Vers 1727 à 2328

Atant vers la chanbre retorne
La, ou mes sire Yvains sejorne,
Cui ele garde a mout grant eise ;
Mes n'i a chose, qui li pleise,
Quant la dame veoir ne puet ;
Et del plet, que cele li muet,
Ne se garde ne n'an set mot.
Mes la dame tote nuit ot
A li meïsme grant tançon ;
Qu'ele estoit an grant cusançon
De sa fontainne garantir,
Si se comance a repantir
De celi, qu'ele avoit blasmee
Et leidie et mesaesmee ;
Qu'ele est tote seüre et certe,
Que por loiier ne por desserte
Ne por amor, que a lui et,
Ne l'an mist ele onques an plet ;
Et plus aimme ele li que lui,
Ne sa honte ne son enui
Ne li loeroit ele mie ;
Car trop est sa leaus amie.
Ez vos ja la dame changiee
De celi, qu'ele ot leidangiee ;
Que ne cuide ja a nul fuer,
Qu'amer la doie de bon cuer.
Et celui, qu'ele ot refusé,
A mout leaumant escusé
Par reison et par droit de plet,
Qu'il ne li avoit rien forfet ;
Si se desresne tot einsi,
Con s'il fust venuz devant li.
Lors si comance a pleidoiier :
„Va !“ fet ele, „puez tu noiier,
Que par toi ne soit morz mes sire ?“
„Ce“, fet il, „ne puis je desdire,
Ainz l'otroi bien.“ — „Di donc, por quoi ?
Feïs le tu por mal de moi,
Por haïne ne por despit ?“
„Ja n'aie je de mort respit,
S'onques por mal de vos le fis.“
„Donc n'as tu rien vers moi mespris,
Ne vers lui n'eüs tu nul tort ;
Car, s'il poïst, il t'eüst mort.
Por ce mien esciant cuit gié,
Que j'ai bien et a droit jugié.“
Einsi par li meïsme prueve,
Que droit, san et reison i trueve,
Qu'an lui haïr n'a ele droit,
S'an dit ce, que ele voldroit,
Et par li meïsme s'alume
Aussi con la busche, qui fume,
Tant que la flame s'i est mise,
Que nus ne sofle ne atise.
Et s'or venoit la dameisele,
Ja desresneroit la querele,
Dont ele l'a tant pleidoiiee,
S'an a esté mout leidangiee.
Et ele revint par matin,
Si recomance son latin
La, ou ele l'avoit leissié.
Et cele tint le chief beissié,
Qui a mesfeite se savoit
De ce que leidie l'avoit ;
Mes or li voldra amander
Et del chevalier demander
Le non et l'estre et le linage ;
Si s'umelie come sage
Et dit : „Merci criër vos vuel
Del grant outrage et de l'orguel,
Que je vos ai dit come fole,
Si remandrai a vostre escole.
Mes dites moi, se vos savez,
Li chevaliers, don vos m'avez
Tenue an plet si longuemant,
Ques hon est il et de quel jant ?
Se il est tes, qu'a moi ataingne,
(Mes que de par lui ne remaingne,)
Je le ferai, ce vos otroi,
Seignor de ma terre et de moi.
Mes il le covandra si feire,
Qu'an ne puisse de moi retreire
Ne dire : „„C'est cele, qui prist
Celui, qui son seignor ocist.““
„En non De, dame ! einsi iert il.
Seignor avroiz le plus jantil
Et le plus franc et le plus bel,
Qui onques fust del ling Abel.“
„Comant a non ?“ — „Mes sire Yvains.“
„Par foi ! cist n'est mie vilains,
Ainz est mout frans, je le sai bien,
Si est fiz au roi Uriien.“
„Par foi, dame ! vos dites voir.“
„Et quant le porrons nos avoir ?“
„Jusqu'a cinc jorz.“ — „Trop tarderoit ;
Que mon vuel ja venuz seroit.
Vaingne anuit ou demain seviaus !“
„Dame ! ne cuit que nus oisiaus
Poïst an un jor tant voler.
