Vers 5107 à 5770

Einsi antre aus deus chevauchierent
Parlant tant que il aprochierent
Le chastel de Pesme Avanture.
De passer outre n'orent cure ;
Que li jorz aloit declinant.
Au chastel vienent cheminant,
Et les janz, qui venir les voient,
Trestuit au chevalier disoient :
„Mal veigniez, sire, mal veigniez !
Cist ostés vos fu anseigniez
Por mal et por honte andurer.
Ce porroit uns abes jurer.“
„Ha !“ fet il, „janz fole et vilainne,
Janz de tote mauvestié plainne
Et qui a toz biens as failli,
Por quoi m'avez si assailli ?“
„Por quoi ? Vos le savroiz assez,
S'ancore un po avant passez !
Mes ja nule rien n'an savroiz
Jusque tant que esté avroiz
Lassus an cele forteresce.“
Tantost mes sire Yvains s'adresce
Vers la tor, et les janz s'escrïent,
Trestuit a haute voiz li dïent :
„Hu ! hu ! maleüreus, ou vas ?
S'onques an ta vie trovas,
Qui te feïst honte ne let,
La, ou tu vas, t'an iert tant fet,
Que ja par toi n'iert reconté.“
„Janz sanz enor et sanz bonté,“
Fet mes sire Yvains, qui escoute,
„Janz maleüreuse et estoute,
Por quoi m'assaus, por quoi m'aquiaus ?
Que me demandes, que me viaus,
Qui si aprés moi te degroces ?“
„Amis ! de neant te corroces,“
Fist une dame auques d'aage,
Qui mout estoit cortoise et sage,
„Que, certes, por mal ne te dïent
Nule chose, einçois te chastïent,
Se tu le savoies antandre,
Que lassus n'ailles ostel prandre,
Ne le porquoi dire ne t'osent ;
Mes il te chastïent et chosent
Por ce, que esmaiier te vuelent.
Et par costume feire suelent
Autel a toz les sorvenanz
Por ce, que il n'aillent leanz.
Et la costume si est tes,
Que nos n'osons an noz ostés
Herbergier por rien, qui avaingne,
Nul prodome, qui de fors vaingne.
Ore est sor toi del soreplus :
La voie ne te deffant nus.
Se tu viaus, lassus monteras,
Mes par mon los retorneras.“
„Dame !“, fet il, „se je creoie
Vostre consoil, je cuideroie,
Que j'i eüsse enor et preu ;
Mes je ne savroie, an quel leu
Je trovasse ostel anuit mes.“
„Par foi !“, fet ele, „et je m'an tes ;
Qu'a moi riens nule n'an afert.
Alez, quel part que buen vos iert !
Et neporquant grant joie avroie,
Se je de leanz vos veoie
Sanz trop grant honte revenir ;
Mes ce ne porroit avenir.“
„Dame !“, fet il, „Des le vos mire !
Mes mes fos cuers leanz me tire,
Si ferai ce, que mes cuers viaut.“
Tantost vers la porte s'aquiaut
Et ses lions et sa pucele.
Et li portiers a lui l'apele,
Si li dist : „Venez tost, venez !
An tel leu estes arivez,
Ou vos seroiz bien retenuz,
Et mal i soiiez vos venuz !“

Einsi li portiers le semont
Et haste de venir amont,
Mes mout li fet leide semonse.
Et mes sire Yvains sanz response
Par devant lui s'an passe et trueve
Une grant sale haute et nueve,
S'avoit devant un prael clos
De pes aguz, reonz et gros,
Et par antre les pes leanz
Vit puceles jusqu'a trois çanz,
Qui diverses oevres feisoient.
De fil d'or et de soie ovroient
Chascune au miauz qu'ele savoit.
Mes tel povreté i avoit,
Que desliiees et desçaintes
An i ot de povreté maintes,
Et as memeles et as cotes
Estoient lor cotes derotes
Et les chemises as cos sales.
Les cos gresles et les vis pales
De fain et de meseise avoient.
Il les voit, et eles le voient,
Si s'anbrunchent totes et plorent
Et une grant piece demorent,
Qu'eles n'antandent a rien feire,
Ne lor iauz ne pueent retreire
De terre, tant sont acorees.
Quant un po les ot regardees
Mes sire Yvains, si se trestorne,
Droit vers la porte s'an retorne,
Et li portiers contre lui saut,
Si li escrie ; „Ne vos vaut ;
Que vos n'an istroiz or, biaus mestre !
