Vers 3957 à 4532

Atant vint d'une chanbre fors
La pucele, jante de cors
Et de face bele et pleisanz.
Mout vint sinple, mate et teisanz ;
Qu'onques ses diaus ne prenoit fin ;
Vers terre tint le chief anclin.
Et sa mere revint de coste ;
Que mostrer lor voloit son oste
Li sire, qui les ot mandees.
An lor mantiaus anvelopees
Vindrent por lor lermes covrir ;
Et il lor comande a ovrir
Les mantiaus et les chiés lever
Et dit : „Ne vos doit pas grever
Ce, que je vos comant a feire ;
Qu'un prodome mout de bon' eire
Nos a Des et buene avanture
Ceanz doné, qui m'asseüre,
Qu'il se conbatra au jaiant.
Or n'an alez plus delaiant,
Qu'au pié ne l'an ailliez cheoir !“
„Ce ne me lest ja Des veoir !“,
Fet mes sire Yvains maintenant ;
„Voir, ne seroit mie avenant,
Que au pié me venist la suer
Mon seignor Gauvain a nul fuer
Ne sa niece. Des m'an deffande,
Qu'orguiauz an moi tant ne s'estande,
Que a mon pié venir les les !
Voir, ja n'obliëroie mes
La honte, que je an avroie ;
Mes de ce buen gre lor savroie,
Se eles se reconfortoient
Jusqu'a demain, que eles voient,
Se Des les voldra conseillier.
Moi n'an covient il plus proiier,
Mes que li jaianz si tost vaingne,
Qu'aillors mantir ne me covaingne ;
Que por rien je ne leisseroie,
Que demain a midi ne soie
Au plus grant afeire por voir,
Que je onques poïsse avoir.“
Einsi ne les viaut pas del tot
Asseürer ; car an redot
Est, que li jaianz ne venist
A tel ore, que il poïst
Venir a tans a la pucele,
Qui est anclose an la chapele.
Et neporquant tant lor promet,
Qu'an buene esperance les met.
Et tuit et totes l'an mercïent ;
Qu'an sa proesce mout se fïent
Et mout cuident, qu'il soit prodon,
Por la conpaignie au lion,
Qui aussi doucemant se gist
Lez lui, come uns aigniaus feïst.
Por l'esperance, qu'an lui ont,
Se confortent et joie font,
N'onques puis duel ne demenerent.
Quant ore fu, si l'an menerent
Couchier an une chanbre clere,
Et la dameisele et sa mere
Furent andeus a son couchier ;
Qu'eles l'avoient ja mout chier,
Et çant mile tanz plus l'eüssent,
Se la corteisie seüssent
Et la grant proesce de lui.
Il et li lions anbedui
Leanz jurent et reposerent ;
Qu'autres janz gesir n'i oserent ;
Ainz lor fermerent si bien l'uis,
Que il n'an porent issir puis
Jusqu'au demain a l'ajornee.
Quant la chanbre fu desfermee,
Si se leva et oï messe
Et atandi por la promesse,
Qu'il lor ot feite, jusqu'a prime.
Le seignor del chastel meïme
Apele oiant toz, si li dit :
„Sire ! je n'ai plus de respit,
Ainz m'an irai, si ne vos poist ;
Que plus demorer ne me loist.
Mes sachiez bien veraiemant,
Que volantiers et buenemant,
Se trop n'eüsse grant besoing
Et mes afeires ne fust loing,
Demorasse ancore une piece
Por les neveuz et por la niece
Mon seignor Gauvain, que j'aim mout !“
Trestoz li sans fremist et bout
A la pucele de peor
Et a la dame et au seignor ;
Tel peor ont, qu'il ne s'an aut,
Que il li vostrent de si haut,
Come il furent, au pié venir,
Quant il lor prist a sovenir,
Que lui ne fust ne bel ne buen.
Lors li ofre a doner del suen
Li sire, s'il an viaut avoir,
Ou soit de terre ou soit d'avoir,
Mes que ancore un po atande.
Et il respont : „Des m'an deffande,
Que je ja nule rien an aie !“
Et la pucele, qui s'esmaie,
Comance mout fort a plorer,
Si li prie de demorer.
Come destroite et angoisseuse
Por la reïne glorïeuse
Del ciel et des anges li prie
Et por De, qu'il ne s'an aut mie,
Ainz atande ancore un petit,
Et por son oncle, dont il dit,
Que il conoist et aimme et prise.
