Vers 2774 à 3340

Yvains respondre ne li puet,
Que sans et parole li faut.
Et la dameisele avant saut,
Si li oste l'anel del doi,
Puis si comande a De le roi
Et toz les autres fors celui,
Cui ele leisse an grant enui. —
Et ses enuiz tot adés croist :
Quanquë il ot, tot li ancroist,
Et quanque il voit, tot li enuie.
Mis se voldroit estre a la fuie
Toz seus an si sauvage terre,
Que l'an ne le seüst, ou querre,
N'ome ne fame n'i eüst,
Ne nus de lui rien ne seüst
Ne plus, que s'il fust an abisme.
Ne het tant rien con lui meïsme,
Ne ne set, a cui se confort
De lui, qu'il meïsmes a mort :
Mes ainz voldra le san changier,
Que il ne se puisse vangier
De lui, qui joie s'est tolue.
D'antre les barons se remue ;
Qu'il crient antre aus issir del san.
Et de ce ne se gardoit l'an,
Si l'an leissierent seul aler.
Bien sevent, que de lor parler
Ne de lor siecle n'a il soing.
Et il va tant, que il fu loing
Des tantes et des paveillons.
Lors li monta uns torbeillons
El chief si granz, que il forsane,
Lors se descire et se depane
Et fuit par chans et par arees
Et leisse ses janz esgarees,
Qui se mervoillent, ou puet estre.
Querant le vont par trestot l'estre,
Par les ostés as chevaliers
Et par haies et par vergiers,
Sel quierent la, ou il n'est pas.
Fuiant s'an va plus que le pas,
Tant qu'il trova delez un parc
Un garçon, qui tenoit un arc
Et cinc saietes barbelees,
Qui mout ierent tranchanz et lees,
S'ot tant de san, que au garçon
Est alez tolir son arçon
Et les saietes qu'il tenoit.
Por ce mes ne li sovenoit
De nule rien, qu'il eüst feite.
Les bestes par le bois agueite,
Si les ocit et si manjue
La veneison trestote crue.
Et tant conversa el boschage
Come hon forsené et sauvage,
Qu'une meison a un hermite
Trova mout basse et mout petite,
Et li hermites essartoit.
Quant vit celui, qui nuz estoit,
Bien pot savoir sanz nul redot,
Qu'il n'avoit mie le san tot ;
Et si fist il, tres bien le sot.
De la peor, que il an ot,
Se feri an sa meisonete.
De son pain et de s'eve nete
Par charité prist li prodon,
Si li mist fors de sa meison
Dessor une fenestre estroite.
Et cil vient la, qui mout covoite
Le pain, si le prant et s'i mort.
Ne cuit, que onques de si fort
Ne de si aspre eüst gosté.
N'avoit mie cinc souz costé
Li sestiers, don fu fez li pains,
Qui plus iere egres que levains,
D'orge pestriz atot la paille,
Et avuec ce iere il sanz faille
Moisiz et ses come une escorce.
Mes li fains l'angoisse et esforce,
Tant que le pout li sot li pains ;
Qu'a toz mangiers est sausse fains
Bien destanpree et bien confite.
Tot manja le pain a l'ermite
Mes sire Yvains, que buen li sot,
Et but de l'eve froide au pot.
Quant mangié ot, si se refiert
El bois, et cers et biches quiert.
Et li buens hon dessoz son toit
Prie De, quant aler l'an voit,
Qu'il le deffande et qu'il le gart,
Que mes ne vaingne cele part.
Mes n'est riens, tan po de san et,
Que an leu, ou l'an bien li fet,
Ne revaingne mout volantiers.
Puis ne passa uns jorz antiers,
Tant come il fu an cele rage,
Que aucune beste sauvage
Ne li aportast a son huis.
Iceste vie mena puis,
Et li buens hon s'antremetoit
De l'escorchier et si metoit
Assez de la veneison cuire,
Et li pains et l'eve an la buire
Estoit toz jorz sor la fenestre
Por l'ome forsené repestre ;
S'avoit a mangier et a boivre
Veneison sanz sel et sanz poivre
Et eve froide de fontainne.
Et li buens hon estoit an painne
Des cuirs vandre et d'acheter pain
D'orge ou d'avainne ou d'autre grain,
S'ot puis tote sa livreison,
Pain a planté et veneison,
Qui li dura tant longuemant,
Qu'un jor le troverent dormant
An la forest deus dameiseles
Et une lor dame avuec eles,
De cui mesniee eles estoient.
