Comment Pantagruel entra en la ville des Amaurotes, et comment Panurge maria le roy Anarche et le feist cryeur de saulce vert
Après celle victoire merveilleuse, Pantagruel envoya Carpalim en la ville des Amaurotes dire et annoncer comment le roy Anarche estoit prins et tous leurs ennemys defaictz. Laquelle nouvelle entendue, sortirent au devant de luy tous les habitans de la ville, en bon ordre et en grande pompe triumphale, avecques une liesse divine, et le conduirent en la ville : et furent faictz beaulx feuz de joye par toute la ville, et belles tables rondes, garnies de force vivres, dressées par les rues. Ce feut un renouvellement du temps de Saturne, tant y fut faicte lors grande chere.
Mais Pantagruel, tout le senat ensemblé, dist :
« Messieurs, ce pendent que le fer est chault il le fault batre ; pareillement, devant que nous debaucher davantaige, je veulx que allions prendre d'assault tout le royaulme des Dipsodes.
« Pour tant, ceulx qui avecques moy vouldront venir se aprestent à demain après boire, car lors je commenceray marcher. Non qu'il me faille gens davantaige pour me ayder à le conquester, car autant vauldroit que je le tinse desjà ; mais je voy que ceste ville est tant pleine des habitans qu'il ne peuvent se tourner par les rues.
« Doncques je les meneray comme une colonie en Dipsode et leur donneray tout le pays, qui est beau, salubre, fructueux et plaisant sus tous les pays du monde, comme plusieurs de vous sçavent qui y estes allez aultreffoys. Un chascun de vous qui y vouldra venir soit prest comme j'ay dict. »
Ce conseil et deliberation fut divulgué par la ville, et au lendemain se trouverent en la place devant le palais jusque au nombre de dix huyct cens cinquante et six mille et unze, sans les femmes et petitz enfans. Ainsi commencerent à marcher droict en Dispodie, en si bon ordre qu'ilz ressembloyent es enfans d'Israël quand ilz partirent de Egypte pour passer la Mer Rouge.
Mais, davant que poursuyvre ceste entreprinse, je vous veulx dire comment Panurge traicta son prisonnier le roy Anarche. Il luy souvint de ce que avoit raconté Epistemon, comment estoient traictez les roys et riches de ce monde par les Champs Elisées, et comment ilz gaignoient pour lors leur vie à vilz et salles mestiers.
Pour tant un jour habilla son dict roy d'un beau petit pourpoint de toille, tout deschicqueté comme la cornette d'un Albanoys, et de belles chausses à la mariniere, sans souliers, car, (disoit il), ilz luy gasteroient la veue, et un petit bonnet pers avecques une grande plume de chappon, — je faulx, car il m'est advis qu'il y en avoit deux, — et une belle ceincture de pers et vert, disant que ceste livrée luy advenoit bien, veu qu'il avoit esté pervers.
En tel poinct l'amena davant Pantagruel, et luy dist :
« Congnoissez vous ce rustre ?
— Non, certes, dist Pantagruel.
— C'est Monsieur du roy de troys cuittes ; je le veulx faire homme de bien. Ces diables de roys icy ne sont que veaulx et ne sçavent ny ne valent rien, sinon à faire des maulx es pauvres subjectz et à troubler tout le monde par guerre pour leur inique et detestable plaisir. Je le veulx mettre à mestier et le faire crieur de saulce vert. Or commence à cryer : « Vous faut il poinct de saulce vert ? »
Et le pauvre diable cryoit.
« C'est trop bas, dist Panurge. » Et le print par l'aureille, disant : « Chante plus hault, en g, sol, ré, ut. Ainsi, diable ; tu as bonne gorge, tu ne fuz jamais si heureux que de n'estre plus roy. »
Et Pantagruel prenoit à tout plaisir, car je ause bien dire que c'estoit le meilleur petit bon homme qui fust d'icy au bout d'un baston. Ainsi feut Anarche bon cryeur de saulce vert.
Deux jours après, Panurge le maria avecques une vieille lanterniere, et luy mesmes fist les nopces, à belles testes de mouton, bonnes hastilles à la moustarde et beaulx tribars aux ailz, — dont il envoya cinq sommades à Pantagruel, lesquelles il mangea toutes, tant il les trouva appetissantes, — et à boire belle piscantine et beau cormé ; et, pour les faire dancer, loua un aveugle qui leur sonnoit la note avecques sa vielle.
