Vers 4533 à 5106

Or sont el chanp tot per a per.
De la mort ne puet eschaper
Li seneschaus, qui se tooille
Et devolte an l'onde vermoille
Del sanc chaut, qui del cors li saut.
Li lions les autres assaut ;
Qu'arriere ne le puet chacier
Por ferir ne por menacier
Mes sire Yvains an nule guise,
S'i a il mout grant painne mise ;
Mes li lions sanz dote set,
Que ses sire mie ne het
S'aïe, einçois l'an aimme plus,
Si lor passe fieremant sus,
Tant que cil de ses cos se plaingnent
Et lui reblescent et mehaingnent.
Quant mes sire Yvains voit blecié
Son lion, mout a correcié
Le cuer del vantre et n'a pas tort ;
Mes del vangier se painne fort,
Si les va si estoutoiant,
Qu'il les mainne jusqu'a neant,
Si que vers lui ne se deffandent
Et que an sa merci se randent
Por l'aïe, que li a feite
Li lions, qui mout se desheite ;
Car an tanz leus estoit plaiiez,
Que bien pooit estre esmaiiez.
Et d'autre part mes sire Yvains
Ne restoit mie trestoz sains,
Ainz avoit el cors mainte plaie ;
Mes de tot ce tant ne s'esmaie
Con de son lion, qui se diaut.
Ore a tot einsi come il viaut
La dameisele delivree,
Et s'ire li a pardonee
La dame trestot de son gre.
Et cil furent ars an la re,
Qui por li ardoir fu esprise ;
Car ce est reisons de justise,
Que cil, qui autrui juge a tort,
Doit de cele meïsme mort
Morir, que il li a jugiee.
Ore est Lunete baude et liee,
Quant a sa dame est acordee,
Si ont tel joie demenee,
Que nule janz si grant ne firent ;
Et tuit a lor seignor ofrirent
Lor servise si come il durent,
Sanz ce, que il ne le conurent ;
Neïs la dame, qui avoit
Son cuer et si ne le savoit,
Li pria mout, qu'il li pleüst
A sejorner tant qu'il eüst
Respassé son lion et lui.
Et il dit : „Dame ! ce n'iert hui,
Que je me remaingne an cest point,
Tant que ma dame me pardoint
Son mautalant et son corroz.
Lors finera mes travauz toz.“
„Certes“, fet ele, „ce me poise.
Ne taing mie por tres cortoise
La dame, qui mal cuer vos porte.
Ne deüst pas veer sa porte
A chevalier de vostre pris,
Se trop n'eüst vers li mespris.“
„Dame !“, fet il, „que qu'il me griet,
Trestot me plest, quanque li siet.
Mes ne m'an metez plus an plet !
Que l'acheison ne le forfet
Ne diroie por nule rien,
Se çaus non, qui le sevent bien.“
„Set le donc nus, se vos dui non ?“
„Oïl, voir, dame !“ — „Et vostre non
Seviaus, biaus sire ! car nos dites !
Puis si vos an iroiz toz quites.“
„Toz quites, dame ? Non feroie.
Plus doi, que randre ne porroie.
Neporquant ne vos doi celer,
Comant je me faz apeler.
Ja del Chevalier au Lion
N'orroiz parler se de moi non.
Par cest non vuel, que l'an m'apiaut.“
„Por De, biaus sire ! ce qu'espiaut,
Que onques mes ne vos veïmes
Ne vostre non nomer n'oïmes ?“
„Dame ! par ce savoir poez,
Que ne sui gueires renomez.“
Lors dit la dame de rechief :
„Ancor, s'il ne vos estoit grief,
De remenoir vos priëroie.“
„Certes, dame ! je n'oseroie,
Tant que certainnement seüsse,
Que le buen gre ma dame eüsse.“
„Ore alez donc a De, biaus sire !
Qui vostre pesance et vostre ire
Vos atort, se lui plest, a joie !“
„Dame !“, fet il, „Des vos an oie !“
Puis dist antre ses danz soef :
„Dame ! vos an portez la clef,
Et la serre et l'escrin avez,
Ou ma joie est, si nel savez.“