Mes je i ferai ja aler
Un mien garçon, qui mout tost cort,
Qui ira bien jusqu'a la cort
Le roi Artu au mien espoir
Au mains jusqu'a demain au soir ;
Que jusque la n'iert il trovez.“
„Cist termes est trop lons assez.
Li jor sont lonc. Mes dites li,
Que demain au soir resoit ci
Et aut plus tost, que il ne siaut ;
Car, se bien esforcier se viaut,
Fera de deus jornees une.
Et anquenuit luira la lune,
Si reface de la nuit jor.
Et je li donrai au retor,
Quanqu'il voldra, que je li doingne.“
„Sor moi leissiez ceste besoingne ;
Que vos l'avroiz antre voz mains
Jusqu'a tierz jor a tot le mains.
Et andemantres manderoiz
Voz janz et si demanderoiz
Consoil del roi, qui doit venir.
Por la costume maintenir
De vostre fontainne deffandre,
Vos covandroit buen consoil prandre.
Et il n'i avra ja si haut,
Qui s'ost vanter, que il i aut.
Lors porroiz dire tot a droit,
Que mariër vos covandroit.
Uns chevaliers mout alosez
Vos requiert, mes vos ne l'osez
Prandre, s'il nel vos loent tuit.
Et ce praing je bien an conduit :
Tant les conois je a mauvés,
Que por chargier autrui le fes,
Dont il seroient trop chargié,
Vos an vandront trestuit au pié,
Et si vos an merciëront,
Que fors de grant painne seront.
Car, qui peor a de son onbre,
S'il puet, volantiers se desconbre
D'ancontre de lance ou de dart ;
Car c'est mauvés jeus a coart.“
Et la dame respont : „Par foi !
Einsi le vuel et si l'otroi,
Et je l'avoie ja pansé
Si con vos l'avez devisé,
Et tot einsi le ferons nos.
Mes ci por quoi demorez vos ?
Alez ! ja plus ne delaiiez,
Si feites tant que vos l'aiiez.
Je remandrai avuec mes janz.“
Einsi fina li parlemanz.
Et cele faint, qu'ele anvoit querre
Mon seignor Yvain an sa terre,
Si le fet chascun jor beignier
Et laver et aplanoiier.
Et avuec ce li aparoille
Robe d'escarlate vermoille
De ver forree atot la croie.
N'est riens, qu'ele ne li acroie,
Qui covaingne a lui acesmer :
Fermail d'or a son col fermer,
Ovré a pierres precïeuses,
Qui font les janz mout gracïeuses,
Et ceinturë et aumosniere,
Qui fu d'une riche seigniere.
Bien l'a del tot apareillié,
Et a sa dame a conseillié,
Que revenuz est ses messages,
Si a esploitié come sages.
„Comant ?“, fet ele, „Quant vandra
Mes sire Yvains ?“ — „Ceanz est ja.“
„Ceanz est il ? Vaingne donc tost
Celeemant et an repost,
Demantres qu'avuec moi n'est nus.
Gardez que n'an i vaingne plus ;
Car je harroie mout le quart.“
La dameisele a tant s'an part,
S'est venue a son oste arriere ;
Mes ne mostra mie a sa chiere
La joie, que ses cuers avoit,
Ainz dist, que sa dame savoit,
Qu'ele l'avoit leanz gardé,
Et dit : „Mes sire Yvains ! par De !
Ne m'i vaut mes neant celee.
Tant est de vos la chose alee,
Que ma dame la chose set,
Qui mout m'an blasme et mout m'an het
Et mout m'an a achoisonee.
Mes tel seürté m'a donee,
Que devant li vos puis conduire
Sanz rien grever et sanz rien nuire.
Ne vos grevera rien, ce croi,
Fors tant (que mantir ne vos doi,
Que je feroie traïson) :
Avoir vos viaut an sa prison,
Et s'i viaut si avoir le cors,
Que nes li cuers n'an soit defors.“
„Certes“, fet il, „ce vuel je bien,
Ce ne me grevera ja rien.