Lors l'an est mout granz pitiez prise,
Quant il ot, qu'ele se reclaimme
De par l'ome, que il plus aimme,
Et de par la dame des ciaus,
Et de par De, qui est li miaus
Et la douçors de piëté.
D'angoisse a un sospir gité ;
Que por le reaume de Tarse
Ne voldroit, que cele fust arse,
Que il avoit asseüree.
Sa vie avroit corte duree,
Ou il istroit toz vis del sans,
S'il n'i pooit venir a tans ;
Et d'autre part an grant destresce
Le retient la granz jantillesce
Mon seignor Gauvain, son ami ;
Que por po ne li fant par mi
Li cuers, quant demorer ne puet.
Neporquant ancor ne se muet,
Einçois demore et si atant,
Tant que li jaianz vint batant,
Qui les chevaliers amenoit ;
Et a son col un pel tenoit
Grant et quarré, agu devant,
Dont il les botoit mout sovant.
Et il n'avoient pas vestu
De robe vaillant un festu
Fors chemises sales et ordes,
S'avoient bien liiez de cordes
Les piez et les mains, si seoient
Sor quatre roncins, qui clochoient,
Foibles et megres et redois.
Chevauchant vindrent lez un bois,
Et uns nains come boz anflez
Les ot coe a coe noez,
Ses aloit costoiant toz quatre,
N'onques ne les finoit de batre
D'une corgiee a quatre neuz,
Don mout cuidoit feire que preuz ;
Si les batoit si qu'il seignoient.
Einsi vilmant les amenoient
Antre le jaiant et le nain.
Devant la porte anmi un plain
S'areste li jaianz et crie
Au prodome, que il desfie
Ses fiz de mort, s'il ne li baille
Sa fille, et a sa garçonaille
La liverra a jaelise ;
Car il ne l'aimme tant ne prise,
Qu'an li se deignast avillier.
De garçons avra un millier
Avuec li sovant et menu,
Qui seront poeilleus et nu,
Tel con ribaut et torchepot,
Qui tuit i metront lor escot.
Par po que li prodon n'esrage,
Quant ot celui, qui a putage
Dit, que sa fille liverra,
Ou, tantost si qu'il le verra,
Seront ocis si quatre fil ;
S'a tel destresce come cil,
Qui miauz s'ameroit morz que vis.
Sovant se claimme las cheitis
Et plore formant et sospire.
Et lors li ancomance a dire
Mes sire Yvains, li frans, li douz :
„Sire ! mout est fel et estouz
Cil jaianz, qui la fors s'orguelle ;
Mes ja Des ce sofrir ne vuelle,
Qu'il et pooir an vostre fille !
Mout la despit et mout l'aville.
Trop seroit granz mesavanture,
Se si tres bele creature
Et de si haut parage nee
Iere a garçons abandonee.
Ça mes armes et mon cheval !
Et feites le pont treire aval,
Si m'an leissiez outre passer !
L'un an covandra ja verser,
Ou moi ou lui, ne sai le quel.
Se je le felon, le cruël,
Qui si vos va contraliant,
Pooie feire humeliant,
Tant que voz fiz vos randist quites,
Et les hontes, qu'il vos a dites,
Vos venist ceanz amander,
Puis vos voldroie comander
A De, s'iroie a mon afeire.“
Lors li vont son cheval fors treire
Et totes ses armes li baillent,
De lui armer mout se travaillent
Et bien et tost l'ont atorné.
A lui armer n'ont sejorné
Se tot le mains non que il porent.
Quant bien et bel atorné l'orent,
Si n'i ot que de l'avaler
Le pont et del leissier aler.
L'an li avale et il s'an ist ;
Mes aprés lui ne remassist
Li lions an nule meniere.
Et cil, qui sont remés arriere,
Le comandent au sauveor ;
Car de lui ont mout grant peor,
Que li maufez, li anemis,
Qui maint prodome avoit ocis
Veant lor iauz anmi la place,
Autretel de lui ne reface ;
Si prïent De, qu'il le deffande
De mort, et vif et sain lor rande,
Et le jaiant li doint ocirre.
Chascuns si come il le desirre,
An prie De mout doucemant.
Et li jaianz mout fieremant
Vint vers lui, si le menaça
Et dist : „Cil, qui t'anvea ça,
Ne t'amoit mie, par mes iauz !
Certes, il ne se pooit miauz
De toi vangier an nule guise.
