Vers 3341 à 3956

Mes sire Yvains pansis chemine
Par une parfonde gaudine,
Tant qu'il oï anmi le gaut
Un cri mout dolereus et haut,
Si s'adreça lors vers le cri
Cele part, ou il l'ot oï.
Et quant il parvint cele part,
Vit un lion an un essart
Et un serpant, qui le tenoit
Par la coe et si li ardoit
Trestoz les rains de flame ardant.
N'ala pas longues regardant
Mes sire Yvains cele mervoille.
A lui meïsme se consoille,
Au quel des deus il eidera.
Lors dit, qu'au lion secorra ;
Qu'a venimeus et a felon
Ne doit an feire se mal non.
Et li serpanz est venimeus,
Si li saut par la boche feus,
Tant est de felenie plains.
Por ce panse mes sire Yvains,
Qu'il l'ocirra premieremant.
L'espee tret et vient avant
Et met l'escu devant sa face,
Que la flame mal ne li face,
Que il gitoit parmi la gole,
Qui plus estoit lee d'une ole.
Se li lions aprés l'assaut,
La bataille pas ne li faut,
Mes que qu'il l'an avaingne aprés,
Eidier li voldra il adés ;
Que pitiez l'an semont et prie,
Qu'il face secors et aïe
A la beste jantil et franche.
A l'espee, qui soef tranche,
Va le felon serpant requerre,
Si le tranche jusqu'an la terre
Et an deus meitiez le tronçone,
Fiert et refert et tant l'an done,
Que tot le demince et depiece.
Mes il li covint une piece
Tranchier de la coe au lion
Por la teste au serpant felon,
Qui par la coe le tenoit.
Tant, con tranchier an covenoit,
An trancha ; qu'onques mains ne pot.
Quant le lion delivré ot,
Cuida, qu'a lui li covenist
Conbatre et que sor lui venist ;
Mes il ne le se pansa onques.
Oëz, que fist li lions donques !
Con fist que frans et de bon' eire,
Que il li comança a feire
Sanblant, que a lui se randoit,
Et ses piez joinz li estandoit
Et vers terre ancline sa chiere,
S'estut sor les deus piez deriere ;
Et puis si se ragenoilloit
Et tote sa face moilloit
De lermes par humilité.
Mes sire Yvains par verité
Set, que li lions l'an mercie
Et que devant lui s'umelie
Por le serpant, qu'il avoit mort,
Et lui delivré de la mort ;
Si li plest mout ceste avanture.
Por le venin et por l'ordure
Del serpant essuie s'espee,
Si l'a el fuerre rebotee,
Puis si se remet a la voie.
Et li lions lez lui costoie ;
Que ja mes ne s'an partira,
Toz jorz mes avuec lui ira ;
Que servir et garder le viaut.
Devant a la voie s'aquiaut,
Tant qu'il santi dessoz le vant,
Si come il s'an aloit devant,
Bestes sauvages an pasture,
Si le semont fains et nature
D'aler an proie et de chacier
Por sa vitaille porchacier ;
Ce viaut nature, qu'il le face.
Un petit s'est mis an la trace,
Tant que son seignor a mostré
Qu'il a santi et ancontré
Vant et fler de sauvage beste.
Lors le regarde, si s'areste ;
Que il le viaut servir an gre ;
Car ancontre sa volanté
Ne voldroit aler nule part.
Et cil parçoit a son esgart,
Qu'il li mostre, que il l'atant.
Bien l'aparçoit et bien l'antant,
Que, s'il remaint, il remandra,
Et, se il le siut, il prandra
La veneison, qu'il a santie.
Lors le semont et si l'escrie
Aussi come un brachet feïst.
Et li lions maintenant mist
Le nes au vant, qu'il ot santi,
Ne ne li ot de rien manti ;
Qu'il n'ot pas une archiee alee,
Quant il vit an une valee
Tot seul pasturer un chevruel.
Cestui prandra il ja son vuel,
Et il si fist au premier saut,
Puis si an but le sanc tot chaut.
