhaustes de metal ferruginé, pour l'escot nous dimittons nos codices et vestes opignerées, prestolans les tabellaires à venir des Penates et Lares patriotiques. »
A quoy Pantagruel dist :
« Que diable de langaige est cecy ? Par Dieu, tu es quelque heretique.
— Seignor, non, dit l'escolier, car libentissiment, dès ce qu'il illucesce quelque minutule lesche du jour, je demigre en quelc'un de ces tant bien architectez monstiers, et là, me irrorant de belle eaue lustrale, grignotte d'un transon de quelque missicque precation de nos sacrificules, et, submirmillant mes precules horaires, elue et absterge mon anime de ses inquinamens nocturnes. Je revere les Olimpicoles, je venere latrialement le supernel Astripotent, je dilige et redame mes proximes, je serve les prescriptz Decalogicques et, selon la facultatule de mes vires, n'en discede le late unguicule. Bien est veriforme que, à cause que Mammone ne supergurgite goutte en mes locules, je suis quelque peu rare et lend à supereroger les eleemosynes à ces egenes, queritans leurs stipe hostiatement.
— Et bren, bren ! dist Pantagruel ! Qu'est ce que veult dire ce fol ? Je croys qu'il nous forge icy quelque langaige diabolique et qu'il nous cherme comme enchanteur. »
A quoy dist un de ses gens :
« Seigneur, sans doubte ce gallant veult contrefaire la langue des Parisians, mais il ne faict que escorcher le latin et cuide ainsi pindariser, et luy semble bien qu'il est quelque grand orateur en françoys parce qu'il dedaigne l'usance commun de parler. »
A quoy dict Pantagruel :
« Est il vray ? »
L'escholier respondit :
« Signor Missayre, mon genie n'est poinct apte nate à ce que dict ce flagitiose nebulon pour escorier la cuticule de nostre vernacule Gallicque ; mais vice versement je gnave opere, et par veles et rames je me enite de le locupleter de la redundance latinicome.
— Par Dieu, (dist Pantagruel) je vous apprendray à parler ; mais, devant, responds moy : dont es tu ? »
A quoy dist l'escholier :
« L'origine primeves de mes aves et ataves fut indigene des regions Lemovicques, où requiesce le corpore de l'agiotate sainct Martial.
— J'entens bien, dist Pantagruel ; tu es Lymosin, pour tout potaige, et tu veulx icy contrefaire le Parisian. Or vien çza, que je te donne un tour de pigne ! »
Lors le print à la gorge, luy disant :
« Tu escorche le latin ; par sainct Jean, je te feray escorcher le renard, car je te escorcheray tout vif. »
Lors commença le pauvre Lymosin à dire :
« Vée dicou, gentilastre ! Ho, sainct Marsault, adjouda my ! Hau hau, laissas à quau, au nom de Dious, et ne me touquas grou ! »
A quoy dist Pantagruel :
« A cesté heure parle tu naturellement. »
Et ainsi le laissa, car le pauvre Lymosin conchioit toutes ses chausses qui estoient faictes à queheue de merluz et non à plein fons ; dont dist Pantagruel :
« Sainct Alipentin, quelle civette ! Au diable soit le mascherabe, tant il put ! »
Et le laissa. Mais ce luy fut un tel remord toute sa vie et tant fut alteré qu'il disoit souvent que Pantagruel le tenoit à la gorge, et après quelques années mourut de la mort Roland, ce faisant la vengeance divine et nous demonstrant ce que dit le philosophe et Aule Gelle : qu'il nous convient parler selon le langaige usité et, comme disoit Octavian Auguste, qu'il fault eviter les motz espaves en pareille diligence que les patrons des navires evitent les rochiers de mer,
Comment Pantagruel vint à Paris, et des beaulx livres de la librairie de Sainct Victor
Après que Pantagruel eut fort bien estudié en Aurelians, il delibera visiter la grande université de Paris. Mais, devant que partir, fut adverty que une grosse et enorme cloche estoit à Sainct Aignan dudict Aurelians en terre, passez deux cens quatorze ans, car elle estoit tant grosse que par engin aulcun ne la povoit on mettre seullement hors terre, combien que l'on y eust applicqué tous les moyens que mettent Vitruvius de Architectura, Albertus de Re edificatoria, Euclides, Theon, Archimedes, et Hero de Ingeniis, car tout n'y servit de rien. Dont voluntiers encliné à l'humble requeste des citoyens et habitans de la dicte ville, delibera la porter au clochier à ce destiné.