Atant s'an part a grant angoisse,
Si n'i a nul, qui le conoisse
Fors que Lunete solemant,
Qui le convea longuemant.
Lunete sole le convoie,
Et il li prie tote voie,
Que ja par li ne soit seü,
Quel chanpion ele a eü.
„Sire !“, fet ele, „non iert il.“
Aprés ce li repria cil,
Que de lui li ressovenist,
Et vers sa dame li tenist
Buen leu, s'ele an venoit an eise.
Cele li dit, que il s'an teise ;
Qu'ele n'an iert ja oblïeuse
Ne recreanz ne pereceuse.
Et cil l'an mercie çant foiz,
Si s'an va pansis et destroiz
Por son lion, que li estuet
Porter ; que siure ne le puet.
An son escu li fet litiere
De la mosse et de la fouchiere.
Quant il li a feite sa couche,
Au plus soef qu'il puet le couche,
Si l'an porte tot estandu
Dedanz l'anvers de son escu.
Einsi sor son cheval l'an porte,
Tant que il vint devant la porte
D'une meison et fort et bele.
Ferme la trueve, si apele,
Et li portiers overte l'a
Si tost, qu'onques n'i apela
Un mot aprés le premerain.
A la resne li tant sa main,
Si li dit : „Biaus sire, ore avant !
L'ostel mon seignor vos presant,
Se il vos i plest a desçandre.“
„Cest presant“, fet il, „vuel je prandre ;
Car je an ai mout grant mestier,
Et si est tans de herbergier.“

Atant a la porte passee
Et vit la mesniee amassee,
Qui tuit a l'ancontre li vont.
Salüé et desçandu l'ont,
Si li metent sor un perron
Son escu atot le lion.
Et li autre ont son cheval pris,
Si l'ont an une estable mis,
Et li autre si come il doivent
Ses armes pranent et reçoivent.
Et li sire la novele ot :
Tot maintenant que il le sot,
Vient an la cort, si le salue ;
Et la dame est aprés venue
Et si fil et ses filles totes,
Et d'autres janz i ot granz rotes,
Sel herbergierent a grant joie.
Mis l'ont an une chanbre coie
Por ce, que malade le truevent,
Et de ce mout bien se repruevent,
Que son lion avuec lui metent.
Et de lui garir s'antremetent
Deus puceles, qui mout savoient
De cirurgie et si estoient
Filles au seignor de leanz.
Jorz i sejorna ne sai quanz,
Tant que il et ses lions furent
Gari et que raler s'an durent.

Mes dedanz ce fu avenu,
Que a la Mort ot plet tenu
Li sire de la Noire Espine,
Si prist a lui tel anhatine
La Morz, que morir le covint.
Aprés sa mort einsi avint
De deus filles, que il avoit,
Que l'ainznee dist, qu'ele avroit
Trestote la terre a delivre
Toz les jorz, qu'ele avroit a vivre,
Que ja sa suer n'i partiroit.
Et l'autre dist, que ele iroit
A la cort le roi Artu querre
Aïe a desresnier sa terre.
Et quant l'autre vit, que sa suer
Ne li soferroit a nul fuer
Tote la terre sanz tançon,
S'an fu an mout grant cusançon
Et pansa, que, s'ele pooit,
Einçois de li a cort vandroit.
A tant s'aparoille et atorne,
Ne demore ne ne sejorne,
Ainz erra tant qu'a la cort vint.
Et l'autre aprés sa voie tint
Et quanqu'ele pot, se hasta,
Mes sa voie et ses pas gasta ;
Que la premiere avoit ja fet
A mon seignor Gauvain son plet,
Et il li avoit otroiié
Ce, qu'ele li avoit proiié ;
Mes tel covant antre aus avoit,
Que, se nus par li le savoit,
Ja puis ne s'armeroit por li,
Et ele l'otroia einsi.

Atant vint l'autre suer a cort,
Afublee d'un mantel cort
D'escarlate et de fres ermine,
S'avoit tierz jor, que la reïne
Estoit de la prison venue,
Ou Meleaganz l'ot tenue,
Et trestuit li autre prison ;
Et Lanceloz par traïson
Estoit remés dedanz la tor.
Et an celui meïsme jor,
Que a la cort vint la pucele,
I fu venue la novele
Del jaiant cruël et felon,
Que li Chevaliers au Lion
Avoit an bataille tüé.
De par lui orent salüé
Mon seignor Gauvain si neveu.
Le grant servise et le grant preu,
Que il lor avoit por lui fet,
Li a sa niece tot retret
Et dist, que bien le conoissoit,
Si ne savoit, qui il estoit.