Quant ocis l'ot, si le gita
Sor son dos et si l'an porta,
Tant que devant son seignor vint,
Qui puis an grant chierté le tint
Et a lui a pris conpaignie
A trestoz les jorz de sa vie
Por la grant amor, qu'an lui ot.
Ja fu pres de nuit, si li plot,
Qu'ilueques se herbergeroit
Et del chevruel escorcheroit,
Tant come il an voldroit mangier.
Lors le comance a escorchier,
Le cuir li fant dessor la coste,
De la longe un lardé li oste
Et tret le feu d'un chaillo bis,
Si l'a de seche busche espris ;
Et met an une broche an rost
Son lardé cuire au feu mout tost,
Sel rosti tant, que toz fu cuiz.
Mes del mangier fu nus deduiz ;
Qu'il n'i ot pain ne vin ne sel,
Ne nape ne coutel ne el.
Que qu'il manja, devant lui jut
Ses lions, qu'onques ne se mut,
Ainz l'a tot adés regardé,
Tant que il ot de son lardé
Tant mangié, que il n'an pot plus.
Del chevruel tot le soreplus
Manja li lions jusqu'as os.
Et cil tint son chief a repos
Tote la nuit sor son escu,
A tel repos, come ce fu ;
Et li lions ot tant de sans,
Qu'il veilla et fu an espans
Del cheval garder, qui peissoit
L'erbe, qui petit l'angreissoit.

Au matin s'an revont ansanble
Et autel vie, ce me sanble,
Come il orent la nuit menee,
Ont ansanble andui demenee
Presque trestote une quinzainne,
Tant qu'avanture a la fontainne
Dessoz le pin les amena.
La par po ne se forsena
Mes sire Yvains autre foiiee,
Quant la fontainne ot aprochiee
Et le perron et la chapele,
Mil foiz las et dolanz s'apele
Et chiet pasmez, tant fu dolanz ;
Et s'espee, qui fu colanz,
Chiet del fuerre, si li apointe
As mailles del hauberc la pointe
Androit le col pres de la joe.
N'i a maille, qui ne descloe,
Et l'espee del col li tranche
La char dessoz la maille blanche,
Tant qu'ele an fist le sanc cheoir.
Li lions cuide mort veoir
Son conpaignon et son seignor.
Ains de rien nule duel greignor
N'oïstes conter ne retreire,
Come il an comança a feire !
Il se detort et grate et crie
Et s'a talant, que il s'ocie
De l'espee, don li est vis,
Qu'ele et son buen seignor ocis.
A ses danz l'espee li oste
Et sor un fust gisant l'acoste
Et deriere a un tronc l'apuie,
Qu'ele ne ganchisse ne fuie,
Quant il i hurtera del piz.
Ja fust ses voloirs aconpliz,
Quant cil de pasmeisons revint ;
Et li lions son cors retint,
Qui a la mort toz acorsez
Coroit come pors aorsez,
Qui ne prant garde, ou il se fiere.
Mes sire Yvains an tel meniere
Dejoste le perron se pasme,
Au revenir mout fort se blasme
De l'an, que trespassé avoit,
Por quoi sa dame le haoit,
Et dit : „Que fet, que ne se tue
Cist las, qui joie s'est tolue ?
Que faz je, las ! que ne m'oci ?
Comant puis je demorer ci
Et veoir les choses ma dame ?
An mon cors por qu'areste l'ame ?
Que fet ame an si dolant cors ?
S'ele s'an iere alee fors,
Ne seroit pas an tel martire.
Haïr et blasmer et despire
Me doi voir mout et je si faz.
Qui pert la joie et le solaz
Par son mesfet et par son tort,
Mout se doit bien haïr de mort.
Haïr et ocirre se doit.
Et gié, tant con nus ne me voit,
Por quoi m'esparng ? que ne me tu ?
Don n'ai je cest lion veü,
Qui por moi a si grant duel fet,
Qu'il se vost m'espee antreset
Parmi le piz el cors boter ?