De faict vint au lieu où elle estoit et la leva de terre avecques le petit doigt aussi facillement que feriez une sonnette d'esparvier. Et, devant que la porter au clochier, Pantagruel en voulut donner une aubade par la ville et la faire sonner par toutes les rues en la portant en sa main, dont tout le monde se resjouyst fort ; mais il en advint un inconvenient bien grand, car, la portant ainsi et la faisant sonner par les rues, tout le bon vin d'Orleans poulsa et se gasta. De quoy le monde ne se advisa que la nuyct ensuyvant, car un chascun se sentit tant alteré de avoir beu de ces vins poulsez qu'ilz ne faisoient que cracher aussi blanc comme cotton de Malthe, disans : « Nous avons du Pantagruel, et avons les gorges sallées. »
Ce faict, vint à Paris avecques ses gens, et à son entrée tout le monde sortit hors pour le veoir, comme vous sçavez bien que le peuple de Paris est sot par nature, par bequare et par bemol, et le regardoyent en grand esbahyssement et non sans grande peur qu'il n'emportast le Palais ailleurs, en quelque pays a remotis, comme son père avoit emporté les campanes de Nostre Dame pour atacher au col de sa jument.
Et, après quelque espace de temps qu'il y eut demouré et fort bien estudié en tous les sept ars liberaulx, il disoit que c'estoit une bonne ville pour vivre mais non pour mourir, car les guenaulx de Sainct Innocent se chauffoyent le cul des ossements des mors. Et trouva la librairie de Sainct Victor fort magnificque, mesmement d'aulcuns livres qu'il y trouva, desquelz s'ensuit le repertoyre, et primo :
Bigua Salutis.
Bragueta Juris.
Pantofla Decretorum.
Malogranatum Vitiorum.
Le Peloton de Theologie.
Le Vistempenard des Prescheurs, composé par Turelupin.
Le Couillebarine des Preux.
Les Hanebanes des Evesques.
Marmotretus de Baboinis et Cingis, cum commento d'Orbellis.
Decretum Universitatis Parisiensis super gorgiasitate Muliercularum ad placitum.
L'Apparition de saincte Geltrude à une Nonnain de Poissy estant en mal d'enfant.
Ars honeste pettandi in societate, per M. Ortuinum.
Le Moustardier de Penitence.
Les Houseaulx, alias les Bottes de Patience.
Formicarium Artium.
De brodiorum usu et honestate chopinandi, per Silvestrem, Prieratem Jacospinum.
Le Beliné en Court.
Le Cabat des Notaires.
Le Pacquet de Mariage.
Le Creziou de Contemplation.
Les Fariboles de Droict.
L'Aguillon de vin.
L'Esperon de fromaige.
Decrotatorium Scholarium.
Tartaretus, De modo cacandi.
Les Fanfares de Rome.
Bricot, De differentiis soupparum.
Le Culot de Discipline.
La Savate de Humilité.
Le Tripier de bon Pensement.
Le Chaulderon de Magnanimité.
Les Hanicrochemens des Confesseurs.
La Croquignolle des Curés.
Reverendi Patris Fratris Lubini, Provincialis Bavardie, De croquendis lardonibus libri tres.
Pasquili, Doctoris marmorei, De capreolis cum chardoneta comedendis tempore Papali ab Ecclesia interdicto.
L'Invention Saincte Croix, à six personnaiges, jouée par les clercs de Finesse.
Les Lunettes des Romipetes.
Majoris, De modo faciendi boudinos.
La Cornemuse des Prelatz.
Beda, De optimitate triparum.
La Complainte des Advocatz sus la Reformation des Dragées.
Le Chat fourré des Procureurs.
Des Poys au lart, cum Commento.
La Profiterolle des Indulgences.
Preclarissimi, Juris Utriusque Doctoris, Maistre Pilloti Racquedenari, De bobelinandis Glosse Accursiane baguenaudis Repetitio enucidiluculidissima.
Stratagemata Francarchieri de Baignolet.
Franctopinus, De re militari, cum figuris Tevoti.
De usu et utilitate escorchandi equos et equas, autore M. nostro de Quebecu.
La Rustrie des Prestolans.
M. n. Rostocostojambedanesse. De moustarda post prandium servienda lib. quatuordecim, apostilati per M. Vaurrillonis.
Le Couillaige des Promoteurs.
Questio subtillissima, utrum Chimera in vacuo bombinans possit comedere secundas intentiones, et fuit debatuta per decem hebdomadas in concilio Constantiensi.
Le Maschefain des Advocatz.
Barbouilamenta Scoti.
Le Ratepenade des Cardinaulx.
De calcaribus removendis decades undecim, per M. Albericum de Rosata.
Ejusdem, De castrametandis crinibus, lib. tres.
L'Entrée de Anthoine de Leive ès Terres du Bresil.