Après disner les amena au palais et les monstra à Pantagruel, et luy dist, monstrant la mariée :
« Elle n'a garde de peter.
— Pourquoy, dist Pantagruel ?
— Pource, dist Panurge, qu'elle est bien entamée.
— Quelle parole est ce là ? dist Pantagruel.
— Ne voyez vous, dist Panurge, que les chastaignes qu'on faict cuire au feu, si elles sont entieres, elles petent que c'est raige, et, pour les engarder de peter, l'on les entame. Aussi ceste nouvelle mariée est bien entamée par le bas ; ainsi elle ne petera poinct. »
Pantagruel leur donna une petite loge, auprès de la basse rue, et un mortier de pierre à piler la saulce. Et firent en ce poinct leur petit mesnage, et feut aussi gentil cryeur de saulce vert qui feust oncques veu en Utopie ; mais l'on m'a dict despuis que sa femme le bat comme plastre, et le pauvre sot ne se ause defendre, tant il est niès.
Comment Pantagruel de sa langue couvrit toute une armée, et de ce que l'auteur veit dedans sa bouche
Ainsi que Pantagruel avecques toute sa bande entrerent es terres des Dipsodes, tout le monde en estoit joyeux, et incontinent se rendirent à luy, et de leur franc vouloir luy apporterent les clefz de toutes les villes où il alloit, exceptez les Almyrodes, qui voulurent tenir contre luy et feirent responce à ses heraulx qu'ilz ne se renderoyent sinon à bonnes enseignes.
« Quoy, dict Pantagruel, en demandent ilz meilleures que la main au pot et le verre au poing ? Allons, et qu'on me les mette à sac. »
Adonc tous se mirent en ordre comme deliberez de donner l'assault. Mais on chemin, passant une grande campaigne, furent saisiz d'une grosse housée de pluye, à quoy commencerent à se tresmousser et se serrer l'un l'aultre. Ce que voyant Pantagruel, leur fist dire par les capitaines que ce n'estoit rien et qu'il véoit bien au dessus des nuées que ce ne seroit qu'une petite rousée, mais à toutes fins qu'ilz se missent en ordre et qu'il les vouloit couvrir. Lors se mirent en bon ordre et bien serrez, et Pantagruel tira sa langue seulement à demy, et les en couvrit comme une geline faictz ses poulletz.
Ce pendent, je, qui vous fais ces tant veritables contes, m'estoit caché dessoubz une fueille de bardane qui n'estoit moins large que l'arche du pont de Monstrible ; mais, quand je les veiz ainsi bien couvers, je m'en allay à eulx rendre à l'abrit, ce que je ne peuz, tant ilz estoient, comme l'on dict : « Au bout de l'aulne fault le drap. » Doncques, le mieulx que je peuz, montay par dessus, et cheminay bien deux lieues sus sa langue tant que entray dedans sa bouche.
Mais, ô Dieux et Deesses, que veiz je là ? Juppiter me confonde de sa fouldre trisulque si j'en mens. Je y cheminoys comme l'on faict en Sophie à Constantinoble, et y veiz de grands rochiers comme les mons des Dannoys, je croy que c'estoient ses dentz, et de grands prez, de grandes forestz, de fortes et grosses villes, non moins grandes que Lyon ou Poictiers.
Le premier que y trouvay, ce fut un bon homme qui plantoit des choulx. Dont tout esbahy luy demanday :
« Mon amy, que fais tu icy ?
— Je plante, (dist il), des choulx.
— Et à quoy ny comment, dis je ?
— Ha, Monsieur, (dist il), chascun ne peut avoir les couillons aussi pesant q'un mortier, et ne pouvons estre tous riches. Je gaigne ainsi ma vie, et les porte vendre au marché en la cité qui est icy derriere.
— Jesus, dis je, il y a icy un nouveau monde ?
— Certes, (dist il), il n'est mie nouveau, mais l'on dist bien que hors d'icy y a une terre neufve où ilz ont et soleil et lune et tout plein de belles besoignes ; mais cestuy cy est plus ancien.
— Voire mais, (dis je), mon amy, comment a nom ceste ville où tu portes vendre tes choulx ?