Et je doi la mort redoter,
Qui a duel ai joie changiee ?
De moi s'est la joie estrangiee —
Joie ? La ques ? N'an dirai plus ;
Que ce ne porroit dire nus ;
S'ai demandee grant oiseuse.
Des joies fu la plus joieuse
Cele, qui m'iere asseüree ;
Mes mout m'ot petite duree.
Et qui ce pert par son mesfet,
N'est droiz, que buene avanture et.“

Que que il einsi se demante,
Une cheitive, une dolante
Estoit an la chapele anclose,
Qui vit et oï ceste chose
Par le mur, qui estoit crevez.
Maintenant qu'il fu relevez
De pasmeisons, si l'apela.
„Des !“ fet ele, „cui oi je la ?
Qui est, qui se demante si ?“
Et cil li respont : „Et vos, qui ?“
„Je sui“, fet ele, „une cheitive,
La plus dolante riens, qui vive.“
Et il respont : „Tes, fole riens !
Tes diaus est joie, tes maus biens
Anvers le mien, don je languis.
Tant con li hon a plus apris
A delit et a joie vivre,
Plus le desvoie et plus l'enivre
Diaus, quant il l'a, que un autre home.
Uns foibles hon porte la some
Par us et par acostumance,
Qu'uns autre de greignor puissance
Ne porteroit por nule rien.“
„Par foi !“, fet ele, „je sai bien,
Que c'est parole tote voire ;
Mes por ce ne fet mie a croire,
Que vos aiiez plus mal de moi ;
Et por ce mie ne le croi,
Qu'il m'est avis, que vos poez
Aler, quel part que vos volez,
Et je sui ci anprisonee,
Si m'est tes faeisons donee,
Que demain serai ceanz prise
Et livree a mortel juïse.“
„Ha, Des !“ fet il, „por quel forfet ?“
„Sire chevaliers ! ja Des n'et
De l'ame de mon cors merci,
Se je l'ai mie desservi !
Et neporquant je vos dirai
Le voir, que ja n'an mantirai,
Por quoi je sui ci an prison :
L'an m'apele de traïson,
Ne je ne truis, qui m'an deffande,
Que l'an demain ne m'arde ou pande.“
„Or primes“, fet il, „puis je dire,
Que li miens diaus et la moie ire
A la vostre dolor passee ;
Qu'estre porriiez delivree,
Par cui que soit, de cest peril.
Don ne porroit ce estre ?“ — „Oïl ;
Mes je ne sai ancor, par cui.
Il ne sont el monde que dui,
Qui osassent, por moi deffandre,
Vers trois homes bataille anprandre.“
„Comant ? Por De ! sont il donc troi ?“
„Oïl, sire ! a la moie foi.
Troi sont, qui traïtre me claimment.“
„Et qui sont cil, qui tant vos aimment,
Don li uns si hardiz seroit,
Qu'a trois conbatre s'oseroit,
Por vos sauver et garantir ?“
„Je le vos dirai sanz mantir :
Li uns est mes sire Gauvains,
Et li autre mes sire Yvains,
Por cui demain serai a tort
Livree a martire de mort.“
„Por cui ?“ fet il, „qu'avez vos dit ?“
„Sire ! se Damedés m'aït,
Por le fil au roi Uriien.“
„Or vos ai antandue bien,
Mes vos n'i morroiz ja sanz lui.
Gié meïsmes cil Yvains sui,
Por cui vos estes an esfroi ;
Et vos estes cele, ce croi,
Qui an la sale me gardastes,
Ma vie et mon cors me sauvastes
Antre les deus portes colanz,
Ou je fui pansis et dolanz
Et angoisseus et antrepris.
Morz i eüsse esté ou pris,
Se ne fust vostre buene aïe.
Or me dites, ma douce amie !
Qui sont cil, qui de traïson
Vos apelent et an prison
Vos ont anclose an cest reclus ?“
„Sire ! nel vos celerai plus,
Des qu'il vos plest, que jel vos die.