Ceste parole a antandue
Cele, qui mout iere esperdue
Et trespansee et esbaïe ;
Que nul consoil ne nule aïe
A la cort trover ne cuidoit,
Quant toz li miaudre li failloit ;
Qu'ele avoit an mainte meniere
Et par amor et par proiiere
Essaiié mon seignor Gauvain.
Et il li dist : „Amie ! an vain
M'an priiez ; car je nel puis feire ;
Que j'ai anpris un autre afeire,
Que je ne leisseroie pas.“
Et la pucele eneslepas
S'an part et vient devant le roi.
„Rois !“, fet ele, „je ving a toi
Et a ta cort querre consoil.
N'an i truis point ; mout m'an mervoil,
Quant je consoil n'i puis avoir.
Mes ne feroie pas savoir,
Se je sanz congié m'an aloie.
Et sache ma suer tote voie,
Qu'avoir porroit ele del mien
Par amor, s'ele an voloit rien ;
Que ja par force, que je puisse,
Por qu'aïe ne consoil truisse,
Ne li leirai mon heritage !“
„Vos dites“, fet li rois, „que sage.
Andemantres que ele est ci,
Je li consoil et lo et pri,
Qu'ele vos lest vostre droiture.“
Et cele, qui estoit seüre
Del meillor chevalier del monde,
Respont : „Sire ! Des me confonde,
Se ja de ma terre li part
Chastel ne vile ne essart
Ne bois ne terre n'autre chose !
Mes se nus chevaliers s'an ose
Por li armer, qui que il soit,
Qui vuelle desresnier son droit,
Si vaingne trestot maintenant !“
„Ne li ofrez mie avenant,“
Fet li rois, „que plus i estuet.
S'ele viaut, porchacier se puet
Au mains jusqu'a quarante jorz
Au jugemant de totes corz.“
Et cele dit : „Biaus sire rois !
Vos poez establir voz lois
Tes, con vos plest, et buen vos iert,
N'a moi n'apant n'a moi n'afiert,
Que je desdire vos an doive ;
Si me covient, que je reçoive
Le respit, s'ele le requiaut.“
Et cele dit, qu'ele le viaut
Et mout le desirre et demande.
Tantost le roi a De comande,
Si s'est de la cort departie
Et panse, qu'an tote sa vie
Ne finera par tote terre
Del Chevalier au Lion querre,
Qui met sa painne a conseillier
Celes, qui d'aïe ont mestier.

Einsi est an la queste antree
Et trespasse mainte contree ;
Qu'onques noveles n'an aprist,
Don tel duel ot, que maus l'an prist.
Mes de ce mout bien li avint,
Que chiés un suen acointe vint,
Ou ele estoit amee mout ;
S'aparut mout bien a son vout,
Qu'ele n'estoit mie bien sainne.
A li retenir mistrent painne,
Tant que son afeire lor dist.
Et une autre pucele anprist
La voie, qu'ele avoit anprise,
Por li s'est an la queste mise.
Einsi remest cele a sejor,
Et cele erra au lonc del jor
Tote sole grant anbleüre,
Tant que vint a la nuit oscure,
Si li enuia mout la nuiz.
Et de ce dobla li enuiz,
Qu'il plovoit a si grant desroi,
Con Damedés avoit de quoi,
Et fu el bois mout an parfont.
Et la nuiz et li bois li font
Grant enui, mes plus li enuie,
Que li bois ne la nuiz, la pluie.
Et li chemins estoit si maus,
Que sovant estoit ses chevaus
Jusque pres des çangles an tai,
Si pooit estre an grant esmai
Pucele an bois et sanz conduit
Par mal tans et par male nuit
Si noire, qu'ele ne veoit
Le cheval, sor qu'ele seoit.
Et por ce reclamoit adés
De avant et sa mere aprés
Et puis toz sainz et totes saintes
Et fist la nuit oreisons maintes,
Que Des a ostel la menast
Et fors de cel bois la gitast ;
Si pria tant que ele oï
Un cor, don mout se resjoï ;
Qu'ele cuide, que ele truisse
Ostel, mes que venir i puisse ;
Si s'est vers la voiz adreciee,
Tant qu'ele antre an une chauciee,
Et la chauciee droit la mainne
Vers le cor, dont ele ot l'alainne ;
Que par trois foiz mout longuemant
Sona li corz mout hautemant.
Et ele erra droit vers la voiz,
Tant qu'ele vint a une croiz,
Qui sor la chauciee iere a destre.
Iluec pansa, que pooit estre
Li corz et cil, qui l'ot soné.
Cele part a esperoné,
Tant qu'ele aprocha vers un pont
Et vit d'un chastelet reont
Les murs blans et la barbacane.
Einsi par avanture assane
Au chastel, si s'i adreça
Par la voiz, qui l'i amena.
La voiz del cor l'i a atreite,
Que soné avoit une gueite,
Qui sor les murs montee estoit.
Tantost con la gueite la voit,
Si la salue et puis desçant
Et la clef de la porte prant,
Si li oevre et dit : „Bien veigniez,
Pucele, qui que vos soiiez !
Anquenuit avroiz buen ostel.“
„Je ne demant anuit mes el,“
Fet la pucele, et il l'an mainne.
Aprés le travail et la painne,
Que ele avoit le jor eü,
Li est de l'ostel bien cheü ;
Car mout i est bien aeisiee.
Aprés mangier l'a aresniee
Ses ostes et si li anquiert,
Ou ele va et qu'ele quiert.
Et cele li respont adonques :
„Je quier ce, que je ne vi onques,
Mien esciant, ne ne conui ;
Mes un lion a avuec lui,
Et l'an me dit, se je le truis,
Que an lui mout fiër me puis.“
„Gié“, fet cil, „l'an report tesmoing ;
Que a un mien mout grant besoing
Le m'anvea Des avant ier.
Beneoit soient li santier,
Par ou il vint a mon ostel !
Car d'un mien anemi mortel
Me vanja, don si lié me fist,
Que tot veant mes iauz l'ocist.
A cele porte la defors
Demain porroiz veoir le cors
D'un grant jaiant, que il tua
Si tost que gueires n'i sua.“
„Por De, sire !“ fet la pucele,
„Car m'an dites voire novele,
Se vos savez, ou il torna
Et s'il an nul leu sejorna !“
„Je non,“ fet il, „se Des me voie !
Mes bien vos metrai a la voie
Demain, par ou il s'an ala.“
„Et Des,“ fet ele, „me maint la,
Ou je voire novele an oie !
Car se jel truis, mout avrai joie.“

