Vers 1243 à 1726

Einsi la dame se debat,
Einsi tot par li se conbat,
Einsi se tormante et confont.
Et ses janz avuec li refont
Si grant duel, que greignor ne pueent ;
Le cors an portent, si l'anfueent. . . .
Et tant ont quis et tribolé,
Que del querre sont tuit lassé,
Si le leissent tuit par enui,
Quant ne pueent veoir nelui,
Qui de rien an face a mescroire.
Et les nonains et li provoire
Orent ja fet tot le servise.
Repeirié furent de l'iglise
Et venu sor la sepouture. —
Mes de tot ice n'avoit cure
La dameisele de la chanbre.
De mon seignor Yvain li manbre,
S'est a lui venue mout tost
Et dist : „Biaus sire ! a mont grant ost
A sor vos ceste janz esté.
Mout ont par ceanz tanpesté
Et reverchié toz cez quachez
Plus menuëmant, que brachez
Ne va traçant perdriz ne quaille.
Peor avez eü sanz faille.“
„Par foi !“, fet il, „vos dites voir !
Ja ne cuidai si grant avoir.
Ancore, se il pooit estre,
Ou par pertuis ou par fenestre
Verroie volantiers la fors
La procession et le cors.“
Mes il n'avoit antancion
N'au cors n'a la procession ;
Qu'il vossist qu'il fussent tuit ars,
Si li eüst costé mil mars.
Mil mars ? Voire, par foi, trois mile.
Mes por la dame de la vile,
Que il voloit veoir, le dist.
Et la dameisele le mist
A une fenestre petite.
Quanqu'ele puet, vers lui s'aquite
De l'enor, qu'il li avoit feite.
Parmi cele fenestre agueite
Mes sire Yvains la bele dame,
Qui dist : „Biaus sire ! de vostre ame
Et Des merci si voiremant,
Come onques au mien esciant
Chevaliers sor sele ne sist,
Qui de rien nule vos vaussist !
De vostre enor, biaus sire chiers !
Ne fu onques nus chevaliers,
Ne de la vostre corteisie.
Largesce estoit la vostre amie,
Et hardemanz vostre conpainz.
An la conpaignie des sainz
Soit la vostre ame, biaus douz sire !“
Lors se dehurte et se descire
Trestot, quanquë as mains li vient.
A mout grant painne se detient
Mes sire Yvains, a quoi que tort,
Que les mains tenir ne li cort.
Mes la dameisele li prie
Et loe et comande et chastie
Come cortoise et de bon' eire,
Qu'il se gart de folie feire,
Et dit : „Vos estes ci mout bien.
Ne vos movez por nule rien
Tant que cist diaus soit abeissiez,
Et cez janz departir leissiez ;
Qu'il se departiront par tans.
Se vos contenez a mon sans
Si con je vos lo contenir,
Granz biens vos an porra venir.
Ci poez ester et seoir
Et anz et fors les janz veoir,
Qui passeront parmi la voie ;
Ne ja n'iert nus, qui ci vos voie,
S'i avroiz mout grant avantage.
Mes gardez vos de dire outrage ;
[1322a] Car qui se desroie et sormainne
[1322b] Et d'outrage feire se painne,
[1322c] Quant il an a et eise et leu,
[1322d] Je l'apel plus mauvés que preu.
Gardez, se vos pansez folie,
Que por ce ne la feites mie.
Li sages son fol pansé cuevre
Et met, s'il puet, le bien a oevre.
Or vos gardez donc come sages,
Que n'i metez la teste an gages ;
Que l'an n'an prandroit reançon.
Soiiez por vos an cusançon,
Et de mon consoil vos sovaingne !
Soiiez an pes tant que je vaingne ;
Que je n'os ci plus arester.
Je porroie tant demorer
Espoir, que l'an me mescrerroit
Por ce, que l'an ne me verroit
Avuec les autres an la presse,
S'an prandroie male confesse.“

Atant s'an part, et cil remaint,
Qui ne set, comant se demaint.