Vos voldriiez or la fors estre,
Mes, par mon chief ! riens ne vos monte ;
Ainz avroiz eü tant de honte,
Que plus n'an porriiez avoir ;
Si n'avez mie fet savoir,
Quant vos estes venuz ceanz ;
Que del rissir est il neanz.“
„Ne je ne quier“, fet il, „biaus frere !
Mes di moi, par l'ame ton pere !
Dameiseles, que j'ai veües
An cest prael, don sont venues,
Qui dras de soie et orfrois tissent ?
Oevres font, qui mout m'abelissent ;
Mes ce me desabelist mout,
Qu'eles sont de cors et de vout
Megres et pales et dolantes ;
Si m'est avis, beles et jantes
Fussent mout, se eles eüssent
Ités choses, qui lor pleüssent.“
„Gié“, fet il, „nel vos dirai mie.
Querez autrui, qui le vos die !“
„Si ferai je, quant miauz ne puis.“
Lors quiert tant que il trueve l'uis
Del prael, ou les dameiseles
Ovroient, et vint devant eles,
Si les salue ansanble totes
Et si lor voit cheoir les gotes
Des lermes, qui lor decoroient
Des iauz, si come eles ploroient.
Et il lor dit : „Des, s'il li plest,
Cest duel, qui ne sai don vos nest,
Vos ost del cuer et tort a joie !“
L'une respont : „Des vos an oie,
Que vos an avez apelé !
Il ne vos iert mie celé,
Qui nos somes et de quel terre.
Espoir ce volez vos anquerre.“
„Por el“, fet il, „ne ving je ça.“
„Sire ! il avint mout grant pieç'a,
Que li rois de l'Isle as Puceles
Aloit por aprandre noveles
Par les corz et par les païs,
S'ala tant come fos naïs,
Qu'il s'anbati an cest peril.
An mal eür i venist il !
Que nos cheitives, qui ci somes,
La honte et le mal an avomes,
Qui onques ne le desservimes.
Et sachiez bien, que vos meïmes
I poez mout grant honte atandre,
Se reançon n'an viaut an prandre !
Mes tote voie einsi avint,
Que mes sire an cest chastel vint,
Ou il a deus fiz de deable,
Si nel tenez vos mie a fable !
Que de fame et de netun furent.
Icil dui conbatre se durent
Au roi, don dolors fu mout granz ;
Qu'il n'avoit pas dis et huit anz ;
Si le poïssent tot porfandre
Aussi come un aignelet tandre.
Et li rois, qui grant peor ot,
S'an delivra au miauz qu'il pot,
Si jura, qu'il anvoieroit
Chascun an, tant con droiz seroit,
Ceanz de ses puceles trante,
Si fu quites par ceste rante.
Et devisé fu au jurer,
Que cist treüz devoit durer,
Tant con li dui maufé durroient.
Et a cel jor, que il seroient
Conquis et veincu an bataille,
Quites seroit de ceste taille,
Et nos seriiens delivrees,
Qui a honte somes livrees
Et a dolor et a meseise.
Ja mes n'avrons rien, qui nos pleise.
Mes mout dis ore grant anfance,
Qui parlai de la delivrance ;
Que ja mes de ceanz n'istrons.
Toz jorz mes de soie overrons,
Ne ja n'an serons miauz vestues.
Toz jorz serons povres et nues
Et toz jorz fain et soif avrons ;
Ja tant gaeignier ne savrons,
Que miauz an aiiens a mangier.
Del pain avons a grant dangier,
Petit au main et au soir mains ;
Que ja de l'uevre de noz mains
N'avra chascune por son vivre
Que quatre deniers de la livre.
Et de ce ne poons nos pas
Assez avoir viande et dras ;
Car, qui gaaingne la semainne
Vint souz, n'est mie fors de painne.
Et bien sachiez vos a estros,
Que il n'i a celi de nos,
Qui ne gaaint vint souz ou plus.
De ce seroit riches uns dus !
Et nos somes an grant poverte,
S'est riches de nostre desserte
Cil, por cui nos nos traveillons.
Des nuiz grant partie veillons
Et toz les jorz por gaeignier ;
Qu'an nos menace a maheignier
Des manbres, quant nos reposons,
Et por ce reposer n'osons.