— Elle a, (dist il), nom Aspharage, et sont christians, gens de bien, et vous feront grande chere. »
Bref, je deliberay d'y aller.
Or, en mon chemin, je trouvay un compaignon qui tendoit aux pigeons, auquel je demanday :
« Mon amy, d'ont vous viennent ces pigeons icy ?
— Cyre, (dist il), ils viennent de l'aultre monde. »
Lors je pensay que, quand Pantagruel basloit, les pigeons à pleines volées entroyent dedans sa gorge, pensans que feust un colombier.
Puis entray en la ville, laquelle je trouvay belle, bien forte et en bel air ; mais à l'entrée les portiers me demanderent mon bulletin, de quoy je fuz fort esbahy, et leur demanday :
« Messieurs, y a il ici dangier de peste ?
— O, Seigneur, (dirent ilz), l'on se meurt icy auprès tant que le charriot court par les rues.
— Vray Dieu, (dis je), et où ? »
A quoy me dirent que c'estoit en Laryngues et Pharingues, qui sont deux grosses villes telles que Rouen et Nantes, riches et bien marchandes, et la cause de la peste a esté pour une puante et infecte exhalation qui est sortie des abysmes despuis n'a gueres, dont ilz sont mors plus de vingt et deux cens soixante mille et seize personnes despuis huict jours.
Lors je pensé et calculé, et trouvé que c'estoit une puante halaine qui estoit venue de l'estomach de Pantagruel alors qu'il mangea tant d'aillade, comme nous avons dict dessus.
De là partant, passay entre les rochiers, qui estoient ses dentz, et feis tant que je montay sus une, et là trouvay les plus beaulx lieux du monde, beaulx grands jeux de paulme, belles galeries, belles praries, force vignes et une infinité de cassines à la mode Italicque, par les champs pleins de delices, et là demouray bien quatre moys et ne feis oncques telle chere pour lors.
Puis descendis par les dentz du derriere pour venir aux baulievres ; mais en passant je fuz destroussé des brigans par une grande forest que est vers la partie des aureilles.
Puis trouvay une petite bourgade à la devallée, j'ay oublié son nom, où je feiz encore meilleure chere que jamais, et gaignay quelque peu d'argent pour vivre. Sçavez-vous comment ? A dormir ; car l'on loue les gens à journée pour dormir, et gaignent cinq et six solz par jour ; mais ceulx qui ronflent bien fort gaignent bien sept solx et demy. Et contois aux senateurs comment on m'avoit destroussé par la valée, lesquelz me dirent que pour tout vray les gens de delà estoient mal vivans et brigans de nature, à quoy je congneu que, ainsi comme nous avons les contrées de deçà et delà les montz, aussi ont ilz deçà et delà les dentz ; mais il fait beaucoup meilleur deçà, et y a meilleur air.
Là commençay penser qu'il est bien vray ce que l'on dit que la moytie du monde ne sçait comment l'autre vit, veu que nul avoit encores escrit de ce pais là, auquel sont plus de xxv royaulmes habitez, sans les desers et un gros bras de mer, mais j'en ay composé un grand livre intitulé l'Histoire des Gorgias, car ainsi les ay-je nommez parce qu'ilz demourent en la gorge de mon maistre Pantagruel.
Finablement vouluz retourner, et, passant par sa barbe, me gettay sus ses epaulles, et de là me devallé en terre et tumbé devant luy.
Quand il me apperceut, il me demanda :
« D'ont viens tu, Alcofrybas ? » Je luy responds :
« De vostre gorge, Monsieur.
— Et despuis quand y es tu, dist il ?
— Despuis, (dis je), que vous alliez contre les Almyrodes.
— Il y a, (dist il), plus de six moys. Et de quoy vivois tu ? Que beuvoys tu ? » Je responds :
« Seigneur, de mesmes vous, et des plus frians morceaulx qui passoient par vostre gorge j'en prenois le barraige.
— Voire mais, (dist il), où chioys tu ?
— En vostre gorge, Monsieur, dis je.
— Ha, ha, tu es gentil compaignon, (dist il). Nous avons, avecques l'ayde de Dieu, conquesté tout le pays des Dipsodes ; je te donne la chatellenie de Salmigondin.
— Grand mercy, (dis je), Monsieur. Vous me faictes du bien plus que n'ay deservy envers vous. »