Voirs est, que je ne me fains mie
De vos eidier an buene foi.
Par l'amonestemant de moi
Ma dame a seignor vos reçut,
Mon los et mon consoil an crut ;
Et, par la sainte Paternostre,
Plus por son preu, que por le vostre
Le cuidai feire et cuit ancore.
Itant vos an reconois ore :
S'enor et vostre volanté
Porquis, se Des me doint santé !
Mes, quant ç'avint, que vos eüstes
L'an trespassé, que vos deüstes
Revenir a ma dame ça,
Ma dame a moi se correça
Et mout se tint a deceüe
De ce, qu'ele m'avoit creüe.
Et quant ce sot li seneschaus,
Uns fel, uns lerre, uns desleaus,
Qui grant anvie me portoit
Por ce, que ma dame creoit
Moi plus, que lui, de maint afeire,
Si vit bien, que or pooit feire
Antre moi et li grant corroz.
An plainne cort et veant toz
M'amist, que por vos l'oi traïe.
Et je n'oi consoil ne aïe
Fors que moi sole, qui savoie,
Qu'onques vers ma dame n'avoie
Traïson feite ne pansee,
Si respondi come esfreee
Tot maintenant sanz consoil prandre,
Que je m'an feroie deffandre
Par un chevalier contre trois.
Onques cil ne fu si cortois,
Que il le deignast refuser ;
Ne ressortir ne reüser
Ne me lut por rien, qu'avenist.
Einsi a parole me prist,
Si me covint d'un chevalier
Ancontre trois gage baillier
Par respit de quarante jorz.
Puis ai esté an maintes corz ;
A la cort le roi Artu fui,
N'i trovai consoil de nelui,
Ne ne trovai, qui me deïst
De vos chose, qui me seïst ;
Car il n'an savoient noveles.“
„Et mes sire Gauvains, chaeles,
Li frans, li douz, ou iere il donques ?
A s'aïe ne failli onques
Dameisele desconseilliee,
Que ne li fust apareilliee.“
„Se je a cort trové l'eüsse,
Ja requerre ne li seüsse
Rien nule, qui me fust veee ;
Mes la reïne an a menee
Uns chevaliers, ce me dist l'an,
Don li rois fist que fors del san,
Quant aprés lui l'an anvoia.
Je cuit, que Kes la convoia
Jusqu'au chevalier, qui l'an mainne,
S'an est antrez an mout grant painne
Mes sire Gauvains, qui la quiert.
Ja mes nul jor a sejor n'iert
Jusqu'a tant, qu'il l'avra trovee.
Tote la verité provee
Vos ai de m'avanture dite.
Demain morrai de mort despite,
Si serai arse sanz respit
Por mal de vos et por despit.“
Et il respont : „Ja De ne place,
Que l'an por moi nul mal vos face !
Tant que je vive, n'i morroiz !
Demain atandre me porroiz
Apareillié lonc ma puissance,
De metre an vostre delivrance
Mon cors, si con je le doi feire.
Mes de conter ne de retreire
As janz, qui je sui, ne vos chaille !
Que qu'avaingne de la bataille,
Gardez, que l'an ne me conoisse !“
„Certes, sire ! por nule angoisse
Vostre non ne descoverroie.
La mort einçois an soferroie,
Des que vos le volez einsi.
Et neporquant je vos depri,
Que ja por moi ne reveigniez.
Ne vuel pas, que vos anpreigniez
Bataille si tres felenesse.
Vostre merci de la promesse,
Que volantiers la feriiez,
Mes trestoz quites an soiiez !
Car miauz est, que je sole muire,
Que je les veïsse deduire
De vostre mort, et de la moie.
Ja por ce n'an eschaperoie,
Quant il vos avroient ocis ;
S'est miauz, que vos remeigniez vis,
Que nos i fussiens mort andui.“
„Mout m'avez or dit grant enui“,
Fet mes sire Yvains, „douce amie !
