Vers 2329 à 2773

Ancontre le roi de Bretaingne
S'an vont sor granz chevaus d'Espaingne,
Si salüent mout hautemant
Le roi Artu premieremant
Et puis sa conpaignie tote.
„Bien vaingne“, font il, „ceste rote,
Qui de si prodomes est plainne !
Beneoiz soit cil, qui les mainne
Et qui si buens ostes nos done !“
Contre le roi li chastiaus tone
De la joie, que l'an i fet.
Li drap de soie sont fors tret
Et estandu a paremant,
Et des tapiz font pavemant
Et par les rues les estandent
Contre le roi, que il atandent ;
Et refont un autre aparoil ;
Que por la chalor del soloil
Cuevrent les rues de cortines.
Li sain, li cor et les buisines
Font le chastel si ressoner,
Que l'an n'i oïst De toner.
Contre lui dancent les puceles,
Sonent flaütes et fresteles,
Timbre, tabletes et tabor.
D'autre part refont lor labor
Li legier bacheler, qui saillent ;
Trestuit de joie se travaillent.
Et a ceste joie reçoivent
Le roi, si con feire le doivent.
Et la dame rest fors issue
D'un drap anperial vestue,
Robe d'ermine tote fresche,
Sor son chief une garlandesche
Tote de rubiz atiriee,
Ne n'ot mie la chiere iriee,
Ainz l'ot si gaie et si riant,
Qu'ele estoit au mien esciant
Plus bele que nule deesse.
Antor li fu la presse espesse,
Et disoient trestuit a tire :
„Bien vaingne li rois et li sire
Des rois et des seignors del monde !“
Ne puet estre, qu'a toz responde
Li rois, qui vers lui voit venir
La dame a son estrier tenir,
Et ce ne vost il pas atandre,
Ainz se hasta mout de desçandre,
Si desçandi lués, qu'il la vit.
Et ele le salue et dit :
„Bien vaingne par çant mile foiz
Li rois, mes sire, et beneoiz
Soit mes sire Gauvains, ses niés.“
„Vostre janz cors et vostre chiés,“
Fet li rois, „bele creature !
Et grant joie et buene avanture !“
Puis l'anbraça parmi les flans
Li rois come jantis et frans,
Et ele lui tot a plain braz.
Des autres parole ne faz,
Comant ele les conjoï ;
Mes onques nus parler n'oï
De nule jant tant conjoïe,
Tant enoree et tant servie.
De la joie assez vos contasse,
Se ma parole n'i gastasse ;
Mes solemant de l'acointance
Vuel feire une brief remanbrance,
Qui fu feite a privé consoil
Antre la lune et le soloil.
Savez, de cui je vos vuel dire ?
Cil, qui des chevaliers fu sire
Et qui sor toz fu renomez,
Doit bien estre solauz clamez.
Por mon seignor Gauvain le di ;
Que de lui est tot autressi
Chevalerie anluminee,
Con li solauz la matinee
Oevre ses rais et clarté rant
Par toz les leus, ou il s'espant.
Et de celi refaz la lune,
Dont il ne puet estre que une
De grant san et de corteisie.
Et neporuec je nel di mie
Solemant por son buen renon,
Mes por ce, que Lunete a non.

La dameisele ot non Lunete,
Et fu une avenanz brunete,
Tres sage et veziiee et cointe.
A mon seignor Gauvain s'acointe,
Qui mout la prisë et mout l'aimme,
Et por ce s'amie la claimme,
Qu'ele avoit de mort garanti
Son conpaignon et son ami,
Si li ofre mout son servise.
Et ele li conte et devise,
A con grant painne ele conquist
Sa dame, tant que ele prist
Mon seignor Yvain a mari,
Et comant ele le gari
Des mains a çaus, qui le queroient ;
Antre aus estoit, si nel veoient.
Mes sire Gauvains mout se rist
De ce, qu'ele li conte, et dist :
„Ma dameisele ! je vos doing
Et a mestier et sanz besoing
Un tel chevalier con je sui.
Ne me changiez ja por autrui,
Se amander ne vos cuidiez.
Je sui vostrë, et vos soiiez
D'ore an avant ma dameisele !“
„Vostre merci, sire !“ fet ele.