An sa prison vuel je bien estre.“
„Si seroiz vos, par la main destre,
Don je vos taing ! Ore an venez
Et a mon los vos contenez
Si hunblemant devant sa face,
Que male prison ne vos face.
Ne por el ne vos esmaiiez !
Ne cuit mie, que vos aiiez
Prison, qui trop vos soit grevainne.“
La dameisele einsi l'an mainne,
Si l'esmaië et rasseüre
Et parole par coverture
De la prison, ou il iert mis ;
Que sanz prison n'est nus amis.
Ele a droit, se prison le claimme ;
Que bien est an prison, qui aimme.

La dameisele par la main
An mainne mon seignor Yvain
La, ou il iert mout chier tenuz,
Si crient il estre mal venuz ;
Et s'il le crient, n'est pas mervoille.
Dessor une coute vermoille
Troverent la dame seant.
Grant peor, ce vos acreant,
Ot mes sire Yvains a l'antree
De la chanbre, ou il a trovee
La dame, qui ne li dist mot.
Et por ce plus grant peor ot,
Si fu de peor esbaïz,
Qu'il cuida bien estre traïz ;
Et s'estut loing cele part la,
Tant que la pucele parla
Et dist : „Cinc çanz dahez et s'ame,
Qui mainne an chanbre a bele dame
Chevalier, qui ne s'an aproche
Et qui n'a ne langue ne boche
Ne san, dont acointier se sache.“
A cest mot par le braz le sache,
Si li a dit : „Ça vos traiiez,
Chevaliers ! et peor n'aiiez
De ma dame, qu'ele vos morde,
Mes querez li pes et acorde.
Et j'an proierai avuec vos,
Que la mort Esclados, le Ros,
Qui fu ses sire, vos pardoint.“
Mes sire Yvains maintenant joint
Ses mains, si s'est a genouz mis
Et dist come verais amis :
„Dame ! ja voir ne criërai
Merci, ainz vos merciërai
De quanque vos me voldroiz feire ;
Que riens ne me porroit despleire.“
„Non, sire ? Et se je vos oci ?“
„Dame ! la vostre grant merci ;
Que ja ne m'an orroiz dire el.“
„Ains mes“, fet ele, „n'oï tel,
Que si vos metez a devise
Del tot an tot an ma franchise
Sanz ce, que ne vos an esforz.“
„Dame ! nule force si forz
N'est come cele sanz mantir,
Qui me comande a consantir
Vostre voloir del tot an tot.
Rien nule a feire ne redot,
Que moi vos pleise a comander.
Et se je pooie amander
La mort, don je n'ai rien mesfet,
Je l'amanderoie sanz plet.“
„Comant ?“, fet ele, „Or le me dites,
Si soiiez de l'amande quites,
Se vos de rien ne mesfeïstes,
Quant vos mon seignor oceïstes ?“
„Dame !“, fel il, „vostre merci,
Quant vostre sire m'assailli,
Quel tort oi je de moi deffandre ?
Qui autrui viaut ocirre ou prandre,
Se cil l'ocit, qui se deffant,
Dites, se de rien i mesprant ?“
„Nenil, qui bien esgarde a droit.
Et je cuit, que rien ne vaudroit,
Quant fet ocirre vos avroie.
Et ce mout volantiers savroie,
Don cele force puet venir,
Qui vos comande a consantir
Tot mon voloir sanz contredit.
Toz torz et toz mesfez vos quit.