Mes que vos iroie contant ?
De mal et de honte avons tant,
Que le quint ne vos an sai dire.
Mes ce nos fet esragier d'ire,
Que mout sovant morir veomes
Chevaliers riches et prodomes,
Qui as deus maufez se conbatent.
L'ostel mout chieremant achatent,
Aussi con vos feroiz demain ;
Que trestot seul de vostre main
Vos covandra, voilliez ou non,
Conbatre et perdre vostre non
Ancontre les deus vis deables.“
„Et Des, li voirs esperitables,“
Fet mes sire Yvains, „m'an deffande
Et vos enor et joie rande,
Se il a volanté li vient !
Des or mes aler m'an covient
Veoir les janz, qui leanz sont,
Savoir, quel chiere il me feront.“
„Ore alez, sire ! Cil vos gart,
Qui toz les biens done et depart !“

Lors va tant qu'il vient an la sale,
N'i trueve jant buene ne male,
Qui de rien le mete a reison.
Tant trespassent de la meison,
Que il vindrent an un vergier.
Ains de lor chevaus herbergier
Ne tindrent plet ne ne parlerent.
Cui chaut ? que bien les establerent
Cil, qui les cuidierent avoir.
Ne sai, s'il cuidoient savoir ;
Qu'ancore ont il seignor tot sain.
Li cheval ont avainne et fain
Et la litiere jusqu'au vantre.
Mes sire Yvains el vergier antre
Et aprés lui tote sa rote.
Apoiié voit dessor son cote
Un prodome, qui se gisoit
Sor un drap de soie, et lisoit
Une pucele devant lui
An un romanz, ne sai de cui.
Et por le romanz escouter
S'i estoit venue acoter
Une dame, et c'estoit sa mere,
Et li prodon estoit ses pere,
Si se pooient esjoïr
Mout de li veoir et oïr ;
Car il n'avoient plus d'anfanz ;
Ne n'avoit pas dis et set anz,
Et s'estoit si bele et si jante,
Qu'an li servir meïst s'antante
Li Des d'Amors, s'il la veïst,
Ne ja amer ne la feïst
Autrui se lui meïsme non.
Por li servir devenist hon,
S'issist de sa deïté fors
Et ferist lui meïsme el cors
Del dart, don la plaie ne sainne,
Se desleaus mires n'i painne.
N'est droiz, que nus garir an puisse,
Tant que desleauté i truisse.
Et qui an garist autremant,
Il n'aimme mie leaumant.
De ceste plaie vos deïsse,
Tant que hui mes fin ne preïsse,
Se li escouters vos pleüst ;
Mes tost deïst tel i eüst,
Que je vos parlasse d'oiseuse ;
Car la janz n'est mes amoreuse,
Ne n'aimment mes, si come il suelent ;
Que nes oïr parler n'an vuelent.
Mes ore oëz, an quel meniere,
A quel sanblant et a quel chiere
Mes sire Yvains fu herbergiez !
Contre lui saillirent an piez
Tuit cil, qui el vergier estoient.
Tot maintenant que il le voient,
Si li dïent : „Or ça, biaus sire !
De quanque Des puet feire et dire,
Soiiez vos beneoiz clamez
Et vos et quanque vos amez !“
Je ne sai, se il le deçoivent,
Mes a grant joie le reçoivent
Et font sanblant, que il lor pleise,
Que herbergiez soit a grant eise.
Meïsmes la fille au seignor
Le sert et porte grant enor,
Con l'an doit feire son buen oste :
Trestotes ses armes li oste,
Et ce ne fu mie del mains,
Qu'ele meïsme de ses mains
Li leve le col et la face.
Tote enor viaut, que l'an li face
Li sire, si come ele fet.
Chemise ridee li tret
Fors de son cofre et braies blanches
Et fil et aguille a ses manches,
Si li vest et ses braz li cost.
Or doint Des, que trop ne li cost
Ceste losange et cist servise !
A vestir dessor sa chemise
Li a baillié un buen sorcot,
Et un mantel sanz harigot,
Ver, d'escarlate, au col li met.
De lui servir tant s'antremet,
Qu'il an a honte et si l'an poise ;
Mes la pucele est tant cortoise
Et tant franche et tant de bon' eire,
Qu'ancore an cuide ele po feire.
Et bien set, qu'a sa mere plest,
Que rien a feire ne li lest,
Dont ele le cuit losangier.