Einsi mout longuemant parlerent,
Tant qu'an la fin couchier alerent.
Quant vint, que l'aube fu crevee,
La dameisele fu levee,
Qui an mout grant porpans estoit
De trover ce, qu'ele queroit.
Et li sire de la meison
Se lieve et tuit si conpaignon,
Si la metent el droit chemin
Vers la fontainne soz le pin.
Et ele de l'errer s'esploite
Vers le chastel la voie droite,
Tant qu'ele i vint et demanda
As premerains, qu'ele trova,
S'il li savoient anseignier
Le lion et le chevalier,
Qui antraconpaignié s'estoient.
Et cil dïent, qu'il li avoient
Veü trois chevaliers conquerre
Droit an cele piece de terre.
Et cele dit eneslepas :
„Por De ! ne me celez vos pas,
Des que vos tant dit m'an avez,
Se vos plus dire m'an savez !“
„Nenil,“ font il, „nos n'an savons
Fors tant con dit vos an avons.
Nos ne savons, que il devint.
Se cele, por cui il ça vint,
Noveles ne vos an ansaingne,
N'iert ci, qui plus vos an apraingne.
Et se a li volez parler,
Ne vos estuet pas loing aler ;
Qu'ele est alee De proiier
Et messe oïr an cel mostier,
Et s'i a ja tant demoré,
Qu'assez i puet avoir oré.“