Mes seez vos, si me contez,
Comant vos estes si dontez.“
„Dame !“, fet il, „la force vient
De mon cuer, qui a vos se tient ;
An cest voloir m'a mes cuers mis.“
„Et qui le cuer, biaus douz amis ?“
„Dame ! mi oel.“ — „Et les iauz qui ?“
„La granz biautez, que an vos vi.“
„Et la biautez qu'i a forfet ?“
„Dame ! tant que amer me fet.“
„Amer ? Et cui ?“ — „Vos, dame chiere.“
„Moi ?“ — „Voire“. — „Voir ? an quel meniere ?“
„An tel, que graindre estre ne puet,
An tel, que de vos ne se muet
Mes cuers, n'onques aillors nel truis,
An tel, qu'aillors panser ne puis,
An tel, que toz a vos m'otroi,
An tel, que plus vos aim que moi,
An tel, s'il vos plest, a delivre,
Que por vos vuel morir ou vivre.“
„Et oseriiez vos anprandre
Por moi ma fontainne a deffandre ?“
„Oïl voir, dame ! vers toz homes.“
„Sachiez donc, bien acordé somes.“
Einsi sont acordé briemant !
Et la dame ot son parlemant
Devant tenu a ses barons,
Et dit : „De ci nos an irons
An cele sale, ou mes janz sont,
Qui loé et conseillié m'ont
Por le besoing que il i voient ;
Que mari a prandre m'otroient.
Et jel ferai por le besoing :
Ci meïsmes a vos me doing ;
Qu'a seignor refuser ne doi
Buen chevalier et fil de roi.“

Ore a la dameisele fet,
Quanqu'ele voloit antreset.
Et mes sire Yvains est plus sire,
Qu'an ne porroit conter ne dire ;
Et la dame avuec li l'an mainne
An la sale, qui estoit plainne
De chevaliers et de serjanz.
Et mes sire Yvains fu si janz,
Qu'a mervoilles tuit l'esgarderent,
Et ancontre aus tuit se leverent,
Et tuit salüent et anclinent
Mon seignor Yvain et devinent :
„C'est cil, que ma dame prandra.
Dahez et, qui li deffandra ;
Qu'a mervoilles sanble prodome.
Certes, l'anpererriz de Rome
Seroit an lui bien mariëe.
Car l'eüst il ore afiëe
Et ele lui de nue main,
Si l'esposast hui ou demain !“
Einsi parloient tuit an ranc.
Au chief de la sale ot un banc,
Ou la dame s'ala seoir,
La, ou tuit la porent veoir.
Et mes sire Yvains sanblant fist,
Qu'a ses piez seoir se vossist,
Quant ele l'an leva amont,
Et de la parole semont
Son seneschal, que il la die,
Si qu'ele soit de toz oïe.
Lors comança li seneschaus,
Qui n'estoit ne restis ne baus.
„Seignor !“, fet il, „guerre nos sort.
N'est jorz, que li rois ne s'atort,
De quanquë il se puet haster,
Por venir noz terres gaster.
Einçois que la quinzainne past,
Sera trestot alé a gast,
Se buen mainteneor n'i a.
Quant ma dame se maria,
N'a mie aneor set anz parclos,
Si le fist ele par voz los.
Morz est ses sire, ce li poise.
N'a or de terre qu'une toise
Cil, qui tot cest païs tenoit
Et qui mout bien i avenoit.
C'est granz diaus, que po a vescu.
Fame ne set porter escu,
Ne ne set de lance ferir.
Mout amander et ancherir
Se puet de prandre un buen seignor.
Ains mes n'an ot mestier greignor !
Loez li tuit, que seignor praingne,
Ainz que la costume remaingne,
Qui an cest chastel a esté,
Plus de seissante anz a passé.“
A cest mot dïent tuit ansanble,
Que bien a feire lor ressanble,
Et trestuit jusqu'au pié li vienent.
De son voloir an grant la tienent ;
Si se fet proiier de son buen,
Tant que aussi con mangré suen
Otroie ce, qu'ele feïst,
Se chascuns li contredeïst,
Et dit : „Seignor ! des qu'il vos siet,
Cist chevaliers, qui lez moi siet,
M'a mout proiiee et mout requise.
An m'enor et an mon servise
Se viaut metre, et je l'an merci,
Et vos l'an merciëz aussi !
N'onques mes certes nel conui,
S'ai mout oï parler de lui.
Si hauz hon est, ce sachiez bien,
Con li fiz au roi Uriien.