La nuit fu serviz au mangier
De tanz mes, que trop an i ot.
Li aporters enuiier pot
As serjanz, qui des mes servirent.
La nuit totes enors li firent
Et mout a eise le couchierent,
N'onques puis a lui n'aprochierent,
Que il fu an son lit couchiez ;
Et ses lions jut a ses piez
Si come il ot acostumé.
Au main, quant Des ot alumé
Par le monde son lumineire,
Si matin, come il le pot feire,
Qui tot fet par devisemant,
Se leva mout isnelemant
Mes sire Yvains et sa pucele,
S'oïrent a une chapele
Messe, qui mout tost lor fu dite
An l'enor del saint Esperite.

Mes sire Yvains aprés la messe
Oï novele felenesse,
Quant il cuida, qu'il s'an deüst
Aler, que riens ne li neüst ;
Mes ne pot mie estre a son chois.
Quant il dist : „Sire ! je m'an vois,
S'il vos plest, a vostre congié“,
„Amis ! ancor nel vos doing gié“,
Fet li sire de la meison ;
„Je nel puis feire par reison ;
Qu'an cest chastel a establie
Une mout fiere deablie,
Que il me covient maintenir.
Je vos ferai ja ci venir
Deus miens serjanz mout granz et forz :
Ancontre aus deus, soit droiz ou torz,
Vos covandra voz armes prandre.
S'ancontre aus vos poez deffandre
Et aus andeus vaintre et ocirre,
Ma fille a seignor vos desirre
Et de cest chastel vos atant
L'enors et quanqu'il i apant“.
„Sire !“ fet il, „je n'an quier point.
Ja Des einsi ne la me doint,
Et vostre fille vos remaingne,
Ou l'anperere d'Alemaingne
Seroit bien saus, s'il l'avoit prise,
Qui mout est bele et bien aprise !“
„Teisiez, biaus ostes !“ dit li sire,
„De neant vos oi escondire ;
Que vos n'an poez eschaper.
Mon chastel et ma fille a per
Doit avoir et tote ma terre,
Qui les porra andeus conquerre,
Qui ja vos vandront assaillir.
La bataille ne puet faillir
Ne remenoir an nule guise.
Mes je sai bien, que coardise
Vos fet ma fille refuser :
Qu'einsi vos cuidiez reüser
Outreemant de la bataille.
Mes ce sachiez vos bien sanz faille,
Que conbatre vos i estuet !
Por rien eschaper ne s'an puet
Nus chevaliers, qui ceanz gise.
Ce est costume et rante assise,
Qui trop avra longue duree ;
Que ma fille n'iert mariee,
Tant que morz ou conquis les voie.“
„Donc m'i covient il tote voie
Conbatre maleoit gre mien ;
Mes je m'an sofrisse mout bien
Et volantiers, ce vos otroi.
La bataille, ce poise moi,
Ferai, quant ne puet remenoir.“
A tant vienent hideus et noir
Anbedui li fil au netun,
Et n'an i a nul, qui n'et un
Baston cornu de corneillier,
Qu'il orent fet apareillier
De cuivre et puis liier d'archal.
Des les espaules contre val
Furent armé jusqu'as genouz,
Mes les chiés orent et les vouz
Desarmez et les james nues,
Qui n'estoient mie menues.
Et einsi armé, come il vindrent,
Escuz reonz sor lor chiés tindrent,
Forz et legiers por escremir.
Li lions comance a fremir
Tot maintenant, que il les voit ;
Qu'il set mout bien et aparçoit,
Que a cez armes, que il tienent,
Conbatre a son seignor se vienent ;
Si se herice et creste ansanble,
De hardemant et d'ire tranble
Et bat la terre de sa coe
Et s'a talant, que il rescoe
Son seignor, ainz que il l'ocïent.
Et quant cil le voient, si dïent :
„Vassaus ! ostez de ceste place
Vostre lion, qui nos menace !
Ou vos vos clamez recreant,
Ou autremant, ce vos creant,
Le vos covient an tel leu metre,
Que il ne se puisse antremetre
De vos eidier ne de nos nuire.
Seus vos venez o nos deduire !
Que li lions vos eideroit
Mout volantiers, se il pooit.
„Vos meïsme, qui le dotez,“
Fet mes sire Yvains, „l'an ostez !