Marforii Bacalarii cubantis Rome, de pelendis mascarendisque Car-
dinalium mulis.
Apologie d'icelluy contre ceulx qui disent que la Mule du Pape ne
mange qu'à ces heures.
Pronostication, que incipit, « Silvi Triquebille » balata per M. n.
Songecrusyon.
Boudarini, episcopi, De emulgentiarum profectibus eneades novem, cum pri-
vilegio Papali ad triennium et postea non.
Le Chiabrena des Pucelles.
Le Cul pelé des Vefves.
La Cocqueluche des Moines.
Les Brimborions des Padres Celestins.
Le Barrage de Manducité.
Le Clacquedent des Marroufles.
La Ratouère des Theologiens.
L'Ambouchouoir des Maistres en Ars.
Les Marmitons de Olcam à simple tonsure.
Magistri n. Fripesaulcetis, De grabellationibus horrarum canonicarum lib. quadraginta.
Cullebutatorium confratriarum, incerto autore.
La Cabourne des Briffaulx.
Le Faguenat des Hespaignolz, supercoquelicanticqué par Frai Inigo.
La Barbotine des Marmiteux.
Poiltronismus rerum Italicarum, autore magistro Bruslefer.
R. Lullius, de batisfolagiis Principium.
Callibistratorium Caffardie, actore M. Jacobo Hocstratem, hereticometra.
Chaultcouillons, de Magistro nostrandorum Magistro nostratorumque beuvetis lib. octo gualantissimi.
Les Petarrades des Bullistes, Copistes, Scripteurs, Abbreviateurs, Referendaires et Dataires, compillées par Regis.
Almanach perpetuel pour les Gouteux et Verollez.
Maneries ramonandi fournellos, per M. Eccium.
Le Poulemart des Marchans.
Les Aisez de Vie monachale.
La Gualimaffrée des Bigotz.
L'Histoire des Farfadetz.
La Belistrandie des Millesouldiers.
Les Happelourdes des Officiaulx.
La Bauduffe des Thesauriers.
Badinatorium Sophistarum.
Antipericatametanaparbeugedamphicribrationes merdicantium.
Le Limasson des Rimasseurs.
Le Boutavent des Alchymistes.
La Nicquenocque des Questeurs, cababezacée par frère Serratis.
Les Entraves de Religion.
La Racquette des Brimbaleurs.
L'Acodouoir de Vieillesse.
La Museliere de Noblesse.
La Patenostre du Cinge.
Les Grezillons de Devotion.
La Marmite des Quatre Temps.
Le Mortier de Vie politicque.
Le Mouschet des Hermites.
La Barbute des Penitenciers.
Le Tric trac des Freres Frapars.
Lourdaudus, De vita et honestate Braguardorum.
Lyripipii Sorbonici moralisationes, per M. Lupoldum.
Les Brimbelettes des Voyageurs.
Les Potingues des Evesques potatifz.
Tarraballationes Doctorum Coloniensium adversus Reuchlin.
Les Cymbales des Dames,
La Martingalle des Fianteurs.
Virevoustatorum Nacquettorum, per F. Pedebilletis.
Les Bobelins de Franc Couraige.
La Mommerie des Rebatz et Lutins.
Gerson, De auferibilitate Pape ab Ecclesia.
La Ramasse des Nommez et Graduez.
Jo. Dytebrodi, De terribiliditate excomunicationum libellus acephalos.
Ingeniositas invocandi Diabolos et Diabolas, per M. Guinguolfum.
Le Hoschepot des Perpetuons.
La Morisque des Hereticques.
Les Henilles de Gaïetan.
Moillegroin, doctoris cherubici, De origine patepelutarum et torticollorum ritibus lib. septem.
Soixante et neuf Breviaires de haulte gresse.
Le Godemarre des cinq Ordres des Mendians.
La Pelletiere des Tyrelupins, extraicte de la Bote fauve incornifistibulée en la Somme Angelicque.
Le Ravasseur des Cas de conscience.
La Bedondaine des Presidens.
Le Vietdazouer des Abbez.
Sutoris adversus quendam, qui vocaverat eum fripponnatorem, et quod Fripponnatores non sunt damnati ab Ecclesia.
Cacatorium medicorum.
Le Rammonneur d'astrologie.
Campi Clysteriorum, per § C.
Le Tyrepet des apothecaires.
Le Baisecul de chirurgie.
Justinianus, De Cagotis tollendis.
Antidotarium anime.
Merlinus Coccaius, De Patria Diabolorum.
Desquelz aulcuns sont jà imprimez, et les aultres l'on imprime maintenant en ceste noble ville de Tubinge.