Einsi cil dui s'antracointoient,
Et li autre s'antredonnoient :
Car dames i ot tes nonante,
Don chascune estoit bele et jante
Et noble et cointe, preuz et sage,
Dameisele de haut parage ;
Si s'i pooient solacier
Et d'acoler et de beisier
Et de parler et de veoir
Et de delez eles seoir :
Itant an orent il au mains.
Ore a feste mes sire Yvains
Del roi, qui avuec lui demore.
Et la dame tant les enore,
Chascun par soi et toz ansanble,
Que tes fos i a, cui il sanble,
Que d'amor vaingnent li atret
Et li sanblant, qu'ele lor fet.
Et çaus puet l'an nices clamer,
Qui cuident, que les vuelle amer,
Quant une dame est si cortoise,
Qu'a un maleüreus adoise,
Si li fet joie et si l'acole.
Fos est liez de bele parole,
Si l'a an mout tost amusé. —
A grant joie ont lor tans usé
Trestote la semainne antiere :
Deduit de bois et de riviere
I ot mout, qui le vost avoir.
Et qui vost la terre veoir,
Que mes sire Yvains ot conquise
An la dame, que il ot prise,
Si se repot aler esbatre
Ou deus liues ou trois ou quatre
Par les chastiaus d'iluec antor.
Quant li rois ot fet son sejor,
Tant qu'il n'i vost plus arester,
Si refist son oirre aprester.
Mes il avoient la semainne
Trestuit proiié et mise painne
Au plus, qu'il s'an porent pener,
Que il an poïssent mener
Mon seignor Yvain avuec aus.
„Comant ? Seroiz vos or de çaus“,
Ce disoit mes sire Gauvains,
„Qui por lor fames valent mains ?
Honiz soit de sainte Marie,
Qui por anpirier se marie !
Amander doit de bele dame,
Qui l'a a amie ou a fame,
Ne n'est puis droiz, que ele l'aint,
Que ses pris et ses los remaint.
Certes, ancor seroiz iriez
De s'amor, se vos anpiriez ;
Que fame a tost s'amor reprise,
Ne n'a pas tort, s'ele desprise
Celui, qui de neant anpire,
Quant il est del reaume sire.
Or primes doit vostre pris croistre !
Ronpez le frain et le chevoistre,
S'irons tornoiier moi et vos,
Que l'an ne vos apiaut jalos.
Or ne devez vos pas songier,
Mes les tornoiemanz ongier,
Anprandre estorz et fort joster,
Que que il vos doie coster !
Assez songe, qui ne se muet.
Certes, venir vos an estuet ;
Que je serai an vostre ansaingne.
Gardez, que an vos ne remaingne,
Biaus conpainz ! nostre conpaignie ;
Qu'an moi ne faudra ele mie.
Mervoille est, comant an a cure
De l'eise, qui toz jorz li dure.
Biens adoucist par delaiier,
Et plus est buens a essaiier
Uns petiz biens, quant il delaie,
Qu'uns granz, que l'an adés essaie.
Joie d'amor, qui vient a tart,
Sanble la vert busche qui art,
Qui de tant rant plus grant chalor
Et plus se tient an sa valor,
Con plus se tient a alumer.
L'an puet tel chose acostumer,
Qui mout est grevainne a retreire ;
Quant an le viaut, nel puet an feire.
Et por ce ne le di je mie,
Se j'avoie si bele amie,
Con vos avez, sire conpainz !
Foi, que je doi De et ses sainz,
Mout a anviz la leisseroie !
Mien esciant fos an seroie.
Mes tes consoille bien autrui,
Qui ne savroit conseillier lui,
Aussi con li preecheor,
Qui sont desleal tricheor :
Ansaingnent et dïent le bien,
Dont il ne vuelent feire rien.“

Mes sire Gauvains tant li dist
Ceste chose et tant li requist,
Qu'il creanta, qu'il le diroit
A sa fame et si s'an iroit,
S'il an puet le congié avoir.
Ou face folie ou savoir,
Ne leira, que congié ne praingne
De retorner an la Bretaingne.
La dame an a a consoil treite,
Qui del congié pas ne se gueite,
Si li dist : „Ma tres chiere dame !