Mout a bien sa vanjance prise
De quanque tu li as mesfet.“
„De neant ies antrez an plet !“,
Fet cil, qui ne le dote rien,
„Or fai ton miauz, et gié le mien ;
Que parole oiseuse me lasse.“
Tantost mes sire Yvains li passe,
Cui tarde, qu'il s'an soit partiz.
Ferir le va anmi le piz,
Qu'il ot armé d'une pel d'ors.
Et li jaianz li vient le cors
De l'autre part atot son pel.
Anmi le piz li dona tel
Mes sire Yvains, que la pel fausse,
El sanc del cors an leu de sausse
Le fer de la lance li moille ;
Et li jaianz del pel le roille
Si que trestot ploiier le fet.
Mes sire Yvains l'espee tret,
Dont il savoit ferir granz cos.
Le jaiant a trové desclos,
Qui an sa force se fioit,
Tant que armer ne se deignoit.
Et cil, qui tint l'espee treite,
Li a une anvaïe feite.
Del tranchant, non mie del plat,
Le fiert si, que il li abat
De la joe une charbonee.
Et cil l'an ra une donee
Si que trestot le fet brunchier
Jusque sor le col del destrier.
A cest cop li lions se creste,
De son seignor eidier s'apreste,
Si saut par ire et par grant force,
S'aert et fant come une escorce
Sor le jaiant la pel velue,
Dessoz la pel li a tolue
Une grant piece de la hanche,
Les ners et les braons li tranche.
Et li jaianz li est estors,
Si bret et crie come tors ;
Que mout l'a li lions grevé.
A deus mains a le pel levé
Et cuide ferir, mes il faut,
Et li lions arriere saut,
Si pert son cop et chiet an vain
Par delez mon seignor Yvain,
Que l'un ne l'autre n'adesa.
Et mes sire Yvains antesa,
S'i a deus cos antrelardez.
Einçois qu'il se fust regardez,
Li ot au tranchant de l'espee
L'espaule del bu dessevree.
A l'autre cop soz la memele
Li bota tote l'alemele
De s'espee parmi le foie.
Li jaianz chiet, la morz l'asproie ;
Et se uns granz chasnes cheïst,
Ne cuit greignor esfrois feïst,
Que li jaianz fist au cheoir.
Cest cop vostrent mout tuit veoir
Cil, qui estoient as creniaus.
Lors i parut li plus isniaus ;
Car tuit corent a la cuiriee
Si con li chien, qui ont chaciee
La beste tant que il l'ont prise.
Einsi corurent sanz feintise
Tuit et totes par anhatine
La, ou cil gist gole sovine.
Li sire meïsmes i cort,
Et totes les janz de sa cort,
Cort i la fille, cort la mere.
Ore ont joie li quatre frere,
Qui mout avoient mal sofert.
De mon seignor Yvain sont cert,
Qu'il nel porroient retenir
Por rien, qui poïst avenir,
Si li prïent de retorner
Por deduire et por sejorner
Tot maintenant, que fet avra
Son afeire la, ou il va.
Et il respont, qu'il ne les ose
Asseürer de nule chose ;
Qu'il ne set mie deviner,
S'il li doit bien ou mal finer ;
Mes au seignor itant dist il,
Qu'il voloit, que si quatre fil
Et sa fille praingnent le nain,
S'aillent a mon seignor Gauvain,
Quant il savront, qu'il iert venuz,
Et comant il s'est contenuz
Viaut, que li soit dit et conté.
Car por neant fet la bonté,
Qui ne viaut qu'ele soit seüe.
Et il dïent : „Ja n'iert teüe
Ceste bontez ; car n'est pas droiz.
Bien ferons quanque vos voldroiz ;
Mes dites nos, que nos porrons
Dire, quant devant lui vandrons.
De cui nos porrons nos loer,
Quant nos ne vos savons nomer ?“
Et il respont : „Tant li porroiz
Dire, quant devant lui vandroiz,
Que li Chevaliers au Lion
Vos dis, que je avoie non.
Et avuec ce priier vos doi,
Que vos li dites de par moi,
Qu'il me conoist bien et je lui,
Et si ne set, qui je me sui.
De rien nule plus ne vos pri.
Or m'an estuet aler de ci,
Et c'est la riens, qui plus m'esmaie,
Que je ci trop demoré n'aie ;
Car ainz que midis soit passez,
Avrai aillors a feire assez,
Se je i puis venir a ore.“
Lors s'an part ; que plus n'i demore.