Vers l'ome nu, que eles voient,
Cort et desçant l'une des trois,
Mes mout le regarda, einçois
Que rien nule sor lui veïst,
Qui reconoistre li feïst ;
Si l'avoit ele tant veü,
Que tost l'eüst reconeü,
Se il fust de si riche ator,
Come il avoit esté maint jor.
Au reconoistre mout tarda
Et totes voies l'esgarda,
Tant qu'an la fin li fu avis
D'une plaie, qu'il ot el vis,
Qu'une tel plaie el vis avoit
Mes sire Yvains ; bien le savoit ;
Qu'ele l'avoit sovant veüe.
Par la plaie s'est parceüe,
Que ce est il, de rien n'an dote ;
Mes de ce se mervoille tote,
Comant ce li est avenu,
Que si l'a trové povre et nu.
Mout s'an saingne et mout s'an mervoille,
Mes ne le bote ne n'esvoille,
Ainz prant son cheval, si remonte,
Et vient as autres, si lor conte
S'avanture tote an plorant.
Ne sai, qu'alasse demorant
A conter le duel, qu'ele an fist ;
Mes plorant a sa dame dist :
„Dame ! je ai Yvain trové,
Le chevalier miauz esprové
Del monde et le miauz antechié.
Mes je ne sai, par quel pechié
Est au franc home mescheü.
Espoir aucun duel a eü,
Qui le fet einsi demener ;
Qu'an puet bien de duel forsener.
Et savoir et veoir puet l'an,
Qu'il n'est mie bien an son san ;
Que ja voir ne li avenist,
Que si vilmant se contenist,
Se il n'eüst le san perdu.
Car li eüst or Des randu
Le san au miauz, qu'il eüst onques,
Et puis si li pleüst adonques,
Qu'il remassist an vostre aïe !
Car trop vos a mal anvaïe
Li cuens Aliers, qui vos guerroie.
La guerre de vos deus verroie
A vostre grant enor finee,
Se Des si buene destinee
Vos donoit, qu'il le remeïst
An son san, si s'antremeïst
De vos eidier a cest besoing.“
La dame dist : „Or n'aiiez soing !
Que certes, se il ne s'an fuit,
A l'aïe de De, ce cuit,
Li osterons nos de la teste
Tote la rage et la tanpeste.
Mes tost aler nos an covient ;
Car d'un oignemant me sovient,
Que me dona Morgue, la sage,
Et si me dist, que nule rage
N'est an teste, que il n'an ost.“
Vers le chastel s'an vont tantost,
Qui seoit pres, qu'il n'i ot pas
Plus de demie liue un pas,
As liues, qui el païs sont ;
Car a mesure des noz font
Les deus une, les quatre deus.
Et cil remest dormant toz seus,
Et cele ala l'oignemant querre.
La dame un suen escrin desserre,
S'an tret la boiste et si la charge
A la dameisele, et trop large
Li prie, que ele n'an soit ;
Les tanples et le front l'an froit ;
Qu'aillors point metre n'an besoingne.
Les tanples solement l'an oingne
Et le remenant bien li gart ;
Qu'il n'a point de mal autre part
Fors que solemant el cervel.
Robe veire, cote et mantel
Li fet porter de soie an grainne.
Cele li porte et si li mainne
An destre un palefroi mout buen.
Et avuec ce i met del suen
Chemise et braies deliiees
Et chauces nueves bien tailliees.
Atot ice tres tost s'an va :
Ancor celui dormant trova
La, ou ele l'avoit leissié.
Ses chevaus met an un pleissié,
Ses atache et lie mout fort
Et puis s'an vient la, ou cil dort,
Atot la robe et l'oignemant ;
Et fet mout tres grant hardemant,
Que del forsené tant s'aproche,
Qu'ele le menoie et atoche,
Et prant l'oignemant, si l'an oint,
Tant come an la boiste an a point,
Et sa garison tant covoite,
Que de l'oindre par tot esploite ;
Si le met trestot an despanse,
Que ne li chaut de la deffanse
Sa dame, ne ne l'an sovient.
Plus an i met, qu'il ne covient,
Mes bien, ce li est vis, l'anploie.
Les tanples et le front l'an froie
Et tot le cors jusqu'a l'artoil.