Del cors, qu'il voit que l'an anfuet,
Li poise, quant avoir n'an puet
Aucune chose, qu'il an port
Tesmoing, qu'il l'a conquis et mort,
Que mostrer puisse an aparant.
S'il n'an a tesmoing et garant,
Donc est il honiz an travers.
Tant par est Kes fel et pervers,
Plains de ranposnes et d'enui,
Que ja mes ne garroit a lui ;
Toz jorz mes l'iroit afitant
Et gas et ranposnes gitant,
Aussi come il fist l'autre jor.
Celes ranposnes a sejor
Li sont el cuer batanz et fresches,
Mes de son çucre et de ses bresches
Li radoucist novele Amors,
Qui par sa terre a fet son cors,
S'a tote sa proie acoillie.
Son cuer an mainne s'anemie,
S'aimme la rien, qui plus le het.
Bien a vangiee, et si nel set,
La dame la mort son seignor.
Vanjance an a prise greignor,
Qu'ele prandre ne l'an seüst,
S'Amors vangiee ne l'eüst,
Qui si doucemant le requiert,
Que par les iauz el cuer le fiert.
Et cist cos a plus grant duree,
Que cos de lance ne d'espee :
Cos d'espee garist et sainne
Mout tost, des que mires i painne,
Et la plaie d'Amors anpire,
Quant ele est plus pres de son mire.
Cele plaie a mes sire Yvains,
Dont il ne sera ja mes sains ;
Qu'Amors s'est tote a lui randue.
Les leus, ou ele iere espandue,
Va reverchant et si s'an oste :
Ne viaut avoir ostel ne oste
Se cestui non, et que preuz fet,
Quant de mauvés leu se retret,
Por ce qu'a lui tote se doint ;
Ne viaut qu'aillors et de li point,
Si cerche toz cez vils ostés.
C'est granz honte, qu'Amors est tes,
Et quant ele si mal se prueve,
Que el plus vil leu, qu'ele trueve,
Se herberge tot aussi tost,
Come an tot le meillor de l'ost.
Mes ore est ele bien venue,
Ci iert ele a enor tenue
Et ci li fet buen demorer.
Einsi se devroit atorner
Amors, qui si est haute chose,
Que mervoille est, comant ele ose
De honte an si vil leu desçandre.
Celui sanble, qui an la çandre
Et an la poudre espant son basme,
Et het enor et aimme blasme,
Et destanpre çucre de fiel,
Et mesle suie avueques miel.
Mes or n'a ele pas fet ceu,
Ainz s'est logiee an un franc leu,
Don nus ne li puet feire tort. —
Quant an ot anfoï le mort,
S'an partirent totes les janz.
Clers ne chevaliers ne serjanz
Ne dame n'i remest que cele,
Qui sa dolor mie ne cele.
Mes cele i remaint tote sole,
Qui sovant se prant a la gole
Et tort ses poinz et bat ses paumes
Et list an un sautier ses saumes,
Anluminé a letres d'or.
Et mes sire Yvains est ancor
A la fenestre, ou il l'esgarde,
Et come il plus s'an done garde,
Plus l'aimme et plus li abelist.
Ce qu'ele plore et qu'ele list,
Vossist qu'ele leissié eüst,
Et qu'a li parler li leüst.
An cest voloir l'a Amors mis,
Qui a la fenestre l'a pris.
Mes de son voloir se despoire ;
Car il ne puet cuidier ne croire,
Que ses voloirs puisse avenir,
Et dit : „Por fol me puis tenir,
Quant je vuel ce que ja n'avrai.
Son seignor a mort li navrai,
Et je cuit a li pes avoir ?
Par foi ! ne cuit mie savoir,
Qu'ele me het plus ore androit,
Que nule rien, et si a droit.