Sanz ce, qu'il est de haut parage,
Est il de si grant vasselage
Et tant a corteisie et san,
Que desloer nel me doit l'an.
De mon seignor Yvain, ce cuit,
Avez bien oï parler tuit,
Et ce est il, qui me requiert.
Plus haut seignor, qu'a moi n'afiert,
Avrai au jor, que ce sera.“
Tuit dïent : „Ja ne passera
Cist jorz, se vos feites que sage,
Que n'aiiez fet le mariage.
Car mout est fos, qui se demore
De son preu feire une sole ore.“
Tant li prïent, que lor otroie
Ce, qu'ele feïst tote voie ;
Qu'Amors a feire li comande
Ce, don los et consoil demande ;
Mes a plus grant enor le prant,
Quant ele a le los de sa jant.
Et les proiieres rien n'i grievent,
Ainz li esmuevent et solievent
Le cuer a feire son talant.
Li chevaus, qui ne va pas lant,
S'esforce, quant an l'esperone.
Veant toz ses barons se done
La dame a mon seignor Yvain.
Par la main d'un suen chapelain
Prise a Laudine de Landuc,
La dame, qui fu fille au duc
Laudunet, dont an note un lai.
Le jor meïsme sanz delai
L'esposa et firent les noces.
Assez i ot mitres et croces ;
Car la dame i avoit mandez
Ses evesques et ses abez.
Mout i ot joie et mout leesce,
Mout i ot jant et mout richesce,
Plus que conter ne vos savroie,
Quant lonc tans pansé i avroie.
Miauz me vient teire, que po dire. —
Mes ore est mes sire Yvains sire,
Et li morz est toz obliëz.
Cil, qui l'ocist, est mariëz
An sa fame, et ansanble gisent,
Et les janz aimment plus et prisent
Le vif, qu'onques le mort ne firent.
A ses noces bien le servirent,
Qui durerent jusqu'a la voille,
Que li rois vint a la mervoille
De la fontainne et del perron,
Et avuec lui si conpaignon ;
Et trestuit cil de sa mesniee
Furent an cele chevauchiee ;
Qu'uns trestoz seus n'an fu remés.
Et si disoit mes sire Kes :
„Ahi ! qu'est ore devenuz
Yvains, quant il n'est ça venuz,
Qui se vanta aprés mangier,
Qu'il iroit son cosin vangier ?
Bien pert, que ce fu aprés vin.
Foïz s'an est, je le devin ;
Qu'il n'i osast venir por l'uel.
Mout se vanta de grant orguel.
Mout est hardiz, qui vanter s'ose
De ce, dont autre ne l'alose,
Ne n'a tesmoing de sa loange,
Se ce n'est par fausse losange.
Mout a antre mauvés et preu ;
Que li mauvés joste le feu
Dit de lui unes granz paroles,
Si tient totes les janz a foles,
Et cuide, que l'an nel conoisse.
Et li preuz avroit grant angoisse,
Se il ooit dire a autrui
Les proesces, qui sont an lui.
Neporquant certes bien m'acort
Au mauvés, qu'il n'a mie tort,
Se il se prise et il se vante ;
Qu'il ne trueve, qui por lui mante.
Se il nel dit, qui le dira ?
Tuit s'an teisent, nes li hira,
Qui des vaillanz crient le ban
Et les mauvés gietent au van.“
Einsi mes sire Kes parloit,
Et mes sire Gauvains disoit :
„Merci, mes sire Kes, merci !
Se mes sire Yvains n'est or ci,
Ne savez, quel essoine il a.
Onques voir tant ne s'avilla,
Qu'il deïst de vos vilenie
Tant come il a fet corteisie.“
„Sire !“, fet Kes, „et je m'an tes.
Ne m'an orroiz parler hui mes,
Des que je voi, qu'il vos enuie.“
Et li rois por veoir la pluie,
Versa de l'eve plain bacin
Sor le perron dessoz le pin,
Et plut tantost mout fondelmant.
Ne tarda mie longuemant,
Que mes sire Yvains sanz arest
Antra armez an la forest,
Et vint plus tost que les galos
Sor un cheval et gras et gros,
Fort et hardi et tost alant.