Tant li froia au chaut soloil
Les tanples et trestot le cors,
Que del cervel li issi fors
La rage et la melancolie.
Mes del cors oindre fist folie ;
Qu'il ne l'an estoit nus mestiers.
S'il an i eüst cinc sestiers,
S'eüst ele autel fet, ce cuit.
La boiste an porte, si s'an fuit,
Si s'est vers ses chevaus reposte.
Mes la robe mie n'an oste
Por ce, que, se Des le ravoie,
Viaut, qu'apareilliee la voie
Et qu'il la praingne et qu'il s'an veste.
Deriere un grant chasne s'areste
Tant que cil ot dormi assez,
Qui fu gariz et respassez,
Et rot son san et son memoire.
Mes nuz se voit come un ivoire,
S'a grant honte, et plus grant eüst,
Se il s'avanture seüst ;
Mes n'an set plus, que nuz se trueve.
Devant lui voit la robe nueve,
Si se mervoille a desmesure,
Comant et par quel avanture
Cele robe estoit la venue ;
Mes de sa char, que il voit nue,
Est trespansez et esbaïz,
Et dit, que morz est et traïz,
S'einsi l'a trové ne veü
Riens nule, qui l'et coneü.
Et tote voie si se vest
Et regarde par la forest,
S'il verroit nul home venir.
Lever se cuide et sostenir,
Mes ne puet tant, qu'aler s'an puisse.
Mestiers li est, qu'aïe truisse,
Qui li aït et qui l'an maint.
Car si l'a ses granz maus ataint,
Qu'a painnes puet sor piez ester.
Or n'i viaut mes plus arester
La dameisele, ainz est montee
Et est par delez lui alee,
Si con s'ele ne l'i seüst.
Et cil, qui grant mestier eüst
D'aïe, ne li chaussist, quel,
Qui le menast jusqu'a ostel,
Tant que il refust an sa force,
De li apeler mout s'esforce.
Et la dameisele autressi
Vet regardant anviron li,
Con s'ele ne sache, qu'il a.
Esbaïe va ça et la ;
Que droit vers lui ne viaut aler.
Et cil comance a rapeler :
„Dameisele ! de ça ! de ça !“
Et la dameisele adreça
Vers lui son palefroi anblant.
Cuidier li fist par tel sanblant,
Qu'ele de lui rien ne savoit,
N'onques mes veü ne l'avoit ;
Et san et corteisie fist.
Quant devant lui fu, si li dist :
„Sire chevaliers ! que volez,
Qui a tel besoing m'apelez ?“
„Ha !“ fet il, „dameisele sage !
Trovez me sui an cest boschage,
Je ne sai, par quel mescheance.
Por De et por vostre creance
Vos pri, que an toz guerredons
Me prestoiz ou donoiz an dons
Cest palefroi, que vos menez.“
„Volantiers, sire ; mes venez
Avuec moi la, ou je m'an vois.“
„Quel part ?“ fet il. — „Fors de cest bois
Jusqu'a un chastel ci selonc.“
„Dameisele ! or me dites donc,
Se vos avez mestier de moi ?“
„Oïl“, fet ele, „mes je croi,
Que vos n'estes mie bien sains.
Jusqu'a quinzainne a tot le mains
Vos covandroit a sejor estre.
Cest cheval, que je main an destre,
Prenez, s'irons jusqu'a l'ostel.“
Et cil, qui ne demandoit el,
Le prant et monte, si s'an vont,
Tant que il vindrent a un pont,
Don l'eve estoit rade et bruianz.
Et la dameisele rue anz
La boiste, qu'ele porte vuide.
Einsi vers sa dame se cuide
De son oignemant escuser,
Qu'ele dira, que au passer
Del pont einsi li meschaï,
Que la boiste an l'eve chaï ;
Por ce, que dessoz li çopa
Ses palefroiz, li eschapa
Del poing la boiste, et a bien pres,
Que ele ne chaï aprés,
Mes adonc fust la perte graindre.
Ceste mançonge voldra faindre,
Quant devant sa dame iert venue.