Mes einçois mout priié li ot
Li sire au plus bel que il pot,
Que ses quatre fiz an menast.
N'i ot nul, qui ne se penast
De lui servir, se il vossist ;
Mes ne li plot ne ne li sist,
Que nus li feïst conpaignie :
Seus lor a la place guerpie.
Et maintenant que il s'esmuet,
Tant con chevaus porter l'an puet,
S'an retorne vers la chapele.
La voie fu et droite et bele,
Et il la sot mout bien tenir.
Mes, ainz que il poïst venir
A la chapele, an fu fors treite
La dameisele et la rez feite,
Ou ele devoit estre mise.
Trestote nue an sa chemise
Au feu liiee la tenoient
Cil, qui a tort sus li metoient
Ce, qu'ele onques pansé n'avoit.
Mes sire Yvains vient, si la voit
Au feu, ou an la viaut ruiier,
Et ce li dut mout enuiier.
Cortois ne sages ne seroit,
Qui de rien nule an doteroit.
Voirs est, que mout li enuia,
Mes buene fiance an lui a,
Que Des et droiz li eideront,
Qui a sa partie seront :
An cez conpaignons mout se fie
Et son lion ne rehet mie.
Vers la presse toz esleissiez
S'an va criant : „Leissiez, leissiez
La dameisele, janz mauveise !
N'est droiz, qu'an re ne an forneise
Soit mise ; que forfet ne l'a.“
Et cil tantost que ça que la
Se departent, si li font voie.
Et lui est mout tart, que il voie
Des iauz celi, que del cuer voit,
An quel leu que ele onques soit ;
As iauz la quiert tant qu'il la trueve,
Et met son cuer an tel esprueve,
Qu'il le retient et si l'afrainne,
Si con l'an retient a grant painne
Au fort frain le cheval tirant.
Et neporquant an sospirant
La regarde mout volantiers,
Mes ne fet mie si antiers
Ses sospirs, que l'an les conoisse,
Ainz les retranche a grant angoisse.
Et de ce granz pitiez li prant,
Qu'il ot et voit et si antant
Les povres dames, qui feisoient
Mout tres grant duel et si disoient :
„Ha ! Des, con nos as obliëes !
Con remandrons ore esgarees,
Qui perdomes si buene amie
Et tel consoil et tel aïe,
Qui a la cort por nos estoit !
Par son consoil nos revestoit
Ma dame de ses robes veires.
Mout changera or li afeires ;
Qu'il n'iert mes, qui por nos parot.
Mal et de De, qui la nos tot !
Mal et, par cui nos la perdrons !
Que trop grant domage i avrons.
N'iert mes, qui die ne qui lot :
„„Cest mantel ver et cest sorcot
Et ceste cote, chiere dame !
Donez a cele franche fame !
Que voir, se vos li anvoiiez,
Mout i sera bien anploiiez ;
Que ele an a mout grant sofreite.““
Ja de ce n'iert parole treite ;
Car nus n'est mes frans ne cortois,
Ainz demande chascuns einçois
Por lui, que por autrui ne fet,
Sanz ce, que nul mestier an et.“

Einsi se demantoient celes,
Et mes sire Yvains iere antre eles,
S'ot bien oïes les conplaintes,
Qui n'estoient fausses ne faintes,
Et vit Lunete agenoilliee
An sa chemise despoilliee,
Qui sa confesse avoit ja prise,
Et De de ses pechiez requise
Merci, et sa coupe clamee.
Et cil, qui mout l'avoit amee,
Vient vers li, si l'an lieve amont
Et dit : „Ma dameisele ! ou sont
Cil, qui vos blasment et ancusent ?
Tot maintenant, s'il nel refusent,
Lor iert la bataille aramie.“
Et cele, qui ne l'avoit mie
Ancor veü ne esgardé,
Li dit : „Sire ! de la part De
Veigniez vos a mon grant besoing !
Cil, qui portent le faus tesmoing,
Sont ci vers moi tuit apresté ;
S'un po eüssiez plus esté,
Par tans fusse charbons et çandre.
Venuz estes por moi deffandre,
Et Des le pooir vos an doint,
Einsi con gié de tort n'ai point
Del blasme, don je sui retee !“
Ceste parole ont escoutee
Li seneschaus et si dui frere.
„Ha !“, font il, „fame, chose avere
De voir dire et de mantir large !
Mout est ore fos, qui ancharge
Por ta parole si grant fes.