Que mout me plest et mout me siet,
S'il onques puet, que il vos griet,
Et mout m'iert bel, se il m'aïe.“
„Par foi !“ font il, „ce n'i a mie ;
Que ja aïe n'i avroiz.
Feites au miauz que vos porroiz
Toz seus sanz aïe d'autrui !
Seus i devez estre et nos dui.
Se li lions iere avuec vos,
Por ce, qu'il se meslast a nos,
Donc ne seriiez vos pas seus,
Dui seriiez contre nos deus ;
Si vos covient, ce vos afi,
Vostre lion oster de ci,
Mes que bien vos poist, ore androit.“
„Ou volez vos“, fet il, „qu'il soit ?
Ou volez vos, que je le mete ?“
Lors li mostrent une chanbrete,
Si dïent : „Leanz l'ancloez !“
„Fet iert, des que vos le volez.“
Lors l'i mainne et si l'i anserre.
Et an li va maintenant querre
Ses armes por armer son cors,
Et son cheval li ont tret fors,
Si li baillent, et il i monte.
Por lui leidir et feire honte
Li passent li dui chanpion ;
Qu'asseüré sont del lion,
Qui est dedanz la chanbre anclos.
Des maces li donent granz cos,
Que petit d'aïe li fet
Escuz ne hiaumes, que il et ;
Car, quant sor le hiaume l'ataingnent,
Trestot li anbuignent et fraingnent,
Et li escuz peçoie et font
Come glace ; tes tros i font,
Que ses poinz i puet an boter.
Mout font andui a redoter.
Et il, que fet des deus maufez ?
De honte et de crieme eschaufez
Se deffant de tote sa force.
Mout s'esvertue et mout s'esforce
De doner granz cos et pesanz.
Ne faillent pas a ses presanz ;
Qu'il lor rant lor bonté a doble.
Ore a le cuer dolant et troble
Li lions, qui est an la chanbre ;
Que de la grant bonté li manbre,
Que cil li fist par sa franchise,
Qui ja avroit de son servise
Et de s'aïe grant mestier.
Ja li randroit au grant sestier
Et au grant mui ceste bonté,
Ja n'i avroit rien mesconté,
S'il pooit issir de leanz.
Mout va regardant de toz sanz,
Ne ne voit, par ou il s'an aille.
Bien ot les cos de la bataille,
Qui perilleuse est et vilainne,
Et por ce si grant duel demainne,
Qu'il esrage vis et forsane.
Tant va reverchant, qu'il assane
Au suel, qui porrissoit pres terre,
S'i grate tant qu'il s'i anserre
Et fiche jusque pres des rains.
Et ja estoit mes sire Yvains
Mout traveilliez et mout suanz ;
Que mout trovoit les deus truanz
Forz et felons et adurez.
Mout i avoit cos andurez
Et randuz tant come il plus pot,
Ne de rien grevez ne les ot ;
Que trop savoient d'escremie,
Et lor escu n'estoient mie
Tel, que rien an ostast espee,
Tant fust tranchanz et aceree.
Et por ce se pooit mout fort
Mes sire Yvains doter de mort ;
Mes adés tant se contretint,
Que li lions outre s'an vint,
Tant ot dessoz le suel graté.
S'or ne sont li felon maté,
Donc ne le seront il ja mes ;
Car au lion triues ne pes
N'avront il tant con vis les sache.
L'un an aert et si le sache
Par terre aussi come un ploton.
Or sont esfreé li gloton,
Si n'a home an tote la place,
Qui an son cuer joie n'an face ;
Que cil ne relevera ja,
Que li lions aterré a,
Se li autre ne l'i secort.
Por lui eidier cele part cort
Et por lui meïsme deffandre ;
Qu'a lui s'alast li lions prandre,
Lués qu'il avroit celui ocis,
Que il avoit par terre mis ;
Et si ravoit plus grant peor
Del lion, que de son seignor.
Mes ore iert mes sire Yvains fos,
Des qu'il li a torné le dos,
Et voit le col nu a delivre,
Se longuemant le leisse vivre ;
Car mout l'an est bien avenu.
La teste nue et le col nu
Li a li gloz abandoné,
Et il li a tel cop doné,
Que la teste del bu li ret
Si soavet, que mot n'an set.
Et maintenant a terre vient
Por l'autre, que li lions tient,
Que rescorre et tolir li viaut.