Ansanble ont lor voie tenue,
Tant que au chastel sont venu,
Si a la dame retenu
Mon seignor Yvain lieemant,
Et sa boiste et son oignemant
Demanda a sa dameisele,
Mes ce fu seul a seul ; et cele
Li a la mançonge retreite
Itel, come ele l'avoit feite ;
Que le voir ne l'an osa dire ;
S'an ot la dame mout grant ire
Et dist : „Ci a mout leide perte,
Et de ce sui seüre et certe,
Qu'ele n'iert ja mes recovree.
Mes des que la chose est alee,
Il n'i a que del consirrer.
Tel ore cuide an desirrer
Son bien, qu'an desirre son mal,
Si con gié, qui de cest vassal
Cuidoie bien et joie avoir,
Si ai perdu de mon avoir
Tot le meillor et le plus chier.
Neporquant je vos vuel proiier
De lui servir sor tote rien.“
„Ha ! dame, or dites vos mout bien !
Car ce seroit trop vilains jeus,
Qui d'un domage feroit deus.“

Atant de la boiste se teisent
Et mon seignor Yvain aeisent
De quanque eles pueent et sevent,
Sel baingnent et son chief li levent
Et le font rere et reoignier ;
Car l'an li poïst anpoignier
La barbe a plain poing sor la face.
Ne viaut chose, qu'an ne li face :
S'il viaut armes, an li atorne,
S'il viaut cheval, an li sejorne
Bel et grant et fort et hardi.
Tant sejorna, qu'a un mardi
Vint au chastel li cuens Aliers
A serjanz et a chevaliers,
Et mistrent feus et pristrent proies.
Et cil del chastel totes voies
Montent et d'armes se garnissent,
Armé et desarmé s'an issent
Tant que les coreors ataingnent,
Qui por aus foïr ne se daingnent,
Ainz les atandent a un pas.
Et mes sire Yvains fiert el tas
Qui tant a esté sejornez,
Qu'an sa force fu retornez,
Si feri de si grant vertu
Un chevalier parmi l'escu,
Qu'il mist an un mont, ce me sanble,
Cheval et chevalier ansanble,
N'onques puis cil ne releva ;
Qu'el vantre li cuers li creva,
Et fu parmi l'eschine frez.
Un petit s'est arriere trez
Mes sire Yvains et si recuevre,
Trestoz de son escu se cuevre
Et point por le pas desconbrer.
Si tost ne poist an nonbrer
Et un et deus et trois et quatre,
Que l'an ne li veïst abatre
Plus tost et plus delivremant
Quatre chevaliers erraumant.
Et cil, qui avuec lui estoient,
Por lui grant hardemant prenoient ;
Que tes a povre cuer et lasche,
Quant il voit, qu'uns prodon antasche
Devant lui une grant besoingne,
Que maintenant honte et vergoingne
Li cort sus et si giete fors
Le povre cuer, qu'il a el cors,
Si li done sodainnemant
Cuer de prodome et hardemant.
Einsi sont cil devenu preu,
Si tient mout bien chascuns son leu
An la meslee et an l'estor.
Et la dame fu an la tor
De son chastel montee an haut,
Et vit la meslee et l'assaut
Au pas desresnier et conquerre,
Et vit assez gisanz par terre
Des afolez et des ocis
Des suens et de ses anemis,
Mes plus des autres, que des suens.
Car li cortois, li preuz, li buens,
Mes sire Yvains, tot autressi
Les feisoit venir a merci,
Con li faucons fet les cerceles.
Et disoient et cil et celes,
Qui el chastel remés estoient
Et des batailles esgardoient :
„Ahi ! con vaillant sodoiier !
Con fet ses anemis ploiier,
Con roidemant il les requiert !
Tot autressi antre aus se fiert,
Con li lions antre les dains,
Quant l'angoisse et chace la fains.
Et tuit nostre autre chevalier
An sont plus hardi et plus fier ;
Que ja, se par lui seul ne fust,
Lance brisiee n'i eüst,
N'espee treite por ferir.
Mout doit an amer et cherir
Un prodome, quant an le trueve.
Veez or, comant cil se prueve,
Veez, come il se tient an ranc,
Veez, come il portaint de sanc
Et sa lance et s'espee nue,
Veez, comant il les remue,
Veez, comant il les antasse,
Come il lor vient, come il lor passe,
Come il ganchist, come il trestorne ;
Mes au ganchir petit sejorne
Et po demore an son retor.
Veez, quant il vient an l'estor,
Come il a po son escu chier,
Que tot le leisse detranchier ;
N'an a pitié ne tant ne quant.