Espoir ou vos ne volez mie
Estre delivre de la mort,
Ou vos despisiez le confort,
Que je vos faz de vos eidier.
Ne quier or plus a vos pleidier ;
Que vos avez tant fet por moi,
Certes, que faillir ne vos doi
A nul besoing, que vos aiiez.
Bien sai, que mout vos esmaiiez,
Mes, se De plest, an cui je croi,
Il an seront honi tuit troi.
Or n'i a plus ; que je m'an vois,
Ou que soit, logier an cest bois ;
Que d'ostel pres ne sai je point.“
„Sire !“, fet ele, „Des vos doint
Et buen ostel et buene nuit,
Et de chose, qui vos enuit,
Si con je le desir, vos gart !“
Tantost mes sire Yvains s'an part
Et li lions toz jorz aprés,
S'ont tant alé, qu'il vindrent pres
D'un fort recet a un baron,
Qui clos estoit tot anviron
De mur espés et fort et haut.
Li chastiaus ne cremoit assaut
De mangonel ne de perriere ;
Qu'il estoit forz de grant meniere ;
Mes fors des murs estoit si rese
La place, qu'il n'i ot remese
An estant borde ne meison.
Assez an savroiz la reison
Une autre foiz, quant leus sera.
Tote la droite voie an va
Mes sire Yvains vers le recet,
Et vaslet saillent jusqu'a set,
Qui li ont le pont avalé,
Si li sont a l'ancontre alé.
Mes del lion, que venir voient
Avuec lui, duremant s'esfroient,
Si li dïent, que, se lui plest,
Son lion a la porte lest,
Qu'il ne les afot ou ocie.
Et il respont : „N'an parlez mie !
Que ja n'i anterrai sanz lui.
Ou nos avrons ostel andui,
Ou je remandrai ça defors ;
Qu'autretant l'aim come mon cors.
Et neporquant n'an dotez rien !
Que je le garderai si bien,
Qu'estre porroiz tot a seür.“
Cil respondent : „A buen eür !“
A tant sont el chastel antré
Et vont tant, qu'il ont ancontré
Chevaliers et dames venanz
Et dameiseles avenanz,
Qui le salüent et desçandent
Et a lui desarmer antandent ;
Si li dïent : „Bien soiiez vos,
Biaus sire ! venuz antre nos !
Et Des vos i doint demorer,
Tant que vos an puissiez torner
A grant joie et a grant enor !“
Des le plus haut jusqu'au menor
Li font joie et formant s'an painnent,
A grant joie el chastel le mainnent.
Et quant grant joie li ont feite,
Une dolors, qui les desbeite,
Lor refet la joie obliër,
Si recomancent a criër
Et plorent et si s'esgratinent.
Einsi mout longuemant ne finent
De joie feire et de plorer :
Joie por lor oste enorer
Font sanz ce, que talant an aient ;
Car d'une avanture s'esmaient,
Qu'il atandent a l'andemain,
S'an sont tuit seür et certain,
Qu'il l'avront ainz que midis soit.
Mes sire Yvains s'esbaïssoit
De ce, que si sovant chanjoient
Et duel et joie demenoient,
S'an mist le seignor a reison
De l'ostel et de la meison.
„Por De !“, fet il, „biaus douz chiers sire !
Ice vos pleiroit il a dire,
Por quoi m'avez tant enoré
Et tant fet joie et tant ploré ?“
„Oïl, s'il vos vient a pleisir ;
Mes le celer et le teisir
Devriiez miauz assez voloir.
Chose, qui vos face doloir,
Ne vos dirai je ja mon vuel.
Leissiez nos feire nostre duel,
Si n'an metez ja rien au cuer !“
„Ce ne porroit estre a nul fuer,
Que je duel feire vos veïsse
Et je a mon cuer n'an meïsse ;
Ainz le desir mout a savoir,
Quel duel que je an doie avoir.“
„Donc“, fet il, „le vos dirai gié.
Mout m'a uns jaianz domagié,
Qui voloit, que je li donasse
Ma fille, qui de biauté passe
Totes les puceles del monde.