Mout est li chevaliers nïés,
Qui est venuz morir por toi ;
Qu'il est seus et nos somes troi.
Mes je li lo, qu'il s'an retort,
Einçois que a noauz li tort.“
Et cil respont, cui mout enuie :
„Qui peor avra, si s'an fuie !
Ne criem pas tant voz trois escuz,
Que sanz cop m'an aille veincuz.
Mout seroie or mal afeitiez,
Se je toz sains et toz heitiez
La place et le chanp vos leissoie.
Ja tant, con je sains et vis soie,
Ne m'an fuirai por tes menaces.
Mes je te consoil, que tu faces
La dameisele clamer quite,
Que tu as a grant tort sordite ;
Qu'ele le dit et je l'an croi,
Si m'an a plevie sa foi
Et dit sor le peril de s'ame,
Qu'onques traïson vers sa dame
Ne fist ne dist ne ne pansa.
Bien croi ce, qu'ele dit m'an a,
Si la deffandrai, se je puis ;
Que son droit an m'aïe truis.
Et qui le voir dire an voldroit,
Des se retient devers le droit,
Et Des et droiz a un se tienent ;
Et quant il devers moi s'an vienent,
Donc ai je meillor conpaignie,
Que tu n'as, et meillor aïe.“
Et cil respont mout folemant,
Que il mete an son nuisemant
Trestot, quanque lui plest et siet,
Mes que ses lions ne li griet.
Et cil dit, qu'onques son lion
N'i amena por chanpion,
N'autrui que lui mesler ne quiert ;
Mes se ses lions le requiert,
Si se deffande vers lui bien ;
Qu'il ne l'an afie de rien.
Et cil respont : „Que que tu dies,
Se tu ton lion ne chasties
Et tu nel fes an pes ester,
Donc n'as tu ci que demorer,
Mes reva t'an ! si feras san ;
Que par tot cest païs set l'an,
Comant ceste traï sa dame,
S'est droiz, que an feu et an flame
L'an soit randue la merite.“
„Ne place le saint Esperite !“,
Fet cil, qui bien an set le voir,
„Ja Des ne m'an lest removoir,
Tant que je delivree l'aie !“
Lors dit au lion, qu'il se traie
Arriere et trestoz coiz se gise,
Et il le fet a sa devise.

Li lions s'est arriere trez.
Tantost la parole et li plez
Remest d'aus deus, si s'antresloingnent.
Li troi ansanble vers lui poingnent,
Et il vint ancontre aus le pas ;
Que desreer ne se vost pas
As premiers cos ne angoissier.
Lor lances lor leisse froissier,
Et si retient la soe sainne,
De son escu lor fet quintainne,
S'i a chascuns sa lance freite.
Et il a une pointe feite,
Tant que d'aus un arpant s'esloingne ;
Mes tost revint a la besoingne ;
Qu'il n'a cure de lonc sejor.
Le seneschal an son retor
Devant ses deus freres ataint,
Sa lance sor le cors li fraint,
Sel porte a terre maugré suen ;
Et cop li a doné si buen,
Qu'une grant piece estordiz jut
Ne de rien nule ne li nut.
Et li autre dui sus li vienent,
As espees, que nues tienent,
Li donent granz cos anbedui,
Mes plus granz reçoivent de lui ;
Que de ses cos vaut li uns seus
Des lor tot a mesure deus ;
Si se deffant vers aus si bien,
Que de son droit n'an portent rien,
Tant que li seneschaus relieve,
Qui de tot son pooir li grieve,
Et li autre avuec lui se painnent,
Tant qu'il le grievent et sormainnent.
Et li lions, qui ce esgarde,
De lui eidier plus ne se tarde ;
Que mestiers li est, ce li sanble.
Et les dames totes ansanble,
Qui la dameisele mout aimment,
Damedé sovant an reclaimment
Et si li prïent de buen cuer,
Que sofrir ne vuelle a nul fuer,
Que cil i soit morz ne conquis,
Qui por li s'est el chaple mis.
De priiere aïe li font
Les dames ; qu'autres bastons n'ont.
Et li lions li fet aïe
Tel, qu'a la premiere anvaïe
A de si grant aïr feru
Le seneschal, qui a pié fu,
Que aussi, con ce fussent pailles,
Fet del hauberc voler les mailles,
Et contreval si fort le sache,
Que de l'espaule li esrache
Le tandron atot le costé.
Quanqu'il ataint, l'an a osté
Si que les antrailles li perent.
Cest cop li autre dui conperent.