Vos, qui estes mes cuers et m'ame,
Mes biens, ma joie et ma santez,
Une chose me creantez
Por vostre enor et por la moie !“
La dame tantost li otroie,
Qui ne set, qu'il viaut demander,
Et dit : „Biaus sire ! comander
Me poez, quanque buen vos iert.“
Maintenant congié li requiert
Mes sire Yvains, de convoiier
Le roi et d'aler tornoiier,
Que l'an ne l'apiaut recreant.
Et ele dit : „Je vos creant
Le congié jusqu'a un termine ;
Mes l'amors devandra haïne,
Que j'ai a vos, seürs soiiez,
Certes, se vos trespassiiez
Le terme, que je vos dirai.
Sachiez que ja n'an mantirai :
Se vos mantez, je dirai voir.
Se vos volez m'amor avoir
Et de rien nule m'avez chiere,
Pansez de revenir arriere
A tot le mains jusqu'a un an
Huit jorz aprés la saint Jehan :
Hui an cest jor sont les huitaves.
De m'amor seroiz maz et haves,
Se vos n'estes a icel jor
Ceanz avuec moi a sejor.“

Mes sire Yvains plore et sospire
Si fort, qu'a painnes li puet dire :
„Dame ! cist termes est trop lons.
Se je pooie estre colons
Totes les foiz, que je voldroie,
Mout sovant avuec vos seroie.
Et je pri De que, se lui plest,
Ja tant demorer ne me lest.
Mes tes cuide mout tost venir,
Qui ne set, qu'est a avenir.
Et je ne sai, que m'avandra,
Se essoines me detandra
De malage ne de prison ;
S'avez de tant fet mesprison,
Que vos n'an avez mis defors
Seviaus l'essoine de mon cors.“
„Sire !“, fet ele, „et je l'i met.
Et neporquant bien vos promet,
Que, se Des de mort vos deffant,
Nus essoines ne vos atant
Tant con vos sovandra de moi.
Mes or metez an vostre doi
Cest mien anel, que je vos prest.
Et de la pierre, ques ele est,
Vos dirai je tot an apert :
Prison ne tient ne sanc ne pert
Nus amanz verais et leaus,
Ne avenir ne li puet maus,
Mes qu'il le port et chier le taingne
Et de s'amie li sovaingne,
Einçois devient plus durs que fers.
Cil vos iert escuz et haubers.
Et onques mes a chevalier
Ne le vos prester ne baillier,
Mes par amor le vos doing gié.“
Ore a mes sire Yvains congié,
S'ont mout ploré au congié prandre. —
Et li rois ne vost plus atandre
Por rien, qu'an dire li seüst,
Ainz li tarda, qu'an lor eüst
Tost les palefroiz amenez
Apareilliez et anfrenez.
Des qu'il le vost, mout fu tost fet :
Li palefroi lor sont fors tret,
Si n'i a mes que del monter.
Ne sai, que vos doie conter,
Comant mes sire Yvains s'an part,
Et des beisiers, qu'an li depart,
Qui furent de lermes semé
Et de douçor anbaussemé.
Et del roi que vos conteroie,
Comant la dame le convoie
Et ses puceles avuec li
Et si chevalier autressi ?
Trop i feroie grant demore.
La dame, por ce qu'ele plore,
Prie li rois de remenoir
Et de raler a son menoir.
Tant li pria qu'a mout grant painne
S'an retorne, sa jant an mainne.

Mes sire Yvains mout a anviz
S'est de la dame departiz
Einsi, que li cuers ne se muet.
Li rois le cors mener an puet,
Mes del cuer n'an manra il point ;
Car si se tient et si se joint
Au cuer celi, qui se remaint,
Qu'il n'a pooir, que il l'an maint.
Des que li cors est sanz le cuer,
Donc ne puet il vivre a nul fuer ;
Et se li cors sanz le cuer vit,
Tel mervoille nus hon ne vit.
Ceste mervoille est avenue ;
Qu'il a la vie retenue
Sanz le cuer, qui estre i soloit ;
Que plus siure ne le voloit.
Li cuers a buene remenance,
Et li cors vit an esperance
De retorner au cuer arriere,
† S'a fet cuer d'estrange meniere
D'esperance, qui mout sovant
Traïst et fausse de covant.
Ja, ce cuit, l'ore ne savra,
Qu'esperance traï l'avra ;
Car se il un seul jor trespasse
Del terme, qu'il ont pris a masse,
Mout a anviz trovera mes
A sa dame triues ne pes.