Et mes sire Kes ot talant,
Qu'il demanderoit la bataille ;
Car ques que fust la definaille,
Il voloit comancier toz jorz
Les batailles et les estorz,
Ou il i eüst grant corroz.
Le roi apele devant toz,
Que ceste bataille li lest.
„Kes !“, fet li rois, „des qu'il vos plest
Et devant toz l'avez rovee,
Ne vos doit pas estre veee.“
Kes l'an mercie, puis si monte.
S'or li puet feire un po de honte
Mes sire Yvains, liez an sera
Et mout volantiers li fera ;
Que bien le reconoist as armes.
L'escu a pris par les enarmes,
Et Kes le suen, si s'antresleissent,
Chevaus poingnent, les lances beissent,
Que il tenoient anpoigniees.
Un petit les ont aloigniees
Tant que par les quamois les tindrent,
Et a ce, que il s'antrevindrent,
De tes cos ferir s'angoissierent,
Que andeus les lances froissierent
Et vont jusqu'anz es poinz fandant.
Mes sire Yvains cop si puissant
Li dona, que par son la sele
A fet Kes la torneboele,
Et li hiaumes an terre fiert.
Plus d'enui feire ne li quiert
Mes sire Yvains, einçois desçant
A la terre et le cheval prant ;
S'an fu mout bel a tes i ot,
Et fu assez, qui dire sot :
„Ahi, ahi ! come or gisiez
Vos, qui les autres despisiez !
Et neporquant s'est il bien droiz,
Qu'an le vos pardoint ceste foiz
Por ce qu'ains mes ne vos avint.“
Antre tant devant le roi vint
Mes sire Yvains, et par le frain
Menoit le cheval an sa main
Por ce, que il li voloit randre ;
Si li dist : „Sire ! feites prandre
Cest cheval ; que je mesferoie,
Se rien del vostre retenoie.“
„Et qui estes vos ?“ fet li rois ;
„Ne vos conoistroie des mois,
Se je nomer ne vos ooie
Ou desarmé ne vos veoie.“
Lors s'est mes sire Yvains nomez,
S'an fu Kes de honte assomez
Et maz et morz et desconfiz,
Qu'il dist, qu'il s'an estoit foïz.
Et li autre mout lié an sont,
Qui de s'enor grant joie font.
Nes li rois grant joie an mena,
Et mes sire Gauvains an a
Çant tanz plus grant joie que nus ;
Que sa conpaignie amoit plus
Que conpaignie, qu'il eüst
A chevalier, que il seüst.
Et li rois li requiert et prie,
Se il li plest, que il li die,
Comant il avoit esploitié ;
Car mout avoit grant coveitié
De savoir tote s'avanture ;
De voir dire mout le conjure.
Et il lor a trestot conté
Et le servise et la bonté,
Que la dameisele li fist ;
Onques de mot n'i antreprist,
Ne rien nule n'i oblia.
Et aprés ce le roi pria,
Que il et tuit si chevalier
Venissent o lui herbergier ;
Qu'enor et joie li feroient,
Quant o lui herbergié seroient.
Et li rois dit, que volantiers
Li feroit huit jorz toz antiers
Enor et joie et conpaignie.
Et mes sire Yvains l'an mercie,
Ne de demore plus n'i font.
Maintenant montent, si s'an vont
Vers le chastel la droite voie.
Et mes sire Yvains an anvoie
Devant la rote un escuiier,
Qui portoit un faucon gruiier,
Por ce, que il ne sospreïssent
La dame, et que ses janz feïssent
Contre le roi ses meisons beles.
Quant la dame oï les noveles,
Del roi, qui vient, s'an a grant joie.
N'i a nul, qui la novele oie,
Qui n'an soit liez et qui ne mont.
Et la dame toz les semont
Et prie, qu'ancontre lui voisent ;
Et il ne tancent ne ne noisent ;
Que de feire sa volanté
Estoient tuit antalanté.