D'‚ore androit‘ ai je dit que sages ;
Que fame a plus de mil corages.
Celui corage, qu'ele a ore,
Espoir changera ele ancore, —
Ainz le changera sanz ‚espoir‘,
Si sui mout fos, qui m'an despoir.
Et Des li doint par tans changier !
Qu'estre m'estuet an son dangier
Toz jorz mes, des qu'Amors le viaut !
Qui Amor an gre ne requiaut,
Des que ele antor li l'atret,
Felenie et traïson fet,
Et je di (qui se viaut, si l'oie !),
Que n'an doit avoir bien ne joie.
Mes por ce ne perdrai je mie,
Ançois amerai m'anemie ;
Que je ne la doi pas haïr,
Se je ne vuel Amor traïr.
Ce qu'Amors viaut, doi je amer.
Et moi doit ele ami clamer ?
Oïl voir, por ce que je l'aim.
Et je m'anemie la claim,
Qu'ele me het, si n'a pas tort ;
Que ce, qu'ele amoit, li ai mort.
Et donc sui je ses anemis ?
Nenil certes, mes ses amis ;
Qu'onques rien tant amer ne vos.
Grant duel ai de ses biaus chevos,
Qui fin or passent, tant reluisent :
D'ire m'esprannent et aguisent,
Quant je li voi ronpre et tranchier ;
N'onques ne pueent estanchier
Les lermes, qui des iauz li chieent.
Totes cez choses me dessieent.
Atot ce qu'il sont plain de lermes,
Si que n'an est ne fins ne termes,
Ne furent onques si bel oel.
De ce qu'ele plore, me duel,
Ne de rien n'ai si grant destresce
Come de son vis, qu'ele blesce ;
Qu'il ne l'eüst pas desservi.
Onques si bien taillié ne vi
Ne si fres ne si coloré.
Et ce me par a acoré,
Que je li voi sa gorge estraindre.
Certes, ele ne se set faindre,
Qu'au pis, qu'ele puet, ne se face.
Et nus cristaus ne nule glace
N'est si clere ne si polie.
Des ! por quoi fet si grant folie
Et por quoi ne se blesce mains ?
Por quoi detort ses beles mains
Et fiert son piz et esgratine ?
Don ne fust ce mervoille fine
A esgarder, s'ele fust liee,
Quant ele est or si bele iriee ?
Oïl voir, bien le puis jurer :
Onques mes si desmesurer
An biauté ne se pot Nature ;
Que trespassee i a mesure.
Ou ele espoir n'i ovra onques ?
Comant poïst avenir donques ?
Don fust si granz biautez venue ?
Ja la fist Des de sa main nue,
Por Nature feire muser.
Tot son tans i porroit user,
S'ele la voloit contrefeire ;
Que ja n'an porroit a chief treire.
Nes Des, s'il s'an voloit pener,
N'i porroit, ce cuit, assener,
Que ja mes nule tel feïst
Por painne, que il i meïst.“

Einsi mes sire Yvains devise
Celi, qui de duel se debrise,
Ne mes ne cuit, qu'il avenist,
Que nus hon, qui prison tenist,
Tel con mes sire Yvains la tient,
Qui de la teste perdre crient,
Amast an si fole meniere,
Dont il ne fera ja proiiere
Ne autre por lui, puet cel estre.
Tant fu iluec a la fenestre,
Qu'il an vit la dame raler,
Et que l'an ot fet avaler
Anbedeus les portes colanz.
De ce fust uns autre dolanz,
Qui miauz amast sa delivrance,
Qu'il ne feïst la demorance.
Et il met autretant a oevre,
Se l'an les clot, con s'an les oevre.
Il ne s'an alast mie certes,
Se eles li fussent overtes,
Ne se la dame li donast
Congié et si li pardonast
La mort son seignor buenemant,
Si s'an alast seüremant ;
Qu'Amors et Honte le detienent,
Qui de deus parz devant li vienent.
