Comment Pantagruel feut malade, et la façon comment il guerit
Peu de temps après, le bon Pantagruel tomba malade et feut tant prins de l'estomach qu'il ne pouvoit boire ny manger, et, parce q'un malheur ne vient jamais seul, luy print une pisse chaulde qui le tormenta plus que ne penseriez ; mais ses medicins le secoururent, et très bien, avecques force de drogues lenitives et diureticques, le feirent pisser son malheur.
Son urine tant estoit chaulde que despuis ce temps là elle n'est encores refroydie, et en avez en France, en divers lieulx, selon qu'elle print son cours, et l'on l'appelle les bains chaulx, comme :
A Coderetz,
A Limons,
A Dast,
A Balleruc,
A Neric,
A Bourbonnensy et ailleurs
En Italie :
A Mons Grot,
A Appone,
A Sancto Petro dy Padua,
A Saincte Helene,
A Casa Nova,
A Sancto Bartholomeo.
En la Conté de Bouloigne,
A la Porrette,
Et mille aultres lieux,
Et m'esbahis grandement d'un tas de folz philosophes et medicins, qui perdent temps à disputer d'ont vient la chaleur de ces dictes eaulx, ou si c'est à cause du baurach, ou du soulphre, ou de l'allun, ou du salpetre qui est dedans la minere, car ilz ne y font que ravasser, et mieulx leur vauldroit se aller froter le cul au panicault que de perdre ainsi le temps à disputer de ce dont ilz ne sçavent l'origine ; car la resolution est aysée, et n'en fault enquester davantaige que lesdictz bains sont chaulx parce que ilz sont yssuz par une chaulde pisse du bon Pantagruel.
Or, pour vous dire comment il guerist de son mal principal, je laisse icy comment, pour une minorative, il print
Quatre quintaulx de Scammonnes colophoniacque,
Six vingt et dix huyt charretées de casse,
Unze mille neuf cens livres de reubarbe.
Sans les aultres barbouillemens.
Il vous fault entendre que, par le conseil des medicins, feut decreté qu'on osteroit ce que luy faisoit le mal à l'estomach. Pour ce, l'on fist xvii grosses pommes de cuyvre, plus grosses que celle qui est à Romme à l'aguille de Virgile, en telle façon qu'on les ouvroit par le mylieu et fermoit à un ressort.
En l'une entra un de ses gens portant une lanterne et un flambeau allumé, et ainsi l'avalla Pantagruel comme une petite pillule.
En cinq aultres entrerent troys payzans, chascun ayant une pasle à son col ;
En sept aultres entrerent sept porteurs de coustrets, chascun ayant une corbeille à son col, et ainsi furent avallées comme pillules.
Quand furent en l'estomach, chascun deffit son ressort et sortirent de leurs cabanes, et premier celluy qui portoit la lanterne, et ainsi cheurent plus de demye lieue en un goulphre horrible, puant et infect plus que Mephitis, ny la Palus Camarine, ny le punays lac de Sorbone, duquel escript Strabo, et, n'eust esté qu'ilz estoient très bien antidotez le cueur, l'estomach et le pot au vin, (lequel on nomme la caboche), ilz feussent suffocquez et estainctz de ces vapeurs abhominables. O quel parfum, o quel vaporament, pour embrener touretz de nez à jeunes Gualoyses !
Après, en tactonnant et fleuretant aprocherent de la matiere fecale et des humeurs corrumpues ; finablement trouverent une mont joye d'ordure. Lors les pionniers frapperent sus pour la desrocher, et les aultres, avecques leurs pasles, en emplirent les corbeilles ; et, quant tout fut bien nettoyé, chascun se retira en sa pomme. Ce faict, Pantagruel se parforce de rendre sa gorge, et facillement les mist dehors, et ne se monstroyent en sa gorge en plus q'un pet en la vostre, et là sortirent hors de leurs pillules joyeusement — il me souvenoit quand les Gregeoys sortirent du cheval en Troye ; — et par ce moyen fut guery et reduict à sa premiere convalescence.
Et de ces pillules d'arin en avez une à Orleans, sus le clochier de l'esglise de Saincte Croix.
La conclusion du present livre et l'excuse de l'auteur
Or, Messieurs, vous avez ouy un commencement de l'Histoire horrificque de mon maistre et seigneur Pantagruel. Icy je feray fin à ce premier livre : la teste me faict un peu de mal, et sens bien que les registres de mon cerveau sont quelque peu brouillez de ceste purée de septembre.
Vous aurez la reste de l'histoire à ces foires de Francfort prochainement venantes, et là vous verrez : comment Panurge fut marié, et cocqu dès le premier moys de ses nopces ; et comment Pantagruel trouva la pierre philosophale, et la maniere de la trouver et d'en user ; et comment il passa les Mons Caspies ; comment il naviga par la mer Athlanticque, et deffit les caniballes, et conquesta les isles de Perlas ; comment il espousa la fille du roy de Inde, nommée Presthan ; comment il combatit contre les diables et fist brusler cinq chambres d'enfer, et mist à sac la grande chambre noire, et getta Proserpine au feu, et rompit quatre dentz à Lucifer et une corne au cul ; et comment il visita les regions de la lune pour sçavoir si, à la verité, la lune n'estoit entiere, mais que les femmes en avoient troys quartiers en la teste ; et mille aultres petites joyeusetez toutes veritables. Ce sont belles besoignes.
Bonsoir, Messieurs. Pardonnante my, et ne pensez tant à mes faultes que ne pensiez bien es vostres.
Si vous me dictes : « Maistre, il sembleroit que ne feussiez grandement saige de nous escrire ces balivernes et plaisantes mocquettes, » je vous responds que vous ne l'estes gueres plus de vous amuser à les lire.
Toutesfoys, sy pour passe temps joyeulx les lisez comme passant temps les escripvoys, vous et moy sommes plus dignes de pardon q'un grand tas de sarrabovittes, cagotz, escargotz, hypocrites, caffars, frappars, botineurs, et aultres telles sectes de gens, qui se sont desguizez comme masques pour tromper le monde.
Car, donnans entendre au populaire commun qu'ilz ne sont occupez sinon à contemplation et devotion, en jeusnes et maceration de la sensualité, sinon vrayement pour sustenter et alimenter la petite fragilité de leur humanité, au contraire font chiere, Dieu sçait quelle,
Et Curios simulant, sed bacchanalia vivunt.
Vous le pouvez lire en grosse lettre et enlumineure de leurs rouges muzeaulx et ventres à poulaine, sinon quand ilz se parfument de soulphre.
Quant est de leur estude, elle est toute consummée à la lecture de livres Pantagruelicques, non tant pour passer temps joyeusement que pour nuyre à quelc'un meschantement, sçavoir est articulant, monorticulant, torticulant, culletant, couilletant et diabliculant, c'est à dire callumniant. Ce que faisans, semblent es coquins de village qui fougent et echarbottent la merde des petitz enfans, en la saison des cerises et guignes, pour trouver les noyaulx et iceulx vendre es drogueurs qui font l'huille de Maguelet.
Iceulx fuyez, abhorrissez et haissez autant que je foys, et vous en trouverez bien, sur ma foy, et, si desirez estre bons Pantagruelistes (c'est à dire vivre en paix, joye, santé, faisans tousjours grande chere) ne vous fiez jamais en gens qui regardent par un pertuys.
Fin des cronicques de Pantagruel, roy des Dipsodes,
restituez à leur naturel, avec ses faictz
et prouesses espoventables composez
par feu M. Alcofribas,
abstracteur de quinte
essence.