Li fel jaianz, cui Des confonde,
A non Harpins de la Montaingne.
N'est nus jorz, que del mien ne praingne
Tot, quanquë il an puet ataindre.
Nus miauz de moi ne se doit plaindre
Ne duel feire ne duel mener.
De duel devroie forsener ;
Que sis fiz chevaliers avoie,
Plus biaus el monde ne savoie ;
Ses a toz sis li jaianz pris.
Veant moi a les deus ocis,
Et demain ocirra les quatre,
Se je ne truis, qui s'ost conbatre
A lui por mes fiz delivrer,
Ou se je ne li vuel livrer
Ma fille ; et dit, quant il l'avra,
As plus vils garçons, qu'il savra
An sa meison, et as plus orz
La liverra por lor deporz ;
Qu'il ne la deigneroit mes prandre.
A demain puis cest duel atandre,
Se Damedés ne me consoille.
Et por ce n'est mie mervoille,
Biaus sire chiers ! se nos plorons ;
Mes por vos tant, con nos poons,
Nos resforçons a la foiiee
De feire contenance liee ;
Car fos est, qui prodome atret
Antor lui, s'enor ne li fet ;
Et vos me ressanblez prodome.
Or vos ai trestote la some
Dite de nostre grant destresce.
N'an chastel ne an forteresce
Ne nos a leissié li jaianz
Fors tant, con nos avons ceanz.
Vos meïsmes bien le veïstes
Anuit, se garde vos preïstes,
Qu'il n'a leissié vaillant un oef
Fors de cez murs, qui tot sont nuef,
Ainz a trestot le borc plené.
Quant ce, qu'il vost, an ot mené,
Si mist el remenant le feu.
Einsi m'a fet maint felon jeu.“

Mes sire Yvains tot escouta,
Quanque ses ostes li conta,
Et quant trestot escouté ot,
Si li redist ce, que lui plot.
„Sire !“, fet il, „de vostre enui
Mout iriez et mout dolanz sui ;
Mes d'une chose me mervoil,
Se vos n'an avez quis consoil
A la cort le buen roi Artu.
Nus hon n'est de si grant vertu,
Qu'a sa cort ne poïst trover
Tes, qui voldroient esprover
Lor vertu ancontre la soe.“
Et lors li descuevre et desnoe
Li riches hon, que il eüst
Buene aïe, se il seüst,
Ou trover mon seignor Gauvain.
„Cil ne le preïst pas an vain ;
Que ma fame est sa suer germainne ;
Mes la fame le roi an mainne
Uns chevaliers d'estrange terre,
Qui l'ala a la cort requerre.
Neporquant ja ne l'an eüst
Menee por rien, qu'il seüst,
Ne fust Kes, qui anbricona
Le roi tant, que il li bailla
La reïne et mist an sa garde.
Cil fu fos et cele musarde,
Qui an son conduit se fia ;
Et je sui cil, qui ja i a
Trop grant domage et trop grant perte ;
Car ce est chose tote certe,
Que mes sire Gauvains, li preuz,
Por sa niece et por ses neveuz
Fust ça venuz grant aleüre,
Se il seüst ceste avanture ;
Mes ne la set, don tant me grieve,
Par po que li cuers ne m'an crieve ;
Ainz est alez aprés celui,
Cui Des doint et honte et enui,
Quant menee an a la reïne.“
Mes sire Yvains onques ne fine
De sospirer, quant ce antant ;
De la pitié, que il l'an prant,
Li respont : „Biaus douz sire chiers !
Je m'an metroie volantiers
An l'avanture et el peril,
Se li jaianz et vostre fil
Venoient demain a tel ore,
Que n'i face trop grant demore ;
Que je serai aillors que ci
Demain a ore de midi,
Si con je l'ai acreanté.“
„Biaus sire ! de la volanté
Vos merci je“, fet li prodon,
„Çant mile foiz an un randon.“
Et totes les janz de l'ostel
Li redisoient autretel.