Il est honiz, se il s'an va ;
Que ce ne crerroit nus hon ja,
Qu'il eüst einsi esploitié.
D'autre part a tel coveitié
De la bele dame veoir
Au mains, se plus n'an puet avoir,
Que de la prison ne li chaut ;
Morir viaut ainz que il s'an aut. —
Mes la dameisele repeire,
Qui li viaut conpaignie feire
Et solacier et deporter,
Et porchacier et aporter,
Quanqu'il voldra, a sa devise.
De l'amor, qui an lui s'est mise,
Le trova trespansé et vain,
Si li a dit : „Mes sire Yvain !
Quel siecle avez vos hui eü ?“
„Tel“, fet il, „qui mout m'a pleü.“
„Pleü ? Por De ! dites vos voir ?
Comant ? Puet donc buen siecle avoir,
Qui voit qu'an le quiert por ocirre,
S'il ne viaut sa mort ou desirre ?“
„Certes“, fet il, „ma douce amie,
Morir ne voldroie je mie,
Et si me plot mout tote voie
Ce que je vi, se Des me voie,
Et plest et pleira toz jorz mes.“
„Or leissomes trestot an pes“,
Fet ele ; „que bien sai antandre,
Ou ceste parole viaut tandre.
Ne sui si nice ne si fole,
Que bien n'antande une parole ;
Mes ore an venez aprés moi ;
Que je prandrai prochain conroi
De vos giter fors de prison.
Bien vos metrai a garison,
S'il vos plest, anuit ou demain.
Ore an venez, je vos an main.“
Et il respont : „Soiiez certainne,
Je n'istrai de ceste semainne
An larrecin ne an anblee.
Quant la janz iert tote assanblee
Parmi cez rues la defors,
Plus a enor m'an istrai lors,
Que je ne feroie nuitantre.“
A cest mot aprés li s'an antre
Dedanz la petite chanbrete.
La dameisele, qui fu brete,
Fu de lui servir an espans,
Si li fist creance et despans
De tot, quanquë il li covint.
Et quant leus fu, bien li sovint
De ce, que il li avoit dit,
Que mout li plot ce que il vit,
Quant par la sale le queroient
Cil qui ocirre le voloient.

La dameisele estoit si bien
De sa dame, que nule rien
A dire ne li redotast,
A quoi que la chose montast ;
Qu'ele estoit sa mestre et sa garde.
Mes por quoi fust ele coarde
De sa dame reconforter
Et de s'enor amonester ?
La premiere foiz a consoil
Li dist : „Dame ! mout me mervoil,
Que folemant vos voi ovrer.
Dame ! cuidiez vos recovrer
Vostre seignor por feire duel ?“
„Nenil“, fet ele, „mes mon vuel
Seroie je morte d'enui.“
„Por quoi ?“ — „Por aler aprés lui.“
„Aprés lui ? Des vos an deffande
Et aussi buen seignor vos rande,
Si come an est poesteïs.“
„Ains tel mançonge ne deïs ;
Qu'il ne me porroit si buen randre.“
„Meillor, se vos le volez prandre,
Vos randra il, sel proverai.“
„Fui ! tes ! Ja voir nel troverai.“
„Si feroiz, dame ! s'il vos siet.
Mes or dites, si ne vos griet :
Vostre terre qui deffandra,
Quant li rois Artus i vandra,
Qui doit venir l'autre semainne
Au perron et a la fontainne ?
Vos an avez eü message
De la Dameisele Sauvage,
Qui letres vos an anvea.
Ahi ! con bien les anplea !
Vos deüssiez or consoil prandre
De vostre fontainne deffandre,
Et vos ne finez de plorer !
N'i eüssiez que demorer,
S'il vos pleüst, ma dame chiere !
Que certes une chanberiere
Ne valent tuit, bien le savez,
Li chevalier, que vos avez.