Mes mout le veomes an grant
Des cos vangier, que l'an li done.
Qui de trestot le bois d'Argone
Li avroit fet lances, ce cuit,
N'an avroit il nule anquenuit ;
Qu'an ne l'an puet tant metre el fantre,
Qu'il nes peçoit et demant autre.
Et veez, comant il le fet
De l'espee, quant il la tret !
Onques ne fist de Durandart
Rolanz des Turs si grant essart
An Roncevaus ne an Espaingne !
Se il eüst an sa conpaingne
Auques de si buens conpaignons,
Li fel, de cui nos nos pleignons,
S'an alast ancui desconfiz
Ou il remassist toz honiz.“
Et dïent, que buer seroit nee,
Cui il avroit s'amor donee,
Qui si est as armes puissanz
Et dessor toz reconoissanz,
Si con cierges antre chandoiles
Et la lune antre les estoiles
Et li solauz dessor la lune.
Et de chascun et de chascune
A si les cuers, que tuit voldroient
Por la proesce, qu'an lui voient,
Que il eüst la dame prise,
Si fust la terre an sa justise.

Einsi tuit et totes prisoient
Celui, don verité disoient ;
Car çaus de la a si atainz,
Que il s'an fuient qui ainz ainz.
Mes il les chace mout de pres
Et tuit si conpaignon aprés ;
Que lez lui sont aussi seür,
Con s'il fussent anclos de mur
Haut et espés de pierre dure.
La chace mout longuemant dure,
Tant que cil, qui fuient, estanchent,
Et cil, qui chacent, les detranchent
Et lor chevaus lor esboelent ;
Li vif dessor les morz roelent,
Qui s'antrafolent et ocïent.
Leidemant s'antrecontralïent :
Et li cuens tot adés s'an fuit,
Mes mes sire Yvains le conduit,
Qui de lui siure ne se faint.
Tant le chace, que il l'ataint
Au pié d'une ruiste montee,
Et ce fu mout pres de l'antree
D'un fort recet, qui estoit suens.
Iluec fu retenuz li cuens :
Qu'onques nus ne li pot eidier ;
Et sanz trop longuemant pleidier
An prist la foi mes sire Yvains ;
Que des que il le tint as mains,
Et il furent seul per a per,
N'i ot neant de l'eschaper
Ne del ganchir ne del deffandre,
Ainz li plevi, qu'il s'iroit randre
A la dame de Noroison,
Si se metroit an sa prison
Et feroit pes a sa devise.
Et quant il an ot la foi prise,
Si li fist son chief desarmer
Et l'escu de son col oster,
Et l'espee li randi nue.
Ceste enors li est avenue,
Qu'il an mainne le conte pris,
Si le rant a ses anemis,
Qui n'an font pas joie petite.
Mes ainz fu la novele dite
Au chastel, que il i venissent.
Ancontre aus tuit et totes issent,
Et la dame devant toz vient.
Mes sire Yvains par la main tient
Son prisonier, si li presante.
Sa volanté et son creante
Fist lors li cuens outreemant,
Et par foi et par seiremant
Et par ploiges l'an fist seüre.
Ploiges li done et si li jure,
Que toz jorz mes pes li tandra
Et ses pertes restoerra,
Quanqu'ele an mosterra par prueves,
Et refera ses meisons nueves,
Que il avoit par terre mises.
Quant cez choses furent assises,
Einsi come a la dame sist,
Mes sire Yvains congié li quist.
Mes ele ne li donast mie,
Se il a fame ou a amie
La vossist prandre et noçoiier.
Mes nes siure ne convoiier
Ne se vost il leissier un pas,
Ainz s'an parti eneslepas ;
Qu'onques rien n'i valut proiiere.
Or se mist a la voie arriere
Et leissa mout la dame iriee,
Que il avoit mout feite liee.
Et con plus liee l'avoit feite,
Plus li poise et plus li desheite,
Quant il ne viaut plus demorer ;
Qu'ele le vossist enorer,
Et sel feïst, se lui pleüst,
Seignor de quanquë ele eüst,
Ou ele li eüst donees
Por son servise granz soudees,
Si granz, come il les vossist prandre ;
Mes il n'i vost onques antandre
Parole d'ome ne de fame.
Des chevaliers et de la dame
S'est partiz, mes que bien lor poist ;
Que plus retenir ne lor loist.