Que que il parloient einsi,
Lunete del mostier issi,
Si li dïent : „Veez la la !“
Et cele ancontre li ala,
Si se sont antresaluëes.
Tantost a cele demandees
Les noveles, qu'ele queroit.
Et cele dit, qu'ele feroit
Un suen palefroi anseler ;
Car avuec li voldroit aler,
Si la manroit vers un pleissié
La, ou ele l'avoit leissié ;
Et cele de cuer l'an mercie.
Li palefroiz ne tarda mie :
An li amainne et ele monte.
Lunete an chevauchant li conte,
Comant ele fu ancusee
Et de traïson apelee,
Et comant la rez fu esprise,
Ou ele devoit estre mise,
Et comant il li vint eidier,
Quant ele an ot plus grant mestier.
Einsi parlant la convea,
Tant qu'au droit chemin l'avea,
Ou mes sire Yvains l'ot leissiee.
Quant jusque la l'ot convoiiee,
Si li dist : „Cest chemin tandroiz,
Tant que an aucun leu vandroiz,
Ou novele vos an iert dite,
Se De plest et saint Esperite,
Plus voire, que je ne la sai.
Bien me sovient, que jel leissai
Ou pres de ci ou ci meïmes,
Ne puis ne nos antreveïmes,
Ne je ne sai, qu'il a puis fet ;
Que grant mestier eüst d'antret,
Quant il se departi de moi.
Par ci aprés lui vos anvoi,
Et Des le vos doint trover sain,
Se lui plest, ainz hui que demain !
Ore alez ! A De vos comant ;
Que je ne vos siurai avant,
Que ma dame a moi ne s'ireisse.“
Maintenant l'une l'autre leisse :
Cele retorne, et cele an va
Sole, tant que ele trova
La meison, ou mes sire Yvains
Ot esté tant que toz fu sains,
Et vit devant la porte janz,
Chevaliers, dames et serjanz
Et le seignor de la meison,
Ses salue et met a reison,
S'il sevent, que il li apraingnent
Noveles et qu'il li ansaingnent
Un chevalier, que ele quiert.
„Qui est ?“, font il. — „Cil qui ja n'iert
Sanz un lion, ç'ai oï dire.“
„Par foi, pucele !“, fet li sire,
„Il parti ore androit de nos.
Ancore ancui l'ateindroiz vos,
Se les esclos savez garder,
Mes gardez vos de trop tarder !“
„Sire !“, fet ele, „Des m'an gart !
Mes or me dites, de quel part
Je le siurai !“ Et il li dïent :
„Par ci tot droit“, et si li prïent,
Qu'ele de par aus le salut.
Mes ce gueires ne lor valut ;
Qu'ele onques ne s'an antremist,
Mes lués es granz galos se mist ;
Que l'anbleüre li sanbloit
Trop petite estre, et si anbloit
Ses palefroiz de grant eslés.
Einsi galope par les tes
Con par la voie igal et plainne,
Tant qu'ele voit celui, qui mainne
Le lion an sa conpaignie.
Lors a joie et dit : „Des, aïe !
Or voi ce, que tant ai chacié,
Mout l'ai bien seü et tracié.
Mes se je chaz et rien ne praing,
Que me vaudra, se je l'ataing ?
Po ou neant, voire, par foi !
Se je ne l'an main avuec moi,
Donc ai je ma painne gastee.“
Einsi parlant s'est tant hastee,
Que toz ses palefroiz tressue,
Si l'ataint et si le salue.
Et cil li respont aussi tost :
„Des vos gart, bele ! et si vos ost
De cusançon et de pesance !“
„Et vos, sire ! ou j'ai esperance,
Que bien m'an porriiez oster !“
Lors se va lez lui acoster
Et dit : „Sire ! mout vos ai quis.
Li granz renons de vostre pris
M'a mout fet aprés vos lasser
Et mainte contree passer.
Tant vos ai quis, la De merci,
Qu'a vos sui assanblee ci.
Et se je nul mal i ai tret,
De rien nule ne m'an deshet
Ne ne m'an plaing ne ne m'an manbre.
Tuit me sont alegié li manbre ;
Que la dolors me fu anblee,
Tantost qu'a vos fui assanblee ;
Si n'est pas la besoingne moie :
Miaudre de moi a vos m'anvoie,
Plus jantils fame et plus vaillanz.
Mes se ele est a vos faillanz,
Donc l'a vostre renons traïe ;
Qu'ele n'atant d'aillors aïe.
Par vos cuide ma dameisele
Tote desresnier sa querele,
Qu'une soe suer deserete ;
Ne viaut, qu'autre s'an antremete.
Nus ne li puet feire cuidier,
Que autre li poïst eidier.
L'amor a la deseritee
Avroiz conquise et achetee
Et creü vostre vasselage
Par desresnier son heritage !
Ele meïsme vos queroit
Por le bien, qu'an vos esperoit,
Ne ja autre n'i fust venue,
Se maus ne l'eüst detenue
Tes, que par force au lit la trest.
Or me respondez, s'il vos plest,
Se vos venir i oseroiz
Ou se vos an reposeroiz !“
„Nenil“, fet il ; „de reposer
Ne se puet nus hon aloser,
Ne je ne reposerai mie,
Ainz vos siurai, ma douce amie !
Volantiers la, ou vos pleira.
Et se de moi grant afeire a
Cele, por cui vos me querez,
Ja ne vos an desesperez,
Que je tot mon pooir n'an face.
Or me doint Des eür et grace,
Que je par sa buene avanture
Puisse desresnier sa droiture !“