Ja par celui, qui miauz se prise,
N'an iert escuz ne lance prise.
De jant mauveise avez vos mout,
Mes ja n'i avra si estout,
Qui sor cheval monter an ost ;
Et li rois vient a si grant ost,
Qu'il seisira tot sanz deffanse.“
La dame set mout bien et panse,
Que cele la consoille an foi ;
Mes une folor a an soi,
Que les autres fames i ont,
Et a bien pres totes le font,
Que de lor folies s'escusent
Et ce, qu'eles vuelent, refusent.
„Fui !“, fet ele, „ne dire mes !
Se je t'an oi parler ja mes,
Ja mar feras mes que t'an fuies !
Tant paroles, que trop m'enuies.“
„A buen eür“, fet ele, „dame !
Bien i pert, que vos estes fame,
Qui se corroce, quant ele ot
Nelui, qui bien feire li lot.“

Lors s'an parti, si la leissa ;
Et la dame se rapansa
Qu'ele avoit mout grant tort eü.
Mout vossist bien avoir seü,
Comant ele porroit prover,
Qu'an porroit chevalier trover
Meillor, qu'onques ne fu ses sire.
Mout volantiers li orroit dire,
Mes ele li a deffandu.
An cest voloir a atandu
Jusqu'a tant que ele revint.
Mes onques deffanse n'an tint,
Ainz li redit tot maintenant :
„Ha, dame ! est ce ore avenant,
Que si de duel vos ociëz ?
Por De ! car vos an chastiëz,
Sel leissiez seviaus non de honte.
A si haute dame ne monte,
Que duel si longuemant maintaingne.
De vostre enor vos ressovaingne
Et de vostre grant jantillesce !
Cuidiez vos, que tote proesce
Soit morte avuec vostre seignor ?
Çant aussi buen et çant meillor
An sont remés parmi le monde.“
„Se tu n'an manz, Des me confonde !
Et neporquant un seul m'an nome,
Qui et tesmoing de si prodome,
Con mes sire ot tot son aé.“
„Ja m'an savriiez vos mal gré,
Si vos an corroceriiez
Et m'an remenaceriiez.“
„Non ferai, je t'an asseür.“
„Ce soit a vostre buen eür,
Qui vos an est a avenir,
Se il vos venoit a pleisir,
Et Des doint ce, que il vos pleise !
Ne voi rien, por quoi je me teise ;
Que nus ne nos ot ne escoute.
Vos me tandroiz ja por estoute,
Mes je dirai bien, ce me sanble,
Quant dui chevalier sont ansanble
Venu as armes an bataille,
Li ques cuidiez vos, qui miauz vaille,
Quant li uns a l'autre conquis ?
Androit de moi doing je le pris
Au veinqueor. Et vos que feites ?“
„Il m'est avis, que tu m'agueites,
Si me viaus a parole prandre.“
„Par foi ! vos poez bien antandre,
Que je m'an vois parmi le voir,
Et si vos pruis par estovoir,
Que miauz vaut icil, qui conquist
Vostre seignor, que il ne fist.
Il le conquist et sel chaça
Par hardemant an jusque ça,
Si qu'il l'anclost an sa meison.“
„Ore oi“, fet ele, „desreison
La plus grant, qui onques fust dite.
Fui ! plainne de mal esperite,
Fui ! garce fole et enuieuse !
Ne dire ja mes tel oiseuse,
Ne ja mes devant moi ne vaingnes,
Por quoi de lui parole taingnes !“
„Certes, dame ! bien le savoie,
Que ja de vos gre n'an avroie,
Et jel vos dis mout bien avant.
Mes vos m'eüstes an covant,
Que mal gre ne m'an savriiez
Ne ja ire n'an avriiez.
Mal m'avez mon covant tenu,
Si m'est ore einsi avenu,
Que dit m'avez vostre pleisir,
Si ai perdu un buen teisir.“