Je cuit, qu'il le trespassera ;
Car departir nel leissera
Mes sire Gauvains d'avuec lui ;
Car as tornois s'an vont andui
Par toz les leus, ou l'an tornoie.
Et li anz passe tote voie,
Sel fist si bien mes sire Yvains
Tot l'an, que mes sire Gauvains
Se penoit de lui enorer
Et si le fist tant demorer,
Que trestoz li anz fu passez
Et de l'autre an aprés assez,
Tant que a la miaost vint,
Que li rois cort a Cestre tint,
Et furent la voille devant
Revenu d'un tornoiemant,
Ou mes sire Yvains ot esté,
S'an ot tot le pris aporté.
Et dit li contes, ce me sanble,
Que li dui conpaignon ansanble
Ne vostrent an vile desçandre,
Ainz firent lor paveillon tandre
Fors de la vile et cort i tindrent ;
Qu'onques a cort de roi ne vindrent,
Einçois vint li rois a la lor ;
Qu'avuec aus furent li meillor
Des chevaliers et toz li plus.
Antre aus seoit li rois Artus,
Quant Yvains tant ancomança
A panser, que des lors an ça,
Que a sa dame ot congié pris,
Ne fu tant de panser sospris
Con de celui ; car bien savoit,
Que covant manti li avoit
Et trespassez estoit li termes.
A grant painne tenoit ses lermes,
Mes honte li feisoit tenir.
Tant pansa, que il vit venir
Une dameisele a droiture,
Et venoit mout grant anbleüre
Sor un palefroi noir bauçant.
Devant le paveillon desçant,
Ne nus ne fu a son desçandre ;
Que nus n'ala son cheval prandre.
Et lués, que ele pot veoir
Le roi, si leissa jus cheoir
Son mantel, et desafublee
S'an est el paveillon antree
Et tres devant le roi venue,
Si dist que sa dame salue
Le roi et mon seignor Gauvain
Et toz les autres fors Yvain,
Le desleal, le traïtor,
Le mançongier, le jeingleor,
Qui l'a leissiee et deceüe.
„Bien a sa jangle aparceüe,
Qui se feisoit verais amerre,
S'estoit fel, soduianz et lerre.
Ma dame a cist lerre soduite,
Qui n'estoit de nul mal recuite,
Ne ne cuidoit pas a nul fuer,
Qu'il li deüst anbler son cuer.
Cil n'anblent pas les cuers, qui aimment,
Si a tes, qui larrons les claimment,
Qui an amor vont faunoiant
Et si n'an sevent tant ne quant.
Li amis prant le cuer s'amie
Einsi, qu'il ne li anble mie,
Ainz le garde, que ne li anblent
Larron, qui prodome ressanblent.
Et cil sont larron ipocrite
Et traïtor, qui metent luite
As cuers anbler, dont aus ne chaut ;
Mes li amis, quel part qu'il aut,
Le tient chier et si le raporte.
Mes Yvains a ma dame morte ;
Qu'ele cuidoit, qu'il li gardast
Son cuer et si li raportast,
Einçois que fust passez li anz.
Yvains ! mout fus ore oblianz ;
Qu'il ne te pot ressovenir,
Que tu deüsses revenir
A ma dame jusqu'a un an.
Jusqu'a la feste saint Jehan
Te dona ele de respit,
Et tu l'eüs an tel despit,
Qu'onques puis ne t'an remanbra.
Ma dame paint an sa chanbre a
Trestoz les jorz et toz les tans ;
Car qui aimme, est an grant porpans,
N'onques ne puet prandre buen some,
Mes tote nuit conte et assome
Les jorz, qui vienent et qui vont.
Sez tu, come li amant font ?
Content le tans et la seison.
N'est pas venue sanz reison
Sa conplainte ne devant jor,
Si ne di je rien por clamor,
Mes tant di, que traïz nos a,
Qui a ma dame t'esposa.
Yvains ! n'a mes cure de toi
Ma dame, ainz te mande par moi,
Que ja mes vers li ne revaingnes
Ne son anel plus ne detaingnes.
Par moi, que ci an presant vois,
Te mande, que tu li anvois.
Rant li ! car randre le t'estuet.“