Mes por neant ; que tant se diaut,
Que mire a tans ja n'i avra ;
Qu'an son venir si le navra
Li lions, qui mout vint iriez,
Que leidemant fu anpiriez.
Et tote voie arriers le bote,
Si voit que il li avoit rote
L'espaule tote et del bu treite.
Por lui de rien ne se desheite ;
Que ses bastons li est cheüz.
Et cil gist pres come feüz,
Qu'il ne se crolle ne ne muet ;
Mes tant i a, que parler puet,
Et dist si come il le puet dire :
„Ostez vostre lion, biaus sire !
Se vos plest, que plus ne m'adoist !
Que des or mes feire vos loist
De moi tot, quanque buen vos iert.
Et qui merci prie et requiert,
N'i doit faillir, quant il la rueve,
Se home sanz pitié ne trueve.
Et je ne me deffandrai plus
Ne ja ne me leverai sus
De ci por ce, que merci aie,
Si me met an vostre menaie.“
„Di donc“, fet il, „que tu otroies,
Que veincuz et recreanz soies !“
„Sire !“, fet il, „il i pert bien ;
„Veincuz sui maleoit gre mien
Et recreanz, ce vos otroi.“
„Donc n'as tu mes garde de moi,
Et mes lions te rasseüre.“
Tantost vienent grant aleüre
Totes les janz anviron lui
Et li sire et la dame andui,
Si li font joie et si l'acolent
Et de lor fille l'aparolent,
Si li dïent : „Or seroiz vos
Dameisiaus et sire de nos,
Et nostre fille iert vostre dame ;
Car nos la vos donons a fame.“
„Et gié“, fet il, „la vos redoing.
Qui l'a, si l'et ! Je n'an ai soing ;
Si nel di je pas por desdaing.
Ne vos poist, se je ne la praing ;
Que je ne puis ne je ne doi.
Mes, s'il vos plest, delivrez moi
Les cheitives, que vos avez !
Li termes est, bien le savez,
Qu'eles s'an doivent aler quites.“
„Voirs est“, fet il, „ce que vos dites,
Et je les vos rant et aquit ;
Qu'il n'i a mes nul contredit.
Mes prenez, si feroiz savoir,
Ma fille a trestot mon avoir,
Qui est mout bele et jante et sage !
Ja mes si riche mariage
N'avroiz, se vos cestui n'avez.“
„Sire !“, fet il, „vos ne savez
Mon essoine ne mon afeire,
Ne je ne le vos os retreire.
Mes ce sachiez, quant je refus
Ce, que ne refuseroit nus,
Qui deüst son cuer et s'antante
Metre an pucele bele et jante,
Que volantiers la receüsse,
Se je poïsse ne deüsse
Cesti ne autre recevoir.
Mes je ne puis, sachiez de voir,
Si m'an leissiez an pes a tant !
Que la dameisele m'atant,
Qui avuec moi est ça venue.
Conpaignie m'i a tenue,
Et je la revuel li tenir,
Que que il m'an doie avenir.“
„Volez, biaus sire ? Et vos comant ?
Ja mes, se je ne le comant
Et mes consauz ne le m'aporte,
Ne vos iert overte ma porte ;
Ainz remandroiz an ma prison.
Orguel feites et mesprison,
Quant je vos pri, que vos preigniez
Ma fille, et vos la desdeigniez.“
„Desdaing, sire ? Non faz, par m'ame !
Mes je ne puis esposer fame
Ne remenoir por nule painne.
La dameisele, qui m'an mainne,
Siurai ; qu'autremant ne puet estre.
Mes, s'il vos plest, de ma main destre
Vos plevirai, si m'an creez,
Qu'einsi, con vos or me veez,
Revandrai, se je onques puis,
Et prandrai vostre fille puis,
Quel ore que il buen vos iert.“
„Dahet“, fet il, „qui vos an quiert
Ne foi ne ploige ne creante !
Se ma fille vos atalante,
Vos revandroiz hastivemant.
Ja por foi ne por seiremant,
Ce cuit, ne revandroiz plus tost.
Ore alez ! Que je vos an ost
Toz creantes et toz covanz.
Se vos retaingne pluie ou vanz
Ou fins neanz, ne me chaut il.
Je n'ai pas ma fille si vil,
Que je par force la vos doingne.
Ore alez an vostre besoingne !
Que tot autant, se vos alez,
M'an est, con se vos remenez.“